ರಿಷಬ್ ಪಂತ್ ಐಪಿಎಲ್ ರನ್ನಿಗೂ ಟಿ20ಐ ಸ್ಕೋರಿಗೂ ಅಜಗಜಾಂತರ ವ್ಯತ್ಯಾಸ!

ಐಪಿಎಲ್‌ನಲ್ಲಿ ಹೀರೋ

ಐಪಿಎಲ್‌ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಭರ್ಜರಿ ಬ್ಯಾಟ್ ಬೀಸುವ ರಿಷಬ್ ಪಂತ್, ಅಂತಾರಾಷ್ಟ್ರೀಯ ಟಿ20ಯಲ್ಲಿ ತೀರಾ ಸಾಧಾರಣ ರನ್ ಸಾಧನೆ ಹೊಂದಿದ್ದಾರೆ. ಐಪಿಎಲ್‌ನಲ್ಲಿ ಪಂತ್ ಹೀರೋ ಅನ್ನುವುದಕ್ಕೆ ರನ್ ದಾಖಲೆ ಸಾಕ್ಷಿ ಒದಗಿಸಿದರೆ, ಟಿ20ಐನಲ್ಲಿ ಪಂತ್ ಗಳಿಸಿರುವ ರನ್ ಏನೇನೂ ಇಲ್ಲ. ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಂತ್ ಹೊಸಬರೆ. ಹೀಗಾಗಿ ಐಪಿಎಲ್‌ಗೂ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೂ ಪಂತ್‌ ಅವರನ್ನು ಹೋಲಿಸೋದು ಸರಿಯಲ್ಲ. ಆದರೆ ಐಪಿಎಲ್‌ ಮತ್ತು ಟಿ20ಐ ರನ್ ಸಾಧನೆಗಿರುವ ದೊಡ್ಡ ಅಂತರವನ್ನು ಕಿರಿದುಗೊಳಿಸಲು ಪಂತ್‌ಗೆ ವಿಂಡೀಸ್ ಸರಣಿಯಲ್ಲಿ ಅವಕಾಶವಿದೆ.

ಅಜಗಜಾಂತರ ವ್ಯತ್ಯಾಸ

ಐಪಿಎಲ್‌ನಲ್ಲಿ ಒಟ್ಟು 54 ಪಂದ್ಯಗಳನ್ನಾಡಿರುವ ಪಂತ್ 36.16ರ ಸರಾಸರಿಯಂತೆ 1736 ರನ್ ಗಳಿಸಿದ್ದಾರೆ. 128 ಇನ್ನಿಂಗ್ಸ್ ಅತ್ಯಧಿಕ ರನ್ ಸಾಧನೆ ಹೊಂದಿರುವ ಪಂತ್ 1 ಶತಕವೂ ಸೇರಿ 11 ಅರ್ಧಶತಕಗಳನ್ನು ಬಾರಿಸಿದ್ದಾರೆ. ಅದೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 15 ಪಂದ್ಯಗಳಲ್ಲಿ 19.41ರ ಸರಾಸರಿಯಂತೆ ಕೇವಲ 233 ರನ್ ಕಲೆ ಹಾಕಿದ್ದಾರೆ. 58 ರನ್ ಇನ್ನಿಂಗ್ಸ್ ಒಂದರಲ್ಲಿ ರಿಷಬ್ ಬಾರಿಸಿರುವ ಅತ್ಯಧಿಕ ರನ್. ಹೀಗಾಗಿ ಶತಕವಿಲ್ಲ, 1 ಅರ್ಧ ಶತಕದ ದಾಖಲೆ ಮಾತ್ರ ರಿಷಬ್ ಹೊಂದಿದ್ದಾರೆ.

ಸುಧಾರಣೆಗೆ ಅವಕಾಶ

ವೆಸ್ಟ್ ಇಂಡೀಸ್ ಪ್ರವಾಸ ಸರಣಿಗೆ ಬಿಸಿಸಿಐ ತಂಡಗಳನ್ನು ಪ್ರಕಟಿಸುವ ಮುನ್ನವೇ ಧೋನಿ, ತಾನು ಆರ್ಮಿ ಸೇವೆಯಲ್ಲಿ ತೊಡಗಿಕೊಳ್ಳುತ್ತೇನೆ ಎಂದು ತಿಳಿಸಲಿದ್ದರೆ, ಧೋನಿಯನ್ನು ವಿಂಡೀಸ್ ಸರಣಿಯಲ್ಲಿ ಆಡಿಸಲೇಬೇಕಾದ ಇಕ್ಕಟ್ಟಿಗೆ ಬಿಸಿಸಿಐ ಸಿಲುಕುತ್ತಿತ್ತು. ಅಂತೂ ವಿಂಡೀಸ್ ಸರಣಿಯಲ್ಲಿ ಒಟ್ಟು 3 ಟಿ20 ಪಂದ್ಯಗಳಿವೆ. ಈ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡರೆ ಪಂತ್‌, ಟಿ20ಐ ಸಾಧಾರಣ ರನ್‌ ದಾಖಲೆಯನ್ನು ಸುಧಾರಿಸಿಕೊಳ್ಳಬಹುದು.

ರಿಷಬ್ ವರ್ಷಾವಾರು ಸಾಧನೆ

ಟಿ20ಗೆ ಸಂಬಂಧಿಸಿ ರಿಷಬ್ ಪಂತ್ ಸ್ಟ್ರೈಕ್‌ರೇಟ್ ಸುಧಾರಿಸುತ್ತಿದೆ. 2017, 18 ಮತ್ತು 19ರಲ್ಲಿ ಪಂತ್ ಕ್ರಮವಾಗಿ 113.15, 118.75 ಮತ್ತು 124.59 ಸ್ಟ್ರೈಕ್‌ರೇಟ್ ಹೊಂದಿದ್ದರು. ಆದರೆ ರನ್ ಸಾಧನೆ ತೃಪ್ತಿ ನೀಡುವಂತಿಲ್ಲ. 2017ರಲ್ಲಿ 2 ಇನ್ನಿಂಗ್ಸ್‌ಗಳನ್ನು ಆಡಿರುವ ಪಂತ್ 43ರ ಸರಾಸರಿಯಲ್ಲಿ 43 ರನ್ ಬಾರಿಸಿದ್ದರು. 2018ರಲ್ಲಿ 7 ಇನ್ನಿಂಗ್ಸ್‌ಗಳಲ್ಲಿ 16.28ರ ಸರಾಸರಿಯಲ್ಲಿ 114 ರನ್ ಗಳಿಸಿದ್ದರು. 2019ರಲ್ಲಿ 5 ಇನ್ನಿಂಗ್ಸ್‌ಗಳಲ್ಲಿ 19ರ ಸರಾಸರಿಯಲ್ಲಿ 76 ರನ್ ಸಾಧನೆ ಹೊಂದಿದ್ದರು.