ಕ್ರಿಕೆಟರ್ 'ಡಿಜೆ' ಬ್ರಾವೊ ಈಗ ಬಾಲಿವುಡ್ಡಿನ ಹೊಸ ಸಿಂಗರ್!

ಮುಂಬೈ, ಆಗಸ್ಟ್ 26: ವೆಸ್ಟ್ ಇಂಡೀಸ್ ಕ್ರಿಕೆಟಿಗ ಡಿಜೆ ಡ್ವಾಯ್ನ್ ಬ್ರಾವೊ ಅವರು ಬಾಲಿವುಡ್ಡಿನ ಹೊಸ ಗಾಯಕರಾಗಿ ಎಂಟ್ರಿ ಕೊಡುತ್ತಿದ್ದಾರೆ. 'ತುಮ್ ಬಿನ್-2' ಚಿತ್ರಕ್ಕಾಗಿ ಕಂಠದಾನ ಮಾಡುತ್ತಿದ್ದಾರೆ. ಈಗಾಗಲೇ ಡಿಜೆ ಬ್ರಾವೊ 'ಚಾಂಪಿಯನ್ ಡ್ಯಾನ್ಸ್' ಭಾರತದಲ್ಲಿ ಹೊಸ ಕ್ರೇಜ್ ಹುಟ್ಟುಹಾಕಿದೆ.

ಅನುಭವ್ ಸಿನ್ಹಾ ನಿರ್ದೇಶನದ ಈ ಚಿತ್ರದಲ್ಲಿ ಗಾಯಕರಾಗಲು ಡ್ವಾಯ್ನ್ ಬ್ರಾವೊ ಸಿದ್ಧರಾಗುತ್ತಿದ್ದಾರೆ. ಈ ಮೊದಲು ಶಾರುಖ್ ಅಭಿನಯದ 2011ರಲ್ಲಿ ತೆರೆ ಕಂಡ 'ರಾ-ಒನ್' ಚಿತ್ರದ ಚಮಕ್ ಚಲ್ಲೋ ಹಾಡಿಗಾಗಿ ಅಂತಾರಾಷ್ಟ್ರೀಯ ಖ್ಯಾತಿಯ ಪಾಪ್ ಸಿಂಗರ್ ಅಕೊನ್​ ರನ್ನು ಕರೆತಂದಿದ್ದ ಅನುಭವ್ ಸಿನ್ಹಾ ಈಗ ಕ್ರಿಕೆಟರ್ ಬ್ರಾವೊರನ್ನು ಕರೆಸುತ್ತಿದ್ದಾರೆ.

'ಜಗೆರ್ ಬಾಂಬ್' ಎಂಬ ಹಾಡನ್ನು ಸೆಪ್ಟೆಂಬರ್ ಮೊದಲ ವಾರದಲ್ಲಿ ರೊಮಾನಿಯದ ನೈಟ್ ಕ್ಲಬ್​ನಲ್ಲಿ ತಂಡವು ಚಿತ್ರೀಕರಿಸಲಿದೆ.

ಬ್ರಾವೊ ಜತೆ ಅಂಕಿತ್ ತಿವಾರಿ ಕೂಡ ಹಾಡಲಿದ್ದು ಸಿನ್ಹಾ ನಿರ್ದೇಶಿಸಲಿದ್ದಾರೆ. ಫಾಸ್ಟ್ ಪೆಪ್ಪಿ ಟ್ರ್ಯಾಕ್ ಹಾಡನ್ನು ಇಂಡೋ-ವೆಸ್ಟರ್ನ್ ಶೈಲಿಯಲ್ಲಿ ಹಾಡಲಿದ್ದಾರೆ.

2001 ರ ತುಮ್ ಬಿನ್ ಎಂಬ ಹಿಟ್ ಚಿತ್ರದ ಮುಂದುವರೆದ ಅವತರಣಿಕೆಯಾಗಿರುವ ಚಿತ್ರದಲ್ಲಿ ನೇಹಾ ಶರ್ಮಾ, ಆಶಿಮ್ ಗುಲಾಟಿ ಮತ್ತು ಆದಿತ್ಯ ಸೀಲ್ ನಟಿಸಲಿದ್ದಾರೆ. ಚಿತ್ರ ನವಂಬರ್ ತಿಂಗಳಲ್ಲಿ ಬಿಡುಗಡೆಗೊಳ್ಳುವ ನಿರೀಕ್ಷೆಯಿದೆ. ಬ್ರಾವೊ ಕೂಡಾ ಚಿತ್ರದ ಪ್ರಚಾರ ಗೀತೆಯಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ. (ಪಿಟಿಐ)