10-20 ಶೇಕಡಾ ವೇತನ ಕಡಿತಕ್ಕೆ ರಿಯಲ್ ಮ್ಯಾಡ್ರಿಡ್ ಆಟಗಾರರ ಒಪ್ಪಿಗೆ

ಮ್ಯಾಡ್ರಿಡ್, ಏಪ್ರಿಲ್ 9: ರಿಯಲ್ ಮ್ಯಾಡ್ರಿಡ್ ಆಟಗಾರರು ಮತ್ತು ಸಿಬ್ಬಂದಿ ಈವರ್ಷ 10ರಿಂದ 20 ಶೇಕಡಾ ವೇತನ ಕಡಿತಕ್ಕೆ ಸ್ವಯಂಪ್ರೇರಣೆಯಿಂದ ಒಪ್ಪಿಕೊಂಡಿದ್ದಾರೆ. ಕೊರೊನಾವೈರಸ್ ಸೋಂಕಿನ ಭೀತಿಯಿಂದಾಗಿ ಯಾವುದೇ ಫುಟ್ಬಾಲ್ ಟೂರ್ನಿಗಳನ್ನು ನಡೆಸಲಾಗುತ್ತಿಲ್ಲ. ಹೀಗಾಗಿ ಕ್ಲಬ್‌ಗಳು ಆರ್ಥಿಕ ಸಂಕಷ್ಟದಲ್ಲಿವೆ.

ಆಟಗಾರರು ಮತ್ತು ಸಿಬ್ಬಂದಿ ವೇತನ ಕಡಿತಕ್ಕೆ ಸ್ವಯಂ ಒಪ್ಪಿಗೆ ನೀಡಿರುವುದನ್ನು ಬುಧವಾರ (ಏಪ್ರಿಲ್ 8) ಲಾ ಲಿಗಾ ತನ್ನ ಅಧಿಕೃತ ಹೇಳಿಕೆಯ ಮೂಲಕ ತಿಳಿಸಿದೆ. ಕಡಿತವಾಗಲಿರುವ ನಿಖರ ಹಣದ ಮೌಲ್ಯ ಎಷ್ಟಾಗಲಿದೆ ಅನ್ನೋದು 2019-20ರ ಸೀಸನ್‌ನ ಸಂದರ್ಭಗಳಿಗೆ ಅನುಗುಣವಾಗಿ ನಿರ್ಧಾರವಾಗಲಿದೆ ಎಂದು ಕ್ಲಬ್ ಹೇಳಿದೆ.

ವೇತನ ಕಡಿತಕ್ಕೆ ಸಂಬಂಧಿಸಿದ ನಿರ್ಧಾರದ ಕುರಿತು ಕ್ಲಬ್‌ನ ನಾಯಕ ಸೆರ್ಗಿಯೋ ರಾಮೋಸ್ ಮತ್ತು ನಿರ್ದೇಶಕರೊಡನೆ ಮಾತುಕತೆ ನಡೆಸುವುದಾಗಿ ಕ್ಲಬ್ ತಿಳಿಸಿದೆ. ಉಳಿದ ನೌಕರರ ವೇತನ ಕಡಿತದ ನಿರ್ಧಾರವನ್ನು ಕಾದಿರಿಸಲಾಗಿದೆ ಎಂದೂ ಕ್ಲಬ್ ಹೇಳಿಕೊಂಡಿದೆ.

ಸ್ಪೇನ್‌ನಲ್ಲಿ ಮಾರಕ ಕೊರೊನಾವೈರಸ್‌ನಿಂದಾಗಿ ಸಾವಿಗೀಡಾದವರ ಸಂಖ್ಯೆ 14,555ಕ್ಕೇರಿದೆ. ಸೋಂಕಿನ ಭೀತಿಯಿಂದಾಗಿ ವಿಶ್ವದಲ್ಲೇ ಜನಪ್ರಿಯ ಫುಟ್ಬಾಲ್ ಟೂರ್ನಿ ಎನಿಸಿರುವ ಲಾ ಲಿಗಾ ರದ್ದಾಗಿದೆ. ರದ್ದಾಗಿರುವ ಟೂರ್ನಿ ಯಾವಾಗ ಶುರುವಾಗಲಿದೆ ಅನ್ನೋದು ಇನ್ನೂ ಸ್ಪಷ್ಟಗೊಂಡಿಲ್ಲ.