T20 World Cup 2024: ಭಾರತ ವಿರುದ್ಧ ಸೋತರೆ ಪಾಕಿಸ್ತಾನ 2024ರ ಟಿ20 ವಿಶ್ವಕಪ್‌ನಿಂದಲೇ ಔಟ್?

2024ರ ಐಸಿಸಿ ಟಿ20 ವಿಶ್ವಕಪ್‌ನ ಗುಂಪು-ಹಂತದ ಹೈ-ವೋಲ್ಟೇಜ್ ಪಂದ್ಯದಲ್ಲಿ ರೋಹಿತ್ ಶರ್ಮಾ ನಾಯಕತ್ವದ ಭಾರತ ತಂಡವು ಇದೇ ಭಾನುವಾರದಂದು ನ್ಯೂಯಾರ್ಕ್‌ನಲ್ಲಿ ತಮ್ಮ ಸಾಂಪ್ರದಾಯಿಕ ಎದುರಾಳಿ ಬಾಬರ್ ಅಜಂ ನಾಯಕತ್ವದ ಪಾಕಿಸ್ತಾನ ತಂಡವನ್ನು ಎದುರಿಸಲಿದೆ.

ಜೂನ್ 9ರಂದು ಬಹು ನಿರೀಕ್ಷಿತ ಪಂದ್ಯಕ್ಕೂ ಮುನ್ನ ಪಾಕಿಸ್ತಾನ ತಂಡವು ಭಾರತ ವಿರುದ್ಧ ಸೋತರೆ ಏನಾಗಲಿದೆ ಎಂಬುದನ್ನು ತಿಳಿಸಲು ಮೈಖೇಲ್ ಕನ್ನಡ ಉತ್ಸುಕವಾಗಿದೆ.

ಪಾಕಿಸ್ತಾನ ತಂಡವನ್ನು ಭಾರತ ಸೋಲಿಸಿದರೆ ಏನಾಗಲಿದೆ?

ಜೂನ್ 6ರಂದು ಡಲ್ಲಾಸ್‌ನಲ್ಲಿ ನಡೆದ ಸೂಪರ್-ಓವರ್ ಥ್ರಿಲ್ಲರ್‌ ಪಂದ್ಯದಲ್ಲಿ ಆತಿಥೇಯ ಯುಎಸ್‌ಎ ವಿರುದ್ಧ ಆಘಾತಕಾರಿ ಸೋಲು ಅನುಭವಿಸುವ ಮೂಲಕ ಈ ನಿರ್ಣಾಯಕ ಪಂದ್ಯಕ್ಕೆ ಪಾಕಿಸ್ತಾನ ತಂಡದ ಪ್ರಯಾಣವು ಕಳವಳಕಾರಿಯಾಗಿದೆ.

2024ರ ಟಿ20 ವಿಶ್ವಕಪ್‌ನಲ್ಲಿ ಸತತ ಎರಡನೇ ಗೆಲುವು ಪಡೆದಿರುವ ಯುಎಸ್‌ಎ ತಂಡದ ವಿರುದ್ಧದ ಸೋಲು ಪಾಕಿಸ್ತಾನ ತಂಡದ ಸೂಪರ್ 8ರ ಹಂತಕ್ಕೆ ಮುನ್ನಡೆಯುವ ಅವಕಾಶಕ್ಕೆ ಕಲ್ಲು ಬಿದ್ದಿದೆ.

ಗುಂಪಿನ ಅಗ್ರ ಎರಡು ತಂಡಗಳು ಮುಂದಿನ ಸುತ್ತಿಗೆ ಮುನ್ನಡೆಯುತ್ತವೆ. ಭಾರತ ಮತ್ತು ಪಾಕಿಸ್ತಾನ ತಂಡಗಳು ಯುಎಸ್‌ಎ, ಕೆನಡಾ ಮತ್ತು ಐರ್ಲೆಂಡ್‌ ತಂಡಗಳೊಂದಿಗೆ ಎ ಗುಂಪಿನಲ್ಲಿ ಸ್ಥಾನ ಪಡೆದಿವೆ.

ಯುಎಸ್ಎ ಮತ್ತು ಕೆನಡಾ ತಂಡಗಳಿಗೆ ಇದು ಮೊದಲ ಟಿ20 ವಿಶ್ವಕಪ್ ಪ್ರದರ್ಶನವಾಗಿದೆ ಮತ್ತು ಐರ್ಲೆಂಡ್ ಕಡಿಮೆ ಶ್ರೇಯಾಂಕದ ತಂಡವಾಗಿರುವುದರಿಂದ, ಭಾರತ ಮತ್ತು ಪಾಕಿಸ್ತಾನ ತಂಡಗಳು ಆರಾಮವಾಗಿ ಮುಂದಿನ ಹಂತಕ್ಕೆ ಮುನ್ನಡೆಯುವ ನಿರೀಕ್ಷೆಯಿದೆ. ಆದರೆ, ಪಾಕಿಸ್ತಾನದ ಆಘಾತಕಾರಿ ಸೋಲು ಭಾನುವಾರದ ಪಂದ್ಯದ ಕುತೂಹಲವನ್ನು ಗಣನೀಯವಾಗಿ ಹೆಚ್ಚಿಸಿದೆ.

ಒಂದು ವೇಳೆ ಪಾಕಿಸ್ತಾನ ತಂಡವು ಭಾರತ ವಿರುದ್ಧ ಸೋತರೆ, ಸೂಪರ್ 8ರ ಹಂತದಲ್ಲಿ ಸ್ಥಾನ ಪಡೆಯುವ ಭಾರೀ ಸವಾಲನ್ನು ಎದುರಿಸಬೇಕಾಗುತ್ತದೆ.

ಮುಂದಿನ ಒಂದೇ ಒಂದು ಸೋಲು ಪಾಕಿಸ್ತಾನ ತಂಡದ ಸಂಭಾವ್ಯ ಅಂಕಗಳನ್ನು 4ಕ್ಕೆ ಮಿತಿಗೊಳಿಸುತ್ತದೆ. ಆದರೆ ಯುಎಸ್ಎ ತನ್ನ ಉಳಿದ ಎರಡು ಪಂದ್ಯಗಳಲ್ಲಿ ಒಂದು ಗೆಲುವಿನೊಂದಿಗೆ ಆರು ಅಂಕಗಳನ್ನು ತಲುಪಬಹುದು. ಅದು ಮುಂದಿನ ಸುತ್ತಿಗೆ ಅವರ ಮುನ್ನಡೆಯನ್ನು ಖಚಿತಪಡಿಸುತ್ತದೆ.

ಈ ಸನ್ನಿವೇಶವು ಪಾಕಿಸ್ತಾನ ತಂಡವನ್ನು ಮೊದಲ ಸುತ್ತಿನ ಎಲಿಮಿನೇಷನ್‌ನ ಅಂಚಿನಲ್ಲಿ ಇಡುತ್ತದೆ. ಆಗ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಪಾಕಿಸ್ತಾನ ಎಂದಿಗೂ ಎದುರಿಸದ ದುರಾದೃಷ್ಷಕರವಾಗಲಿದೆ. ಇಂತಹ ಫಲಿತಾಂಶವು ನಾಯಕ ಬಾಬರ್ ಅಜಂ ನಾಯಕತ್ವದ ಪಾಕಿಸ್ತಾನ ತಂಡಕ್ಕೆ ಭಾರೀ ಹಿನ್ನಡೆಯಾಗಲಿದೆ.

ಇದಕ್ಕೆ ವ್ಯತಿರಿಕ್ತವಾಗಿ, ಐರ್ಲೆಂಡ್ ವಿರುದ್ಧದ ಗೆಲುವಿನೊಂದಿಗೆ ತನ್ನ ಅಭಿಯಾನ ಆರಂಭಿಸಿದ ಟೀಮ್ ಇಂಡಿಯಾ ಬಲಿಷ್ಠವಾಗಿದೆ ಮತ್ತು ಮುಂಬರುವ ಪಾಕಿಸ್ತಾನ ವಿರುದ್ಧದ ಹಣಾಹಣಿಯಲ್ಲಿ ಗೆಲ್ಲುವ ನೆಚ್ಚಿನ ತಂಡವಾಗಿದೆ.

ಭಾರತ ತಂಡದ ಇನ್ನೊಂದು ಗೆಲುವು ಗುಂಪಿನಲ್ಲಿ ಅವರ ಸ್ಥಾನವನ್ನು ಗಟ್ಟಿಗೊಳಿಸುವುದಲ್ಲದೆ, ಸೂಪರ್ 8ಕ್ಕೆ ಅರ್ಹತೆ ಪಡೆಯುವ ಪಾಕಿಸ್ತಾನದ ಭರವಸೆಯನ್ನು ತೀವ್ರವಾಗಿ ಹಳ್ಳ ಹಿಡಿಸುತ್ತದೆ.

ಹೀಗಾಗಿ, ಪಾಕಿಸ್ತಾನ ತಂಡಕ್ಕೆ ಮುಂದಿನ ಪಂದ್ಯಗಳು ನಿರ್ಣಾಯಕವಾಗಿರಲಿವೆ. ಭಾನುವಾರದಂದು ಭಾರತ ವಿರುದ್ಧದ ಸೋಲು ಪಾಕಿಸ್ತಾನ ತಂಡವನ್ನು ಪಂದ್ಯಾವಳಿಯಿಂದ ಆರಂಭಿಕ ನಿರ್ಗಮನಕ್ಕೆ ಕಾರಣವಾಗಬಹುದು.