ನಾಕೌಟ್ ಸುತ್ತಿಗೆ ಬ್ರೆಜಿಲ್ ಎಂಟ್ರಿ, ಚಿಲಿ ಜತೆ ಫೈಟ್

ಮೊದಲ ವಿಶ್ವಕಪ್ ನಲ್ಲೇ ನೇಮಾರ್ ಮಸ್ತ್ ಶೋ

ಮೊದಲ ವಿಶ್ವಕಪ್ ನಲ್ಲೇ ನೇಮಾರ್ ಸಕತ್ ಪ್ರದರ್ಶನ ನೀಡುತ್ತಿದ್ದು ನಾಲ್ಕು ಗೋಲು ಗಳಿಸಿದ್ದಾರೆ. ಈ ಪಂದ್ಯದಲ್ಲಿ 17ನೆ ನಿಮಿಷ ಹಾಗೂ 35ನೇ ನಿಮಿಷದಲ್ಲಿ ನೇಮಾರ್ ಗೋಲು ಗಳಿಸಿ ಮುನ್ನಡೆ ತಂದು ಕೊಟ್ಟರು.

ಮೊದಲ ಗೋಲಿಗೆ ಲೂಯಿಸ್ ಗುಸ್ಟವೋ ಪಾಸ್ ನೀಡಿದರೆ ಎರಡನೇ ಗೋಲಿಗೆ ಮಾರ್ಸೆಲೋ ಪಾಸ್ ನೀಡಿದ್ದನ್ನು ಬಾರ್ಸಿಲೋನದ ಸ್ಟಾರ್ ಆಟಗಾರ ಗೋಲಾಗಿಸಿದರು.

ಮತ್ತೆರಡು ಗೋಲು, ಕ್ಯಾಮರೂನ್ ಕಂಗಾಲು

ಡೇವಿಡ್ ಲೂಯಿಸ್ ಪಾಸ್ ಪಡೆದು ಫ್ರೆಡ್ ಪಂದ್ಯದ 49ನೇ ನಿಮಿಷದಲ್ಲಿ ಗೋಲು ಹೊಡೆದು ಗೋಲಿನ ಬರ ನೀಗಿಸಿಕೊಂಡರು. ಅಂತಿಮವಾಗಿ ಫರ್ನಾಂಡಿನ್ಹೋ ಅವರು ಆಸ್ಕರ್ ಸಹಾಯದಿಂದ ಪಂದ್ಯದ 84ನೇ ನಿಮಿಷ ಮತ್ತೊಂದು ಗೋಲು ಗಳಿಸಿ ಭರ್ಜರಿ ಜಯ ತಂದಿತ್ತರು.

ಅರಂಭದಲ್ಲಿ ಇದ್ದ ಶೂರತ್ವ ನಂತರ ಮಾಯ

ಕ್ಯಾಮರೂನ್ ಆಟಗಾರರು ಪಂದ್ಯದ 26ನೇ ನಿಮಿಷದಲ್ಲೆ 1-1ರ ಗೋಲು ಸಮನಾಗಿಸಿ ಕುಣಿದಾಡಿದರು. ಆದರೆ, ಆರಂಭದಲ್ಲಿದ್ದ ಶೂರತ್ವ ನಂತರ ಮಾಯವಾಯಿತು. ಕ್ಯಾಮರೂನ್ ಪರ ಜೋ ಮಾಟಿಪ್ ಅವರು ಅಲಾನ್ ಯಾನ್ ಪಾಸನ್ನು ಗೋಲಾಗಿಸಿದ್ದರು.

ಬ್ರೆಜಿಲ್ ಅಭಿಮಾನಿಗಳಿಗೆ ಭರಪೂರ ರಂಜನೆ

ಪಂದ್ಯದ 71ನೇ ನಿಮಿಷದ ತನಕ ಕಣದಲ್ಲಿದ್ದ ಸ್ಟಾರ್ ಆಟಗಾರ ನೇಮಾರ್ ಎರಡು ಗೋಲು ಗಳಿಸಿದ್ದಲ್ಲದೆ ಅದ್ಭುತ ಆಟ ಪ್ರದರ್ಶಿಸಿದರು. ಒಟ್ಟಾರೆ ಬ್ರೆಜಿಲ್ ಅಭಿಮಾನಿಗಳಿಗೆ ಭರಪೂರ ರಂಜನೆ ಸಿಕ್ಕಿತು.

ಬ್ರೆಜಿಲ್ -ಕ್ಯಾಮರೂನ್ ಪಂದ್ಯದ ಅಂಕಿ ಅಂಶ

ಕ್ಯಾಮರೂನ್ vs ಬ್ರೆಜಿಲ್
1 ಶಾಟ್ ಆನ್ ಟಾರ್ಗೆಟ್ 9
45% ಚಂಡಿನ ಹಿಡಿತ 55%
6 ಕಾರ್ನರ್ 7
14 ಫೌಲ್19
1 ಆಫ್ ಸೈಡ್3
3 ಬದಲಿ ಆಟಗಾರರು3
1 ಹಳದಿ ಕಾರ್ಡ್ 0

16ರ ಹಂತದಲ್ಲಿ ರೋಚಕ ಪಂದ್ಯ

16ರ ಹಂತದಲ್ಲಿ ರೋಚಕ ಪಂದ್ಯಗಳು ಕಾದಿದ್ದು, ಬ್ರೆಜಿಲ್ ಮೊದಲ ಪಂದ್ಯದಲ್ಲಿ ಚಿಲಿಯನ್ನು ಎದುರಿಸಲಿದೆ. ಕೊನೆ ಲೀಗ್ ಪಂದ್ಯದಲ್ಲಿ ನೆದರ್ಲೆಂಡ್ ವಿರುದ್ಧ ಚಿಲಿ 2-0 ಅಂತರದಿಂದ ಸೋಲು ಕಂಡಿರುವ ಕಾರಣ ಬ್ರೆಜಿಲ್ ವಿರುದ್ಧ ಸೆಣಸಬೇಕಾಗಿದೆ.

ನೆದರ್ಲೆಂಡ್ ವಿರುದ್ಧ ಮೆಕ್ಸಿಕೋ ಸೆಣಸಲಿದೆ. ಕ್ರೊವೆಷಿಯಾ ವಿರುದ್ಧ ಮೆಕ್ಸಿಕೋ 1-3 ಅಂತರದ ಗೆಲುವು ದಾಖಲಿಸಿದೆ.

100ನೇ ಪಂದ್ಯದಲ್ಲಿ 100ನೇ ಗೋಲು

ಎರಡನೇ ಗೋಲು ದಾಖಲಿಸುತ್ತಿದ್ದಂತೆ ವಿಶ್ವಕಪ್ ನಲ್ಲಿ ಸಾರ್ವಕಾಲಿಕ ಹೆಚ್ಚು ಗೋಲು ದಾಖಲಿಸಿದ ಬ್ರೆಜಿಲ್ ವೀರರ ಪಟ್ಟಿಗೆ ನೇಮಾರ್ ಸೇರ್ಪಡೆಗೊಂಡರು.ಬ್ರೆಜಿಲ್ಲಿನ 100ನೇ ಪಂದ್ಯದಲ್ಲಿ 100ನೇ ಗೋಲು ದಾಖಲಿಸಿದ ಕೀರ್ತಿಗೂ ಲಭಿಸಿತು.

ಬ್ರೆಜಿಲ್ಲಿನ ಅತ್ಯಧಿಕ ಗೋಲು ದಾಖಲೆ ವೀರ

ಪೀಲೆ, ಜಿಕೋ, ರೊನಾಲ್ಡೋ, ರೊಮಾರಿಯೋ, ಬೆಬೆಟೋ ನಂತರದ ಸ್ಥಾನದಲ್ಲಿ ನೇಮಾರ್ ಇದ್ದಾರೆ. 22 ವರ್ಷದ ನೇಮಾರ್ 52 ಪಂದ್ಯಗಳಿಂದ 35 ಗೋಲು ದಾಖಲಿಸಿದ್ದಾರೆ.