Women's Asia Cup 2024: ಮಹಿಳಾ ಏಷ್ಯಾ ಕಪ್ ವೇಳಾಪಟ್ಟಿ ಪ್ರಕಟ; ಭಾರತ vs ಪಾಕಿಸ್ತಾನ ಪಂದ್ಯ ಯಾವಾಗ?

ಮಂಗಳವಾರ, ಮಾರ್ಚ್ 26ರಂದು 2024ರ ಮಹಿಳಾ ಏಷ್ಯಾ ಕಪ್ ಪಂದ್ಯಾವಳಿಯ ವೇಳಾಪಟ್ಟಿಯನ್ನು ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ಎಸಿಸಿ) ಘೋಷಿಸಿದೆ. ಕಾಂಟಿನೆಂಟಲ್ ಟೂರ್ನಿ ಮುಂಬರುವ ಜುಲೈನಲ್ಲಿ ನಡೆಯಲಿದೆ. ಸೆಪ್ಟೆಂಬರ್-ಅಕ್ಟೋಬರ್‌ನಲ್ಲಿ ಟಿ20 ವಿಶ್ವಕಪ್‌ಗೆ ಕೇವಲ ಎರಡು ತಿಂಗಳುಗಳ ಮೊದಲಾಗಿದೆ.

ಮಹಿಳಾ ಏಷ್ಯಾ ಕಪ್ ಪಂದ್ಯಾವಳಿಯು ಜುಲೈ 19ರಿಂದ 28ರವರೆಗೆ ಶ್ರೀಲಂಕಾದ ದಂಬುಲ್ಲಾದಲ್ಲಿ ನಡೆಯಲಿದ್ದು, ಪಂದ್ಯಾವಳಿಯ ಇತಿಹಾಸದಲ್ಲಿ ಮೊದಲ ಬಾರಿಗೆ 8 ತಂಡಗಳು ಭಾಗವಹಿಸುತ್ತವೆ.

ಹಾಲಿ ಚಾಂಪಿಯನ್ ಭಾರತ ಮಹಿಳಾ ತಂಡ ಎ ಗುಂಪಿನಲ್ಲಿ ಪಾಕಿಸ್ತಾನ, ನೇಪಾಳ ಮತ್ತು ಯುಎಇ ಜೊತೆಗೆ ಡ್ರಾ ಮಾಡಿಕೊಂಡಿದೆ.

ಇನ್ನೊಂದು ಗುಂಪಿನಲ್ಲಿ ಬಾಂಗ್ಲಾದೇಶ, ಮಲೇಷ್ಯಾ, ಶ್ರೀಲಂಕಾ ಮತ್ತು ಥಾಯ್ಲೆಂಡ್ ತಂಡಗಳು ಸೇರಿವೆ. ಕೋವಿಡ್-19 ಸಾಂಕ್ರಾಮಿಕ ರೋಗದಿಂದಾಗಿ ಮುಂದೂಡಲ್ಪಟ್ಟ ನಂತರ, ನಡೆದ ಪಂದ್ಯಾವಳಿಯ 2022 ಆವೃತ್ತಿಯಲ್ಲಿ ಕೇವಲ 7 ತಂಡಗಳು ಭಾಗವಹಿಸಿದ್ದವು.

""ಹೆಚ್ಚಿನ ತಂಡಗಳ ಭಾಗವಹಿಸುವಿಕೆಯು ಈ ಪಂದ್ಯಾವಳಿಯನ್ನು ಇನ್ನಷ್ಟು ಸ್ಪರ್ಧಾತ್ಮಕವಾಗಿಸುತ್ತದೆ ಮತ್ತು ಖಂಡದಾದ್ಯಂತದ ಕ್ರಿಕೆಟ್ ಅಭಿಮಾನಿಗಳಿಗೆ ರೋಮಾಂಚನಕಾರಿಯಾಗಿದೆ''.

""ಕ್ರಿಕೆಟ್‌ನಲ್ಲಿ ಒಳಗೊಳ್ಳುವಿಕೆ ಮತ್ತು ಸಮಾನತೆಗಾಗಿ ಎಸಿಸಿಯ ದೃಷ್ಟಿಗೆ ಅನುಗುಣವಾಗಿ, ಹಿಂದಿನ ಆವೃತ್ತಿಯಲ್ಲಿ ಇದನ್ನು ಯಶಸ್ವಿಯಾಗಿ ಜಾರಿಗೊಳಿಸಿದ ನಂತರ, 2024ರ ಮಹಿಳಾ ಏಷ್ಯಾ ಕಪ್‌ನಲ್ಲಿ ಎಲ್ಲಾ ಮಹಿಳಾ ರೆಫರಿಗಳು ಮತ್ತು ಅಂಪೈರ್‌ಗಳನ್ನು ಹೊಂದುವ ಸಂಪ್ರದಾಯವನ್ನು ಮುಂದುವರಿಸುತ್ತದೆ,'' ಎಸಿಸಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಏಷ್ಯಾ ಕಪ್‌ನ 7 ಬಾರಿ ಚಾಂಪಿಯನ್ ಆಗಿರುವ ಭಾರತ ತಂಡವು ಜುಲೈ 19ರಂದು ಯುಎಇ ವಿರುದ್ಧ ಅಭಿಯಾನ ಪ್ರಾರಂಭಿಸುತ್ತದೆ ಮತ್ತು ಜುಲೈ 23ರಂದು ನೇಪಾಳವನ್ನು ಎದುರಿಸುವ ಮೊದಲು ಜುಲೈ 21ರಂದು ಬದ್ಧ ಎದುರಾಳಿ ಪಾಕಿಸ್ತಾನ ತಂಡವನ್ನು ಎದುರಿಸಲಿದೆ.

ಪ್ರತಿ ಗುಂಪಿನಿಂದ ಅಗ್ರ ಎರಡು ತಂಡಗಳು ಜುಲೈ 26ರಂದು ಸೆಮಿಫೈನಲ್‌ಗೆ ಅರ್ಹತೆ ಪಡೆಯುತ್ತವೆ. ಬಳಿಕ ಪಂದ್ಯಾವಳಿಯ ಫೈನಲ್ ಪಂದ್ಯವು ಜುಲೈ 28ರಂದು ನಡೆಯಲಿದೆ.

ಮಹಿಳಾ ಏಷ್ಯಾ ಕಪ್ 2024 ರ ಸಂಪೂರ್ಣ ವೇಳಾಪಟ್ಟಿ

ಜುಲೈ 19: ಭಾರತ vs ಯುಎಇ, ಪಾಕಿಸ್ತಾನ vs ನೇಪಾಳ
ಜುಲೈ 20: ಮಲೇಷ್ಯಾ vs ಥಾಯ್ಲೆಂಡ್, ಶ್ರೀಲಂಕಾ vs ಬಾಂಗ್ಲಾದೇಶ
ಜುಲೈ 21: ನೇಪಾಳ vs ಯುಎಇ, ಭಾರತ vs ಪಾಕಿಸ್ತಾನ
ಜುಲೈ 22: ಶ್ರೀಲಂಕಾ vs ಮಲೇಷ್ಯಾ, ಬಾಂಗ್ಲಾದೇಶ vs ಥೈಲ್ಯಾಂಡ್
ಜುಲೈ 23: ಪಾಕಿಸ್ತಾನ vs ಯುಎಇ, ಭಾರತ vs ನೇಪಾಳ
ಜುಲೈ 24: ಬಾಂಗ್ಲಾದೇಶ vs ಮಲೇಷ್ಯಾ, ಶ್ರೀಲಂಕಾ vs ಥಾಯ್ಲೆಂಡ್

ಜುಲೈ 26: ಸೆಮಿಫೈನಲ್
ಜುಲೈ 28: ಫೈನಲ್

ಹರ್ಮನ್‌ಪ್ರೀತ್ ಕೌರ್ ನಾಯಕತ್ವದ ಭಾರತ ತಂಡವು ಕಾಂಟಿನೆಂಟಲ್ ಪ್ರಾಬಲ್ಯವನ್ನು ಉಳಿಸಿಕೊಳ್ಳಲು ಉತ್ಸುಕವಾಗಿದೆ ಮತ್ತು ಮತ್ತೊಮ್ಮೆ ಏಷ್ಯನ್ ಚಾಂಪಿಯನ್ ಆಗಿ ಟಿ20 ವಿಶ್ವಕಪ್‌ಗೆ ಹೋಗಲು ಎದುರು ನೋಡಲಿದೆ.