ಕೊಹ್ಲಿ ಕೊನೆ ಶತಕದ ಬಳಿಕ ಆಡಿರುವ ಪಂದ್ಯ, ಗಳಿಸಿದ ರನ್ ಮತ್ತು ಅರ್ಧಶತಕಗಳು ಎಷ್ಟು?

ಅಂತಿಮ ಶತಕದ ನಂತರದ ಅಂಕಿ ಅಂಶ

ಬಾಂಗ್ಲಾದೇಶ ವಿರುದ್ಧ ವಿರಾಟ್ ಕೊಹ್ಲಿ ಸಿಡಿಸಿದ ತನ್ನ ಪಾಲಿನ 70ನೇ ಅಂತರರಾಷ್ಟ್ರೀಯ ಶತಕದ ನಂತರ ಕೊಹ್ಲಿಯ ಅಂಕಿಅಂಶ ಕೆಳಕಂಡಂತಿದೆ.

ವಿರಾಟ್ ಕೊಹ್ಲಿ ತನ್ನ ಅಂತಿಮ ಶತಕ ಬಾರಿಸಿದ ನಂತರ ಇಲ್ಲಿಯವರೆಗೂ ಒಟ್ಟು 64 ಅಂತರರಾಷ್ಟ್ರೀಯ ಪಂದ್ಯಗಳನ್ನಾಡಿದ್ದು, 75 ಇನ್ನಿಂಗ್ಸ್‌ನಲ್ಲಿ ಬ್ಯಾಟ್ ಬೀಸಿದ್ದಾರೆ ಹಾಗೂ 36.89ರ ಸರಾಸರಿಯಲ್ಲಿ 2509 ರನ್ ಕಲೆಹಾಕಿದ್ದಾರೆ. ಇನ್ನು ಕೊನೆಯ ಶತಕದ ಬಳಿಕ ಒಟ್ಟು 24 ಅರ್ಧಶತಕಗಳನ್ನು ಬಾರಿಸಿರುವ ಕೊಹ್ಲಿ ಕಲೆ ಹಾಕಿರುವ ಗರಿಷ್ಠ ರನ್ ಅಜೇಯ 94 ಹಾಗೂ 8 ಇನ್ನಿಂಗ್ಸ್‌ನಲ್ಲಿ ಡಕ್ ಔಟ್ ಆಗಿದ್ದಾರೆ. ಹೀಗೆ 75 ಇನ್ನಿಂಗ್ಸ್ ಕಳೆದಿದ್ದರೂ ಸಹ ವಿರಾಟ್ ಕೊಹ್ಲಿ ತಮ್ಮ 71ನೇ ಶತಕ ಬಾರಿಸುವಲ್ಲಿ ಮಾತ್ರ ಯಶಸ್ವಿಯಾಗಲಿಲ್ಲ.

ಕೊಹ್ಲಿ ಬಾರಿಸಿರುವ ಶತಕಗಳ ಸಂಖ್ಯೆ

2009ರ ಡಿಸೆಂಬರ್ 24ರಂದು ಶ್ರೀಲಂಕಾ ವಿರುದ್ಧ ಕೋಲ್ಕೊತ್ತಾದ ಈಡನ್ ಗಾರ್ಡನ್ಸ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದಿದ್ದ ಏಕದಿನ ಪಂದ್ಯದಲ್ಲಿ ಪ್ರಥಮ ಅಂತರರಾಷ್ಟ್ರೀಯ ಶತಕ ಬಾರಿಸಿದ್ದ ವಿರಾಟ್ ಕೊಹ್ಲಿ 2019ರ ಆಗಸ್ಟ್ 14ರಂದು ವೆಸ್ಟ್ ಇಂಡೀಸ್ ವಿರುದ್ಧ ನಡೆದಿದ್ದ ಪಂದ್ಯದಲ್ಲಿ ಕೊನೆಯದಾಗಿ ಏಕದಿನ ಶತಕ ಬಾರಿಸಿದ್ದರು. ಇನ್ನು 2012ರ ಜನವರಿ 24ರಂದು ಆಸ್ಟ್ರೇಲಿಯಾ ವಿರುದ್ಧ ಶತಕ ಬಾರಿಸಿದ್ದ ಕೊಹ್ಲಿ ತಮ್ಮ ಪ್ರಥಮ ಟೆಸ್ಟ್ ಶತಕ ದಾಖಲಿಸಿದ್ದರು ಹಾಗೂ 2019ರ ನವೆಂಬರ್ 22ರಂದು ಬಾಂಗ್ಲಾ ವಿರುದ್ಧ ಕೊಹ್ಲಿ ಸಿಡಿಸಿದ ಶತಕ ಅವರ ಅಂತಿಮ ಟೆಸ್ಟ್ ಶತಕವಾಗಿದೆ. ಇನ್ನು ಏಕದಿನ ಕ್ರಿಕೆಟ್‍ನಲ್ಲಿ ವಿರಾಟ್ ಒಟ್ಟು 43 ಶತಕಗಳನ್ನು ಬಾರಿಸಿದ್ದರೆ, ಟೆಸ್ಟ್ ಕ್ರಿಕೆಟ್‍ನಲ್ಲಿ 27 ಶತಕ ಬಾರಿಸಿದ್ದಾರೆ.

ಒಟ್ಟಾರೆ ಪಟ್ಟಿಯಲ್ಲಿ ತೃತೀಯ ಸ್ಥಾನ

ಹೀಗೆ ಎರಡೂವರೆ ವರ್ಷಗಳಿಂದ ಶತಕ ಬಾರಿಸದೇ ವಿಫಲರಾಗಿರುವ ವಿರಾಟ್ ಕೊಹ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‍ನಲ್ಲಿ ಒಟ್ಟು 70 ಶತಕಗಳನ್ನು ದಾಖಲಿಸಿದ್ದು, ಅತಿ ಹೆಚ್ಚು ಅಂತರರಾಷ್ಟ್ರೀಯ ಶತಕ ಬಾರಿಸಿದ ಆಟಗಾರರ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. 71 ಶತಕ ಬಾರಿಸಿರುವ ರಿಕಿ ಪಾಂಟಿಂಗ್ ದ್ವಿತೀಯ ಸ್ಥಾನ ಹಾಗೂ 100 ಶತಕ ಬಾರಿಸಿರುವ ಸಚಿನ್ ತೆಂಡೂಲ್ಕರ್ ಅಗ್ರಸ್ಥಾನದಲ್ಲಿದ್ದಾರೆ.