ಸಚಿನ್ ತೆಂಡೂಲ್ಕರ್ vs ವಿರಾಟ್ ಕೊಹ್ಲಿ: ಭಾರತ ಪರ ಅತಿ ಹೆಚ್ಚು ಪಂದ್ಯ ವಿಜೇತ ಶತಕಗಳನ್ನು ಬಾರಿಸಿದವರು ಯಾರು?

ಸದ್ಯ ನಡೆಯುತ್ತಿರುವ 2023ರ ಐಸಿಸಿ ಏಕದಿನ ವಿಶ್ವಕಪ್‌ನಲ್ಲಿ ಭಾರತದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ತಮ್ಮ 48ನೇ ಏಕದಿನ ಶತಕವನ್ನು ಬಾಂಗ್ಲಾದೇಶ ವಿರುದ್ಧ ಗಳಿಸುವ ಮೂಲಕ ಮತ್ತೊಂದು ಯಶಸ್ವಿ ರನ್ ಚೇಸ್ ಪೂರ್ಣಗೊಳಿಸಿದರು.

ನ್ಯೂಜಿಲೆಂಡ್ ವಿರುದ್ಧದ ನಂತರದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಮತ್ತೊಂದು ಶತಕದ ಸಮೀಪದಲ್ಲಿದ್ದರು. ಆದರೆ ಕೇವಲ 5 ರನ್‌ಗಳಿಂದ ದಾಖಲೆಯ ಶತಕವನ್ನು ತಪ್ಪಿಸಿಕೊಂಡರು.

ವಿರಾಟ್ ಕೊಹ್ಲಿ 5 ರನ್‌ ಗಳಿಸಿ ಶತಕ ಪೂರೈಸಿದ್ದರೆ, ಏಕದಿನ ಕ್ರಿಕೆಟ್‌ನಲ್ಲಿ 49 ಶತಕಗಳನ್ನು ಸಿಡಿಸಿರುವ ಸಚಿನ್ ತೆಂಡೂಲ್ಕರ್ ಅವರ ಅಸಾಧಾರಣ ದಾಖಲೆಯನ್ನು ಸರಿಗಟ್ಟುತ್ತಿದ್ದರು.

ಆದಾಗ್ಯೂ, ಹೆಚ್ಚಿನ ಏಕದಿನ ಶತಕಗಳ ದಾಖಲೆಗಳಿಗೆ ಸಂಬಂಧಿಸಿದಂತೆ ವಿರಾಟ್ ಕೊಹ್ಲಿ ಲೆಜೆಂಡ್ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರನ್ನು ಸರಿಗಟ್ಟುವು ಮಾತ್ರವಲ್ಲದೆ ಅವರನ್ನು ಹಿಂದಿಕ್ಕುವುದು ದೊಡ್ಡ ಸುದ್ದಿಯಾಗಲಿದೆ.

ಭಾರತಕ್ಕೆ ಈ ವಿಶ್ವಕಪ್‌ನ ಲೀಗ್ ಹಂತದಲ್ಲಿ ಇನ್ನೂ ನಾಲ್ಕು ಪಂದ್ಯಗಳು ಬಾಕಿ ಉಳಿದಿರುವ ಕಾರಣ, ಸಚಿನ್ ತೆಂಡೂಲ್ಕರ್ ಅವರ ಏಕದಿನ ಶತಕಗಳ ದಾಖಲೆಯು ಇದೇ ವಿಶ್ವಕಪ್‌ನಲ್ಲಿಯೇ ಉರುಳುವ ದೊಡ್ಡ ಅವಕಾಶವಿದೆ ಮತ್ತು ಸೆಮಿಫೈನಲ್ ಮತ್ತು ಫೈನಲ್‌ನಲ್ಲಿ ಇನ್ನೂ 2 ಪಂದ್ಯಗಳು ಆಡಬಹುದಾಗಿದೆ.

ವಿರಾಟ್ ಕೊಹ್ಲಿ ಅವರು ಸಚಿನ್ ತೆಂಡೂಲ್ಕರ್ ಅವರ ಸಂಖ್ಯೆಗಿಂತ ಕಡಿಮೆಯಿರಬಹುದು. ಆದರೆ ಕೊಹ್ಲಿಯ ಶತಕಗಳು ತಂಡದ ಪ್ರದರ್ಶನದ ಮೇಲೆ ಸೃಷ್ಟಿಸಿದ ಪ್ರಭಾವವು ಹೆಚ್ಚಾಗಿದೆ. ಏಕದಿನ ಮಾದರಿಯಲ್ಲಿ ಈವರೆಗೆ ಭಾರತ ತಂಡದ ಪರ ವಿರಾಟ್ ಕೊಹ್ಲಿ ಬಾರಿಸಿದ 48 ಶತಕಗಳಲ್ಲಿ 40 ಶತಕಗಳು ಗೆಲುವಿಗೆ ಕಾರಣವಾಗಿವೆ.

ಇನ್ನು ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಒಟ್ಟು 49 ಶತಕಗಳನ್ನು ಬಾರಿಸಿದ್ದಾರೆ. ಅದರಲ್ಲಿ 33 ಶತಕಗಳು ಗೆಲುವಿಗೆ ಕಾರಣವಾಗಿವೆ. ಇದರಿಂದ ಸ್ಪಷ್ಟವಾಗಿ ವಿರಾಟ್ ಕೊಹ್ಲಿ ಅವರು ಸಚಿನ್ ತೆಂಡೂಲ್ಕರ್‌ಗಿಂತ ಹೆಚ್ಚು ಪಂದ್ಯ ವಿಜೇತ ಶತಕಗಳನ್ನು ಬಾರಿಸಿದ್ದಾರೆ.

ಭಾರತ ದೇಶವು ನಿರ್ಮಿಸಿದ ಇಬ್ಬರು ಸಂಪೂರ್ಣ ಬ್ಯಾಟಿಂಗ್ ಲೆಜೆಂಡ್‌ಗಳ ಶ್ರೇಷ್ಠತೆಯನ್ನು ನಾವು ಇಲ್ಲಿ ಹೋಲಿಕೆ ಮಾಡುತ್ತಿಲ್ಲ. ಆದರೆ, ಇಬ್ಬರು ಗಳಿಸಿದ ಶತಕಗಳ ಪ್ರಭಾವವನ್ನು ನೋಡುವುದು ಮುಖ್ಯವಾಗಿದೆ.

ಇದೇ ವೇಳೆ ವಿರಾಟ್ ಕೊಹ್ಲಿ ಅವರು ಸಚಿನ್ ತೆಂಡೂಲ್ಕರ್‌ಗಿಂತ ಹೆಚ್ಚು ಪರಿಣಾಮಕಾರಿ ಶತಕಗಳನ್ನು ಬಾರಿಸಿದ್ದರೂ, ಇಂದಿನ ಭಾರತೀಯ ಕ್ರಿಕೆಟ್ ತಂಡವು ವಿಶ್ವದ ಯಾವುದೇ ತಂಡವನ್ನು ಸೋಲಿಸುತ್ತದೆ ಎಂಬುದು ಗಮನಾರ್ಹ.

ಆದರೆ ಸಚಿನ್ ತೆಂಡೂಲ್ಕರ್ ಇನ್ನೂ ಏಕದಿನ ಕ್ರಿಕೆಟ್‌ನಲ್ಲಿ ಬೆಳವಣಿಗೆ ಕಾಣುತ್ತಿರುವ ತಂಡದಲ್ಲಿ ಆಡುತ್ತಿದ್ದರು ಎಂಬುದು ಉಲ್ಲೇಖನಿಯ. ಅದೇ ದೃಷ್ಟಿಯಿಂದ ನೋಡಿದರೆ, ಸಚಿನ್ ತೆಂಡೂಲ್ಕರ್ ಅವರ 33 ಪಂದ್ಯ ವಿಜೇತ ಶತಕಗಳು ದೊಡ್ಡ ಸಾಧನೆಯಾಗಿದೆ.

ಕ್ರಿಕೆಟ್‌ನ ಎಲ್ಲ ಸ್ವರೂಪಗಳಲ್ಲಿ ಪಂದ್ಯ ವಿಜೇತ ಕಾರಣಕ್ಕಾಗಿ ಹೆಚ್ಚಿನ ಅಂತಾರಾಷ್ಟ್ರೀಯ ಶತಕಗಳ ವಿಷಯದಲ್ಲಿ ವಿರಾಟ್ ಕೊಹ್ಲಿ (54) ಆಸ್ಟ್ರೇಲಿಯಾ ತಂಡದ ಮಾಜಿ ನಾಯಕ ರಿಕಿ ಪಾಂಟಿಂಗ್ (55) ನಂತರದ ಸ್ಥಾನದಲ್ಲಿದ್ದಾರೆ.

ಭಾರತದ ಲೆಜೆಂಡ್ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ 53 ಪಂದ್ಯ ವಿಜೇತ ಶತಕಗಳೊಂದಿಗೆ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ದಕ್ಷಿಣ ಆಫ್ರಿಕಾದ ಹಾಶಿಮ್ ಆಮ್ಲಾ 40 ಶತಕಗಳೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದರೆ, 37 ಶತಕಗಳೊಂದಿಗೆ ದಕ್ಷಿಣ ಆಫ್ರಿಕಾದ ಎಬಿ ಡಿವಿಲಿಯರ್ಸ್ ಐದನೇ ಸ್ಥಾನದಲ್ಲಿದ್ದಾರೆ.

ವಿರಾಟ್ ಕೊಹ್ಲಿಯ ಮುಂದಿನ ಸವಾಲು

ಸದ್ಯ ನಡೆಯುತ್ತಿರುವ 2023ರ ಏಕದಿನ ವಿಶ್ವಕಪ್‌ನ ಲೀಗ್ ಹಂತದಲ್ಲಿ ವಿರಾಟ್ ಕೊಹ್ಲಿಗೆ ನಾಲ್ಕು ಪಂದ್ಯಗಳು ಬಾಕಿ ಇವೆ. ಮುಂದಿನ ಪಂದ್ಯದಲ್ಲಿ ಬಲಿಷ್ಠ ಇಂಗ್ಲೆಂಡ್ ತಂಡವನ್ನು ಎದುರಿಸಬೇಕಿದೆ. ಆಂಗ್ಲ ಬೌಲರ್‌ಗಳು ಭಾರತೀಯ ಪರಿಸ್ಥಿತಿಗಳಲ್ಲಿ ಹೆಣಗಾಡುತ್ತಿದ್ದಾರೆ.

ವಿರಾಟ್ ಕೊಹ್ಲಿ ಒಬ್ಬ ಬೌಲರ್‌ಗೆ ಮಾತ್ರ ಗಮನಹರಿಸಬೇಕಿದೆ, ಆತನೇ ಆದಿಲ್ ರಶೀದ್. ಭಾರತದ ಸ್ಟಾರ್ ಬ್ಯಾಟರ್ ವಿರಾಟ್ ಲೆಗ್ ಸ್ಪಿನ್ ಬೌಲಿಂಗ್ ವಿರುದ್ಧ ತನ್ನ ಹೋರಾಟ ನಡೆಸುತ್ತಿದ್ದಾರೆ ಮತ್ತು ಖಂಡಿತವಾಗಿಯೂ ಇಂಗ್ಲೆಂಡ್ ಆರಂಭದಿಂದಲೇ ಆದಿಲ್ ರಶೀದ್ ಅವರನ್ನು ಬಿಟ್ಟು ವಿರಾಟ್ ಕೊಹ್ಲಿಯನ್ನು ಗುರಿಯಾಗಿಸಲು ಎದುರು ನೋಡುತ್ತದೆ.