ಮಹಿಳಾ ಟಿ20 ವಿಶ್ವಕಪ್: ಸ್ಟಫಾನಿ ಟೇಲರ್ ಆಟಕ್ಕೆ ಶರಣಾದ ಥೈಲ್ಯಾಂಡ್

ಪರ್ತ್, ಫೆಬ್ರವರಿ 22: ಪರ್ತ್‌ನಲ್ಲಿ ಶನಿವಾರ (ಫೆಬ್ರವರಿ 22) ನಡೆದ ಮಹಿಳಾ ಟಿ20 ವಿಶ್ವಕಪ್ ದ್ವಿತೀಯ ಪಂದ್ಯದಲ್ಲಿ ದುರ್ಬಲ ತೈಲ್ಯಾಂಡ್‌ ವಿರುದ್ಧ ವೆಸ್ಟ್ ಇಂಡೀಸ್ ವನಿತಾ ತಂಡ 7 ವಿಕೆಟ್ ಸುಲಭ ಜಯ ಗಳಿಸಿದೆ. ವಿಂಡೀಸ್ ನಾಯಕಿ ಸ್ಟಫಾನಿ ಟೇಲರ್ ಅಜೇಯ 26 ರನ್, 3 ವಿಕೆಟ್‌ ಕೂಡ ಪಡೆದು ಆಲ್ ರೌಂಡರ್ ಆಟ ಪ್ರದರ್ಶಿಸಿದರು.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಥೈಲ್ಯಾಂಡ್ ಮಹಿಳಾ ತಂಡ, ನನ್ನಪತ್ ಕೊಂಚರೋಯೆಂಕೈ 33, ನರುಮೋಲ್ ಚೈವಾಯಿ 13, ನಟ್ಟಕನ್ ಚಾಂಟಮ್ ಗಮನಾರ್ಹ 9 ರನ್ ಕೊಡುಗೆಯೊಂದಿಗೆ 20 ಓವರ್‌ಗೆ 9 ವಿಕೆಟ್‌ ಕಳೆದು ಕೇವಲ 78 ರನ್ ಕಲೆ ಹಾಕಲಷ್ಟೇ ಶಕ್ತವಾಯ್ತು.

ಗುರಿ ಬೆಂಬತ್ತಿದ ವೆಸ್ಟ್ ಇಂಡೀಸ್ ಮಹಿಳಾ ತಂಡ, ಹೇಲಿ ಮ್ಯಾಥ್ಯೂಸ್ 16, ಸ್ಟಫಾನಿ ಟೇಲರ್ ಅಜೇಯ 26, ಶೆಮೈನ್ ಕ್ಯಾಂಪ್ಬೆಲ್ಲೆ ಅಜೇಯ 25 ರನ್‌ ಸೇರ್ಪಡೆಯೊಂದಿಗೆ 16.4ನೇ ಓವರ್‌ಗೆ 3 ವಿಕೆಟ್ ನಷ್ಟದಲ್ಲಿ 80 ರನ್ ಪೇರಿಸಿ ಗೆಲುವನ್ನಾಚರಿಸಿತು.

ಥೈಲ್ಯಾಂಡ್ ಇನ್ನಿಂಗ್ಸ್‌ನಲ್ಲಿ ವಿಂಡೀಸ್‌ನ ಸ್ಟಫಾನಿ ಟೇಲರ್ ಕೇವಲ 13 ರನ್‌ಗೆ 3 ವಿಕೆಟ್‌ ಮುರಿದು ಎದುರಾಳಿ ತಂಡದ ಸೋಲಿಗೆ ಕಾರಣರಾದರು. ಸ್ಟಫಾನಿ ಪಂದ್ಯಶ್ರೇಷ್ಠೆ ಪ್ರಶಸ್ತಿಗೂ ಭಾಜನರಾದರು. ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ಸೆಣಸಾಡಿತ್ತು. ಇದರಲ್ಲಿ ಟೀಮ್ ಇಂಡಿಯಾ ವನಿತೆಯರು 17 ರನ್‌ ಗೆಲುವಿನೊಂದಿಗೆ ಶುಭಾರಂಭ ಕಂಡಿದ್ದರು.