ಕ್ರೋವ್ ನೆನಪಿಸಿದ ಕಿವೀಸ್ ಗೆಲುವಿನ ನಾಗಾಲೋಟ!

ಕೋಲ್ಕತ್ತಾ, ಮಾರ್ಚ್ 27: ಇತ್ತೀಚೆಗೆ ಕ್ಯಾನ್ಸರಿಗೆ ಬಲಿಯಾದ ನ್ಯೂಜಿಲೆಂಡ್ ನ ದಿಗ್ಗಜ ಮಾರ್ಟಿನ್ ಕ್ರೋವ್ ಅವರ ನೆನಪಿನಲ್ಲಿ ನ್ಯೂಜಿಲೆಂಡ್ ತಂಡ ಆಡುತ್ತಿದೆಯೆ? ಅವರಿಗೆ ಗೆಲುವಿನ ಅರ್ಪಣೆ ನೀಡುವಂತೆ ವಿಶ್ವ ಟಿ20 ಟೂರ್ನಿಯಲ್ಲಿ ಅಜೇಯವಾಗಿ ಲೀಗ್ ಹಂತವನ್ನು ಮುಗಿಸಿ ಸೆಮಿಫೈನಲ್ ಗೆ ಕಿವೀಸ್ ಸಿದ್ಧವಾಗುತ್ತಿದೆ.

ವಿಶ್ವ ಟಿ20: ತಂಡಗಳು | ವೇಳಾಪಟ್ಟಿ | ಗ್ಯಾಲರಿ | ಟೂರ್ನಿಗೆ ಫುಲ್ ಗೈಡ್

ಬಾಂಗ್ಲಾದೇಶ ತಂಡವನ್ನು 75ರನ್ ಗಳಿಂದ ಬಗ್ಗು ಬಡಿದ ಕಿವೀಸ್ ಶನಿವಾರ (ಮಾರ್ಚ್ 26) ದಂದು ಈಡೆನ್ ಗಾರ್ಡರ್ನ್ಸ್ ನಲ್ಲಿ ವಿಜಯೋತ್ಸವ ಆಚರಿಸಿತು. ಈ ಮೂಲಕ ವಿಶ್ವಕಪ್ ಗಳಲ್ಲಿ ಉತ್ತಮ ಪ್ರದರ್ಶನ ನೀಡುವ ದಾಖಲೆಯನ್ನು ನ್ಯೂಜಿಲೆಂಡ್ ಉತ್ತಮ ಪಡಿಸಿಕೊಂಡಿದೆ.[ನ್ಯೂಜಿಲೆಂಡ್ ನ ಕ್ರಿಕೆಟ್ ದಿಗ್ಗಜ ಮಾರ್ಟಿನ್ ಕ್ರೋವ್ ಇನ್ನಿಲ್ಲ]

ಟಾಸ್ ಗೆದ್ದ ಕಿವೀಸ್, ಸತತವಾಗಿ ವಿಕೆಟ್ ಕಳೆದುಕೊಂಡರೂ 20 ಓವರ್ ಗಳಲ್ಲಿ 8 ವಿಕೆಟ್​ಗೆ 145 ಸ್ಕೋರ್ ಮಾಡಿತು. ಬಾಂಗ್ಲಾದೇಶ ಪರ ಎಡಗೈ ವೇಗಿ ಮುಸ್ತಾಫಿಜುರ್ ರೆಹಮಾನ್ 22ಕ್ಕೆ 5 ಪಡೆದು ಯಶಸ್ವಿ ಬೌಲರ್ ಎನಿಸಿದರು.

ಭಾರತ ವಿರುದ್ಧ ದಿಟ್ಟ ಹೋರಾಟ ನಡೆಸಿ ರೋಚಕ ಸೋಲು ಕಂಡಿದ್ದ ಬಾಂಗ್ಲಾದೇಶ ಈ ಮೊತ್ತವನ್ನು ತಲುಪುವ ನಿರೀಕ್ಷೆ ಬಾಂಗ್ಲಾ ಅಭಿಮಾನಿಗಳಲ್ಲಿತ್ತು. ಆದರೆ, ನ್ಯೂಜಿಲೆಂಡ್ ಪರ ಇಶ್ ಸೋಧಿ 21ಕ್ಕೆ3 ಹಾಗೂ ಗ್ರಾಂಟ್ ಎಲಿಯಟ್ 12ಕ್ಕೆ3 ಬೌಲಿಂಗ್ ದಾಳಿಗೆ ಸಿಲುಕಿ 15.4 ಓವರ್​ಗಳಲ್ಲಿ ಕೇವಲ 70 ರನ್ ಮೊತ್ತಕ್ಕೆ ಆಲೌಟ್ ಆಗಿ ಸೊಲೊಪ್ಪಿಕೊಂಡಿತು.

2015ರ ವಿಶ್ವ ಕಪ್ : ವಿಶ್ವಕಪ್ ಹಾಗೂ ವಿಶ್ವ ಟಿ20ಯಲ್ಲಿ ಲೀಗ್ ಹಂತದಲ್ಲಿ ಸೋಲು ಕಾಣದ ದಾಖಲೆಯನ್ನು ನ್ಯೂಜಿಲೆಂಡ್ ಹೊಂದಿದೆ. ಕಳೆದ ವಿಶ್ವಕಪ್ ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮಾತ್ರ ಬ್ರೆಂಡನ್ ಮೆಕಲಮ್ ಪಡೆ ಸೋಲು ಕಂಡಿತ್ತು.

1992ರ ವಿಶ್ವಕಪ್ : ಮಾರ್ಟಿನ್ ಕ್ರೋವ್ ನಾಯಕತ್ವದ ತಂಡ ಸತತವಾಗಿ ಏಳು ಪಂದ್ಯಗಳನ್ನು ಗೆದ್ದು ರೌಂಡ್ ರಾಬಿನ್ ಲೀಗ್ ನಲ್ಲಿ ಅಜೇಯವಾಗಿ ಉಳಿದುಕೊಂಡಿತ್ತು. ಪಾಕಿಸ್ತಾನ ವಿರುದ್ಧ ಮಾತ್ರ ಸೋಲು ಕಂಡಿತ್ತು. (ಒನ್ಇಂಡಿಯಾ ಸುದ್ದಿ)