ಐಎಸ್‌ಎಲ್: ನಾರ್ತ್‌ಈಸ್ಟ್‌ ವಿರುದ್ಧ 'ಡ್ರಾ'ಗೆ ತೃಪ್ತಿಪಟ್ಟ ಬೆಂಗಳೂರು ಎಫ್‌ಸಿ

ಗಾಲೆಗೊ ನೀಡಿದ ಪಾಸ್‌ನ ಲಾಭ

ಪಂದ್ಯದ ಮೊದಲ ಅವಧಿಯಲ್ಲಿ ಮಿಡ್‌ಫೀಲ್ಡರ್‌ ಲೂಯಿಸ್ ಮಷಾಡೊ ಅದ್ಭುತ ಆಟ ಪ್ರದರ್ಶಿಸಿ ಸಹ ಆಟಗಾರ ಗಾಲೆಗೊ ನೀಡಿದ ಪಾಸ್‌ನ ಸಂಪೂರ್ಣ ಲಾಭ ಪಡೆದುಕೊಂಡು 27ನೇ ನಿಮಿಷದಲ್ಲಿ ನಾರ್ತ್‌ಈಸ್ಟ್‌ ತಂಡಕ್ಕೆ ಆರಂಭಿಕ ಮುನ್ನಡೆ ಒದಗಿಸಿಕೊಟ್ಟರು. ಬಳಿಕ ರಕ್ಷಣಾತ್ಮಕ ಆಟವಾಡಿದ ನಾರ್ತ್‌ಈಸ್ಟ್‌ ತಂಡ ಮೊದಲಾರ್ಧದ ಮುಕ್ತಾಯಕ್ಕೆ ಈ ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು.

ಆಕ್ರಮಣಕಾರಿ ಆಟಕ್ಕೆ ಮುಂದಾಯಿತು

ದ್ವಿತೀಯಾರ್ಧದಲ್ಲಿ ಎಚ್ಚೆತ್ತುಕೊಂಡ ಬಿಎಫ್‌ಸಿ ಆರಂಭದಲ್ಲೇ ತನ್ನ ತಂತ್ರಗಾರಿಕೆಯಲ್ಲಿ ಬದಲಾವಣೆ ತಂದು ಆಕ್ರಮಣಕಾರಿ ಆಟಕ್ಕೆ ಮುಂದಾಯಿತು. ಪರಿಣಾಮ ಪಂದ್ಯ ಶುರುವಾದ ನಾಲ್ಕೇ ನಿಮಿಷಗಳಲ್ಲಿ ಸಮಬಲದ ಗೋಲ್‌ ದಾಖಲಾಯಿತು. ಸಹ ಆಟಗಾರ ದಿಮಾಸ್‌ ನೀಡಿದ ಪಾಸ್‌ ಅನ್ನು ಅದ್ಭುತವಾಗಿ ಸ್ವೀಕರಿಸಿದ ರಾಹುಲ್‌ ಬೆಕೆ ಚೆಂಡನ್ನು ಗೋಲ್‌ ಪೆಟ್ಟಿಗೆಯೊಳಗೆ ಸೇರಿಸಿ ಬಿಎಫ್‌ಸಿ ಪರ ಆಪತ್ಬಾಂಧವನಾದರು. 49ನೇ ನಿಮಿಷದಲ್ಲಿ ದಾಖಲಾದ ಈ ಗೋಲ್‌ ಬಿಎಫ್‌ಸಿಗೆ ಇನ್ನಿಲ್ಲದ ಆತ್ಮವಿಶ್ವಾಸ ತಂದುಕೊಟ್ಟಿತು.

ಗೋಲ್‌ಗಾಗಿ 11 ಪ್ರಯತ್ನ

ಪಂದ್ಯದಲ್ಲಿ ನಾರ್ತ್‌ಈಸ್ಟ್‌ ತಂಡ ಚೆಂಡಿನ ಮೇಲಿನ ನಿಯಂತ್ರಣವನ್ನು ಶೇ. 38 ರಷ್ಟು ಕಾಯ್ದುಕೊಂಡರೂ ಕೂಡ ಗೋಲ್‌ ಗಳಿಕೆಯ ಸಲುವಾಗಿ 11 ಬಾರಿ ಪ್ರಯತ್ನ ಮಾಡಿತ್ತು. ಇದರಲ್ಲಿ ನಾಲ್ಕು ಬಾರಿ ಚೆಂಡು ಗುರಿಯತ್ತ ಸಾಗಿತ್ತು ಕೂಡ. ಮತ್ತೊಂದೆಡೆ ಶೇ. 62 ರಷ್ಟು ನಿಯಂತ್ರಣ ಸಾಧಿಸಿದ್ದ ಬೆಂಗಳೂರು ಎಫ್‌ಸಿ ಇದರ ಪೂರ್ಣ ಲಾಭ ಪಡೆಯುವಲ್ಲಿ ವಿಫಲವಾಯಿತು. 10 ಬಾರಿ ಗೋಲ್‌ ಗಳಿಸವ ಪ್ರಯತ್ನ ನಡೆಸಿ ಕೇವಲ ಮೂರು ಬಾರಿ ಮಾತ್ರವೇ ಚೆಂಡನ್ನು ಗುರಿಯತ್ತ ಮುನ್ನುಗ್ಗುವಂತೆ ಮಾಡಿತ್ತು. ಒಟ್ಟಾರೆ ಗೆಲ್ಲುವ ಉತ್ತಮ ಅವಕಾಶವನ್ನು ಬಿಎಫ್‌ಸಿ ಈ ಪಂದ್ಯದಲ್ಲಿ ಕೈಚೆಲ್ಲಿದೆ.