ಸಚಿನ್ ಹೆಸರಲ್ಲಿ ಹಲವಾರು ದಾಖಲೆ
ಆಧುನಿಕ ಯುಗದ ಬೆಸ್ಟ್ ಬ್ಯಾಟ್ಸ್ಮನ್ ಎಂದು ಸಚಿನ್ ತೆಂಡೂಲ್ಕರ್ ಅವರಿಗಿದೆ. 463 ಏಕದಿನ ಪಂದ್ಯಗಳನ್ನಾಡಿರುವ ಸಚಿನ್, 44.83ರ ಸರಾಸರಿಯಲ್ಲಿ ವಿಶ್ವ ದಾಖಲೆಯ 18426 ರನ್ ಕಲೆ ಹಾಕಿದ್ದಾರೆ. 49 ಶತಕಗಳ ದಾಖಲೆಯೂ ಸಚಿನ್ ಹೆಸರಿನಲ್ಲಿದೆ. ಆದರೆ ಟಿ20 ಕ್ರಿಕೆಟ್ ವಿಚಾರಕ್ಕೆ ಬಂದರೆ ಸಚಿನ್ ಹೆಚ್ಚು ಪಂದ್ಯಗಳನ್ನಾಡಿಲ್ಲ. ಕೇವಲ 1 ಟಿ20ಐ ಪಂದ್ಯವನ್ನಾಡಿರುವ ಸಚಿನ್ 10 ರನ್ ಗಳಿಸಿದ್ದಾರೆ.
ಅತ್ಯಧಿಕ ರನ್ ವಿಶ್ವದಾಖಲೆ
ವೈಟ್ ಬಾಲ್ ಕ್ರಿಕೆಟ್ನಲ್ಲಿ ಅತ್ಯಧಿಕ ವೈಯಕ್ತಿಕ ರನ್ ವಿಶ್ವದಾಖಲೆ ರೋಹಿತ್ ಶರ್ಮಾ ಅವರ ಹೆಸರಿನಲ್ಲಿದೆ. 224 ಏಕದಿನ ಪಂದ್ಯಗಳಲ್ಲಿ ರೋಹಿತ್ 49.27ರ ಸರಾಸರಿಯಲ್ಲಿ 9115 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ 29 ಶತಕಗಳು ಸೇರಿವೆ. ಅಲ್ಲದೆ ಒಂದೇ ಟೂರ್ನಿಯಲ್ಲಿ ಐದು ಶತಕಗಳ ದಾಖಲೆಯೂ ರೋಹಿತ್ ಮಾಡಿದ್ದಾರೆ. ಅಷ್ಟೇ ಅಲ್ಲ, ಏಕದಿನದಲ್ಲಿ ವೈಯಕ್ತಿಕ ಅತ್ಯಧಿಕ ರನ್ (264 ರನ್) ವಿಶ್ವ ದಾಖಲೆಯೂ ಹಿಟ್ ಮ್ಯಾನ್ ನಿರ್ಮಿಸಿದ್ದಾರೆ.
ಭಾರತದ ಬೆಸ್ಟ್ ವೈಟ್ಬಾಲ್ ಕ್ರಿಕೆಟರ್
ಭಾರತದ ಬೆಸ್ಟ್ ವೈಟ್ಬಾಲ್ ಕ್ರಿಕೆಟರ್ ಯಾರು ಎಂಬ ಪ್ರಶ್ನೆ ಕೇಳಿ, ವಾಸಿಮ್ ಜಾಫರ್ ಮುಂದೆ ಸಚಿನ್ ತೆಂಡೂಲ್ಕರ್, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಈ ಮೂರು ಆಯ್ಕೆಗಳನ್ನು ನೀಡಲಾಗಿತ್ತು. ಈ ವೇಳೆ ಜಾಫರ್ ತಡಕಾಡದೆ ಕೊಹ್ಲಿಯನ್ನು ಆರಿಸಿದ್ದಾರೆ. ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ಅವರು ಭಾರತದ ಬೆಸ್ಟ್ ವೈಟ್ ಬಾಲ್ ಕ್ರಿಕೆಟಿಗ ಎಂದು ಜಾಫರ್ ಹೇಳಿದ್ದಾರೆ.
ಸರಾಸರಿಯಲ್ಲಿ ಕೊಹ್ಲಿ ಮೇಲು
ವೈಟ್ ಬಾಲ್ನಲ್ಲಿ ವಿರಾಟ್ ಕೊಹ್ಲಿ ಬೆಸ್ಟ್ ಬ್ಯಾಟ್ಸ್ಮನ್ ಅಂತ ಜಾಫರ್ ಹೇಳಲು ಕಾರಣವಿದೆ. ಏಕದಿನ ಕ್ರಿಕೆಟ್ನ ಸರಾಸರಿ ಗಮನಿಸಿದರೆ ಸಚಿನ್, ರೋಹಿತ್ಗಿಂತ ಕೊಹ್ಲಿಯದ್ದೇ ಹೆಚ್ಚಿದೆ. 248 ಏಕದಿನ ಪಂದ್ಯಗಳನ್ನಾಡಿರುವ ಕೊಹ್ಲಿ 59.34ರ ಸರಾಸರಿಯಲ್ಲಿ 11867 ರನ್ ಗಳಿಸಿದ್ದಾರೆ. ಇದರಲ್ಲಿ 43 ಶತಕಗಳು ಸೇರಿವೆ. ಅಲ್ಲದೆ ಟಿ20 ಕ್ರಿಕೆಟ್ನಲ್ಲೂ ವಿರಾಟ್ ಉತ್ತಮ ರನ್ ಸಾಧನೆ ಹೊಂದಿದ್ದಾರೆ.