ಸೆಮಿಫೈನಲ್ ಪ್ರವೇಶಿಸಲು ಭಾರತಕ್ಕೆ 196 ರನ್‌ ಗುರಿ ನೀಡಿದ ವಿಂಡೀಸ್‌

ಕೋಲ್ಕತ್ತಾ: ಆಲ್‌ರೌಂಡರ್ ಜೇಸನ್‌ ಹೋಲ್ಡರ್ ಹಾಗೂ ರೋವ್‌ಮನ್ ಪೊವೆಲ್ ಅವರ ಜವಾಬ್ದಾರಿಯುತ ಆಟದ ನೆರವಿನಿಂದ ವೆಸ್ಟ್‌ ಇಂಡೀಸ್ ಟಿ20 ವಿಶ್ವಕಪ್‌ ಸೂಪರ್ 8 ಹಂತದ ಪಂದ್ಯದಲ್ಲಿ 196 ರನ್‌ಗಳ ಗುರಿಯನ್ನು ಆತಿಥೇಯ ಟೀಮ್ ಇಂಡಿಯಾಕ್ಕೆ ನೀಡಿದೆ.

ಟಾಸ್‌ ಸೋತರೂ ಮೊದಲು ಬ್ಯಾಟ್ ಮಾಡಿದ ವೆಸ್ಟ್‌ ಇಂಡೀಸ್ ತಂಡದ ಆರಂಭ ಉತ್ತಮವಾಗಿತ್ತು. ಬ್ರೆಂಡನ್‌ ಕಿಂಗ್‌ ಬದಲಿಗೆ ರೋಸ್ಟನ್ ಚೇಸ್ ಅವರು ಇನಿಂಗ್ಸ್ ಆರ್ಂಭಿಸುವ ಅವಕಾಶವನ್ನು ಪಡೆದರು. ಈ ಜೋಡಿ ತಂಡಕ್ಕೆ ಭರ್ಜರಿ ಜೊತೆಯಾಟದ ಕಾಣಿಕೆ ನೀಡಿದರು. ಈ ಜೋಡಿ ಆರಂಭದಲ್ಲಿ ಎಚ್ಚರಿಕೆಯಿಂದ ಬ್ಯಾಟ್ ಮಾಡಿತು. ಈ ಜೋಡಿ ಪವರ್‌ ಪ್ಲೇನಲ್ಲಿ 45 ರನ್‌ಗಳ ಜೊತೆಯಾಟದ ಕಾಣಿಕೆ ನೀಡಿತು. ಚೇಸ್‌ ಹಾಗೂ ಶಾಯ್‌ ಹೋಪ್ ಮೊದಲ ವಿಕೆಟ್‌ಗೆ 8.5 ಓವರ್‌ಗಳಲ್ಲಿ 68 ರನ್‌ ಸೇರಿಸಿತು. ಜೀವದಾನದ ಲಾಭ ಪಡೆಯದ ಶಾಯ್ ಹೋಪ್ 3 ಬೌಂಡರಿ, 1 ಸಿಕ್ಸರ್ ಸಹಾಯದಿಂದ 32 ರನ್‌ ಬಾರಿಸಿದ್ದಾಗ ವರುಣ್‌ ಚಕ್ರವರ್ತಿಗೆ ವಿಕೆಟ್‌ ಒಪ್ಪಿಸಿದರು.

ವೆಸ್ಟ್‌ ಇಂಡೀಸ್‌ ತಂಡದ ಮಧ್ಯಮ ಕ್ರಮಾಂಕದ ಬೆನ್ನೆಲುಬು ಎಂದೇ ಖ್ಯಾತಿ ಪಡೆದಿರುವ ಶಿಮ್ರೋನ್ ಹೆಟ್ಮೆಯರ್ 1 ಬೌಂಡರಿ, 2 ಸಿಕ್ಸರ್ ಬಾರಿಸಿ 27 ರನ್ ಬಾರಿಸಿದ್ದಾಗ ಇಲ್ಲದ ಹೊಡೆತಕ್ಕೆ ಮುಂದಾಗಿ ಜಸ್ಪ್ರಿತ್ ಬುಮ್ರಾ ತೋಡಿದ ಖೆಡ್ಡಾಗೆ ಬಲಿಯಾದರು. ಇನಿಂಗ್ಸ್‌ನ 12ನೇ ಓವರ್‌ನಲ್ಲಿ ಜಸ್ಪ್ರೀತ್‌ ಬುಮ್ರಾ ಐದನೇ ಎಸೆತದಲ್ಲಿ ರೋಸ್ಟನ್‌ ಚೇಸ್ ಬಿಗ್ ಹಿಟ್ ಬಾರಿಸಲು ಹೋಗಿ ಸೂರ್ಯಕುಮಾರ್ ಯಾದವ್ ಅವರಿಗೆ ವಿಕೆಟ್‌ ಒಪ್ಪಿಸಿದರು. ಶೆರ್ಫೇನ್ ರುದರ್ಫೋರ್ಡ್ (14) ಬಂದು ಹೋಗುವ ಸಂಪ್ರದಾಯವನ್ನು ಮುಗಿಸಿದರು.

119 ರನ್‌ಗಳಿಗೆ 4 ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ತಂಡಕ್ಕೆ ಅನುಭವಿ ಜೇಸನ್‌ ಹೋಲ್ಡರ್ ಮತ್ತು ರೋವ್‌ಮನ್ ಪೊವೆಲ್ ಜೋಡಿ ಭರ್ಜರಿ ಜೊತೆಯಾಟದ ಕಾಣಿಕೆ ನೀಡಿತು. ಈ ಜೋಡಿ ಡೆತ್ ಓವರ್‌ಗಳಲ್ಲಿ ಬಿಗ್ ಹಿಟ್‌ಗಳನ್ನು ಬಾರಿಸಿ ತಂಡದ ಮೊತ್ತವನ್ನು ಹಿಗ್ಗಿಸುತ್ತಾ ಸಾಗಿದರು. ಈ ಜೋಡಿ ಇನಿಂಗ್ಸ್‌ನ 16ನೇ ಓವರ್‌ನಲ್ಲಿ 24 ರನ್‌ ಸಿಡಿಸಿ ಅಬ್ಬರಿಸಿತು. ಅಲ್ಲದೆ 17ನೇ ಓವರ್‌ನಲ್ಲಿ 14 ರನ್‌, 18ನೇ ಓವರ್‌ನಲ್ಲಿ 12 ರನ್‌ ಸಿಡಿಸಿದ ಹೋಲ್ಡರ್ ಹಾಗೂ ಪಾವೆಲ್ ಜೋಡಿ ರನ್‌ ವೇಗಕ್ಕೆ ಚುರುಕು ಮುಟ್ಟಿಸಿತು.

ಪಾವೆಲ್‌ ಅಬ್ಬರ

ರೋವ್‌ಮನ್‌ ಪಾವೆಲ್‌ 19 ಎಸೆತಗಳಲ್ಲಿ ಅಜೇಯ 34 ರನ್‌ ಸಿಡಿಸಿತು. ಇವರ ಅಮೋಘ ಇನಿಂಗ್ಸ್‌ನಲ್ಲಿ 3 ಬೌಂಡರಿ, 2 ಸಿಕ್ಸರ್ ಬಾರಿಸಿ ಮಿಂಚಿದರು. ಆಲ್‌ರೌಂಡರ್ ಜೇಸನ್‌ ಹೋಲ್ಡರ್‌ ಅಜೇಯ 37 ರನ್‌ ಸಿಡಿಸಿದರು. ಈ ವೇಳೆ 2 ಬೌಂಡರಿ, 3 ಸಿಕ್ಸರ್‌ ಚಚ್ಚಿದರು. ಅಂತಿಮವಾಗಿ ವಿಂಡೀಸ್‌ 20 ಓವರ್‌ಗಳಲ್ಲಿ 4 ವಿಕೆಟ್‌ಗೆ 195 ರನ್‌ ಸೇರಿಸಿತು.

ಭಾರತದ ಪರ ಜಸ್ಪ್ರೀತ್ ಬುಮ್ರಾ 36 ರನ್‌ ನೀಡಿ 2 ವಿಕೆಟ್‌ ಪಡೆದರು. ಹಾರ್ದಿಕ್ ಪಾಂಡ್ಯ, ವರುಣ್‌ ಚಕ್ರವರ್ತಿ ತಲಾ 1 ವಿಕೆಟ್‌ ಕಬಳಿಸಿದರು.