ಅರ್ಜೆಂಟೀನಾ- ನೈಜೀರಿಯಾ ಪಂದ್ಯ ಇಂದು: ಮೆಸ್ಸಿ ಮೇಲಿದೆ ಎಲ್ಲರ ಕಣ್ಣು

ನೈಜೀರಿಯಾಕ್ಕೆ ಡ್ರಾ ಸಾಕು

ಐಸ್‌ಲ್ಯಾಂಡ್ ತಂಡವು ಕ್ರೊವೇಷಿಯಾ ಎದುರು ಸೋಲು ಅನುಭವಿಸಿದರೆ, ಎರಡನೆಯ ಹಂತಕ್ಕೆ ಪ್ರವೇಶಿಸಲು ನೈಜೀರಿಯಾ ತಂಡವು ಅರ್ಜೆಂಟೀನಾ ವಿರುದ್ಧ ಡ್ರಾ ಸಾಧಿಸಿದರೂ ಸಾಕು.

ಆದರೆ, ನೈಜೀರಿಯಾದ ವಿಲಿಯಮ್ ಟ್ರೂಸ್ಟ್ ಎಕಾಂಗ್, ಎದುರಾಳಿ ತಂಡದ ಬಗ್ಗೆ ಚಿಂತೆಗೀಡಾಗಿದ್ದಾರೆ. ಒಂದು ವೇಳೆ ಮೆಸ್ಸಿ ಲಯ ಕಂಡುಕೊಂಡರೆ ಸಮಸ್ಯೆ ಖಚಿತ. ಆದರೆ ಅದಾಗದಂತೆ ನೋಡಿಕೊಳ್ಳಲು ಪ್ರಯತ್ನಿಸುತ್ತೇವೆ ಎಂದಿದ್ದಾರೆ ಅವರು.

ನಾವು ಉತ್ತಮ ಆಟಗಾರರಿರುವ ಪ್ರಬಲ ತಂಡವನ್ನು ಎದುರಿಸಿರುವುದು ಇದೇ ಮೊದಲೇನಲ್ಲ. ನಮ್ಮ ಪ್ರಯತ್ನವನ್ನು ನಾವು ಮಾಡುತ್ತೇವೆ. ನಮಗೆ ಸಾಕಷ್ಟು ಅವಕಾಶಗಳಿವೆ ಎಂದಿದ್ದಾರೆ ಎಕಾಂಗ್.

ಅಹ್ಮದ್ ಮೂಸಾ

ಐಸ್‌ಲ್ಯಾಂಡ್ ವಿರುದ್ಧ ಎರಡು ಗೋಲುಗಳನ್ನು ಬಾರಿಸಿ ಪರಾಕ್ರಮ ತೋರಿದ್ದ ಅಹ್ಮದ್ ಮೂಸಾ, ನೈಜೀರಿಯಾ ತಂಡ ನೆಚ್ಚಿಕೊಂಡಿರುವ ಪ್ರತಿಭೆ. ಅದೇ ಆಟವನ್ನು ಅವರು ಅರ್ಜೆಂಟೀನಾ ವಿರುದ್ಧ ಪ್ರದರ್ಶಿಸಿದರೆ ಮೆಸ್ಸಿಯ ಚಾಕಚಕ್ಯತೆಗೆ ಸವಾಲೊಡ್ಡಬಹುದು.

ಲಿಯೊನಲ್ ಮೆಸ್ಸಿ

ಈಗ ತಾನೆ ವಿಶ್ವಕಪ್‌ಗೆ ಕಾಲಿಟ್ಟಿರುವ ಐಸ್‌ಲೆಂಡ್‌ ವಿರುದ್ಧದ ಪೆನಾಲ್ಟಿ ಕೊಡುಗೆಯನ್ನು ಗೋಲ್ ಆಗಿ ಪರಿವರ್ತಿಸುವುದರಲ್ಲಿ ಎಡವಿದ ಮೆಸ್ಸಿ, ಅರ್ಜೆಂಟೀನಾದ ಫುಟ್ಬಾಲ್ ಪ್ರಿಯರ ಕಣ್ಣಲ್ಲಿ ಈಗಾಗಲೇ ತಪ್ಪಿತಸ್ಥನಾಗಿದ್ದಾರೆ.

ಕ್ರೊವೇಷಿಯಾ ವಿರುದ್ಧವೂ ತಂಡದ ಗೋಲ್‌ಕೀಪರ್ ಮತ್ತು ಡಿಫೆಂಡರ್‌ಗಳ ಯಡವಟ್ಟಿನಿಂದ ಹೀನಾಯ ಸೋಲು ಎದುರಾಯಿತು. ಇದು ಮೆಸ್ಸಿ ಪಾಲಿಗೆ ಅತಿ ಮಹತ್ವದ ಪಂದ್ಯ. ಸೋತರೆ ಮೆಸ್ಸಿ ಪಾಲಿಗೆ ವಿಶ್ವಕಪ್‌ನಲ್ಲಿ ಇದೇ ಕೊನೆಯ ಪಂದ್ಯವಾಗಬಹುದು.

ಕೋಚ್ ವಿರುದ್ಧ ಅಸಮಾಧಾನ?

ಗುರುವಾರದ ಪಂದ್ಯದಲ್ಲಿ ಆಘಾತಕಾರಿ ಸೋಲು ಅನುಭವಿಸಿದ್ದಕ್ಕೆ 1986ರ ಫುಟ್ಬಾಲ್ ವಿಶ್ವಕಪ್ ವಿಜೇತ ಡಿಯಾಗೊ ಮರಡೋನಾ ಕೋಚ್ ಜಾರ್ಜ್ ಸಂಪೋಲಿ ಮತ್ತು ಅವರ ತಂತ್ರಗಳನ್ನು ಕಟುವಾಗಿ ಟೀಕಿಸಿದ್ದಾರೆ.

ಇದರ ಬೆನ್ನಲ್ಲೇ ಅರ್ಜೆಂಟೀನಾದ ಆಟಗಾರರು ಸಂಪೋಲಿ ವಿರುದ್ಧ ಅಸಮಾಧಾನಗೊಂಡಿದ್ದಾರೆ ಎಂಬ ಮಾಧ್ಯಮ ವರದಿಗಳನ್ನು ಅಲ್ಲಿನ ಫುಟ್ಬಾಲ್ ಸಂಸ್ಥೆ ಅಧ್ಯಕ್ಷ ಕ್ಲೌಡಿಯೊ ಟಾಪಿಯಾ ಅಲ್ಲಗಳೆದಿದ್ದಾರೆ.

ಕೋಚಿಂಗ್ ಸಿಬ್ಬಂದಿ ಅಭ್ಯಾಸದಲ್ಲಿ ಮಾರ್ಗದರ್ಶನ ನೀಡುತ್ತಿರುವುದನ್ನು ಮಾಧ್ಯಮಗಳು ನೋಡಿವೆ. ತಂಡಕ್ಕೆ ತರಬೇತಿ ನೀಡುತ್ತಿರುವುದನ್ನು ಗಮನಿಸಿದ್ದಾರೆ. ಆದರೂ ಸುಳ್ಳುಗಳನ್ನು ಹೇಳುತ್ತಿದ್ದಾರೆ. ಅವರು ತಮ್ಮ ಕಾರ್ಯ ಏನು ಎಂಬುದನ್ನು ಮರೆಯಬಾರದು. ನಾವು ಅವರಿಂದ ಬೆಂಬಲವನ್ನು ಬಯಸುತ್ತೇವೆ ಎಂದು ಅವರು ಹೇಳಿದ್ದಾರೆ.

ಪ್ರಮುಖ ಅಂಕಿ ಅಂಶಗಳು

* ಅರ್ಜೆಂಟೀನಾ-ನೈಜೀರಿಯಾ ಮುಖಾಮುಖಿಯ ಎಂಟು ಪಂದ್ಯಗಳ ಪೈಕಿ ನಾಲ್ಕು ಪಂದ್ಯ ವಿಶ್ವಕಪ್‌ನಲ್ಲಿ ನಡೆದಿವೆ. ಈ ನಾಲ್ಕರಲ್ಲಿಯೂ ಅರ್ಜೆಂಟೀನಾ ಗೆಲುವು ಸಾಧಿಸಿತ್ತು.

* ವಿಶ್ವಕಪ್ ಫೈನಲ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಅರ್ಜೆಂಟೀನಾ ಮೊದಲ ಸುತ್ತಿನಲ್ಲಿ ಗೆಲುವು ಕಂಡಿಲ್ಲ.

* 1998ರ ಬಳಿಕ ವಿಶ್ವಕಪ್‌ನಲ್ಲಿ ಸತತ ಎರಡು ಗೆಲುವು ಕಾಣಲು ನೈಜೀರಿಯಾ ಸಜ್ಜುಗೊಂಡಿದೆ. ಮೂರು ಅಂಕಗಳು ಅದರ ನಾಲ್ಕನೆಯ ನಾಕ್‌ಔಟ್ ಹಂತದ ಪ್ರವೇಶವನ್ನು ದೃಢಪಡಿಸಲಿದೆ.

* ಈ ಬಾರಿಯ ವಿಶ್ವಕಪ್‌ನಲ್ಲಿ ಮೆಸ್ಸಿ 12 ಶಾಟ್‌ಗಳನ್ನು ಬಾರಿಸಿದ್ದಾರೆ. ಆದರೆ, ಒಂದೂ ಗೋಲು ಪಡೆಯಲು ಯಶಸ್ವಿಯಾಗಿಲ್ಲ.

* ನೈಜೀರಿಯಾದ ಮೂಸಾ ವಿಶ್ವಕಪ್‌ನಲ್ಲಿ ನಾಲ್ಕು ಗೋಲ್ ಬಾರಿಸುವ ಮೂಲಕ ದೇಶದ ಸಾರ್ವಕಾಲಿಕ ಅತ್ಯಧಿಕ ಸ್ಕೋರರ್ ಎನಿಸಿಕೊಂಡಿದ್ದಾರೆ.