ಒಡಿಶಾಕ್ಕೆ ಮತ್ತೆ ಸೋಲಿನ ಆಘಾತ, ಗೋವಾಕ್ಕೆ ಸತತ ಎರಡನೇ ಜಯ

ಸತತ ಜಯದ ನಿರೀಕ್ಷೆಯಲ್ಲಿ ಗೋವಾ

ಹೀರೋ ಇಂಡಿಯನ್ ಸೂಪರ್ ಲೀಗ್ ನ 25ನೇ ಪಂದ್ಯದಲ್ಲಿ ಎಫ್ ಸಿ ಗೋವಾ ತಂಡ ಒಡಿಶಾ ವಿರುದ್ಧ ತನ್ನ ಸತತ ಎರಡನೇ ಜಯ ಗಳಿಸುವ ಉದ್ದೇಶದಿಂದ ಅಂಗಣಕ್ಕಿಳಿಯಿತು. ಈ ಋತುವಿನಲ್ಲಿ ಉತ್ತಮ ಆರಂಭ ಕಾಣದ ಭುವನೇಶ್ವರ ಮೂಲದ ಕ್ಲಬ್, ಅಂಕಪಟ್ಟಿಯಲ್ಲಿ ಕೊನೆಯಿಂದ ಎರಡನೇ ಸ್ಥಾನದಲ್ಲಿದೆ. ಆಡಿರುವ ನಾಲ್ಕು ಪಂದ್ಯಗಳಲ್ಲಿ ಒಡಿಶಾ ಗೋಲ್ ಬಾಕ್ಸ್ ಕಡೆಗೆ ಗುರಿ ಮಾಡಿದ್ದೆ ಕಡಿಮೆ. ಇದರಿಂದಾಗಿ ಸ್ಟುವರ್ಟ್ ಬಾಕ್ಸ್ಟರ್ ತಂಡ ಗಳಿಸಿದ್ದು ಕೇವಲ ಒಂದು ಅಂಕ.

ದೌರ್ಬಲ್ಯವನ್ನು ಸಾಬೀತುಪಡಿಸಿದಂತಾಗಿದೆ

ಇದು ಎದುರಾಳಿ ತಂಡದಲ್ಲಿ ಗೋಲು ಗಳಿಸುವ ಆತಂಕವನ್ನು ಕಡಿಮೆ ಮಾಡಿದೆಯಲ್ಲದೆ, ತಂಡದ ದೌರ್ಬಲ್ಯವನ್ನು ಸಾಬೀತುಪಡಿಸಿದಂತಾಗಿದೆ. ಇದು ಇದುವರೆಗೂ ನಡೆದಿರುವ ಪಂದ್ಯಗಳಿಗೆ ಮಾತ್ರ ಅನ್ವಯಿಸುತ್ತದೆ. ತಂಡ ಗಳಿಸಿದ ಎರಡು ಗೋಲು ಜೆಮ್ಷೆಡ್ಪುರ ವಿರುದ್ಧದ 2-2 ಡ್ರಾ ಪಂದ್ಯದಲ್ಲಿ. ಜೆಮ್ಷೆಡ್ಪುರ ಕೇವಲ 10 ಆಟಗಾರರಿಂದ ಕೂಡಿದ ಸಂದರ್ಭ ಅದಾಗಿತ್ತು. ಎರಡೂ ಗೋಲುಗಳನ್ನು ಡಿಗೊ ಮೌರಿಸಿಯೊ ಗಳಿಸಿದ್ದರು. ಚೆಂಡನ್ನು ಹೆಚ್ಚು ಕಾಲ ನಿಯಂತ್ರಿಸುವ ಮತ್ತು ತಮ್ಮದೇ ವಲಯದಲ್ಲಿ ಎದುರಾಳಿಯನ್ನು ಕಟ್ಟಿ ಹಾಕುವ ಸಾಮರ್ಥ್ಯ ಹೊಂದಿರುವ ಗೋವಾ ತಂಡ ಒಡಿಶಾ ಪಾಲಿಗೆ ಅಪಾಯ ಎನಿಸುವುದು ಸಹಜ.

ಪ್ರಸಕ್ತ ಋತುವಿನಲ್ಲಿ ತನ್ನ ಮೊದಲ ಜಯ

ಕೇರಳ ಬ್ಲಾಸ್ಟರ್ಸ್ ವಿರುದ್ಧ 3-1 ಗೋಲುಗಳ ಅಂತರದಲ್ಲಿ ಯಶಸ್ಸು ಕಾಣುವ ಮೂಲಕ ಗೋವಾ ತಂಡ ಪ್ರಸಕ್ತ ಋತುವಿನಲ್ಲಿ ತನ್ನ ಮೊದಲ ಜಯ ಗಳಿಸಿತ್ತು. ಲೀಗ್ ನಲ್ಲಿ ಅತಿ ಹೆಚ್ಚು ಗೋಲು ಗಳಿಸಿರುವವರಲ್ಲಿ ಒಬ್ಬರಾಗಿರುವ ಐಗರ್ ಆಂಗುಲೋ ಅದೇ ರೀತಿಯಲ್ಲಿ ತಮ್ಮ ಪ್ರದರ್ಶನ ತೋರುವರೆಂಬ ನಂಬಿಕೆ ಕೋಚ್ ಜುವಾನ್ ಫೆರಾಂಡೊ ಅವರಿಗೆ. ಆರು ಗೋಲುಗಳನ್ನು ಓಪನ್ ಪ್ಲೇಯಲ್ಲಿ ಗಳಿಸಿರುವ ಗೋವಾ ಒಂದು ಗೋಲನ್ನು ಎದುರಾಳಿ ತಂಡಕ್ಕೆ ಓಪನ್ ಪ್ಲೇ ಮೂಲಕ ನೀಡಿದೆ.