ಹಾಕಿ: ಐರ್ಲೆಂಡ್ ವಿರುದ್ಧ ಚಾಂಪಿಯನ್ ಆಸ್ಟ್ರೇಲಿಯಾಕ್ಕೆ ಪ್ರಾಯಾಸದ ಜಯ

ಭುವನೇಶ್ವರ್, ನವೆಂಬರ್ 30: ಭುವನೇಶ್ವರ್ ನ ಕಳಿಂಗ ಸ್ಟೇಡಿಯಂನಲ್ಲಿ ಶುಕ್ರವಾರ (ನವೆಂಬರ್ 30) ನಡೆದ ಪುರುಷರ ಹಾಕಿ ವಿಶ್ವಕಪ್ ಬಿ ಗ್ರೂಪ್‌ನ ಪಂದ್ಯದಲ್ಲಿ ಐರ್ಲೆಂಡ್ ವಿರುದ್ಧ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ 2-1ರ ಪ್ರಾಯಾಸದ ಜಯ ಗಳಿಸಿದೆ.

ವಿಶ್ವ ನಂ. 1 ಆಸ್ಟ್ರೇಲಿಯಾ ತಂಡ ವಿಶ್ವ ನಂ.10ನೆಯ ಐರ್ಲೆಂಡನ್ನು ಸುಲಭವಾಗಿ ಸೋಲಿಸುವ ಯೋಜನೆಯಲ್ಲಿತ್ತು. ಆದರೆ ಐರ್ಲೆಂಡ್ ಸುಲಭವಾಗಿ ಸೋಲೊಪ್ಪಿಕೊಳ್ಳಲಿಲ್ಲ, ಬದಲಿಗೆ ಎದುರಾಳಿಗೆ ಭರ್ಜರಿ ಪೈಪೋಟಿ ನೀಡಿತು. ಹೀಗಾಗಿ ಗೋಲ್ ಅಂತರ 2-1ರಲ್ಲಿ ನಿಂತಿತು.

ಆಸ್ಟ್ರೇಲಿಯಾ ಪರ ಬ್ಲೇಕ್ ಗೋವರ್ಸ್ (11ನೇ ನಿಮಿಷದಲ್ಲಿ) ಮತ್ತು ಟಿಮ್ ಬ್ರಾಂಡ್ ಗೋಲ್ ಬಾರಿಸಿ ತಂಡದ ಗೆಲುವಿಗೆ ಕಾರಣರಾದರೆ, ಶೇನ್ ಒ ಡೊನೋಘು ಐರ್ಲೆಂಡ್ ಪರ ಒಂದು ಗೋಲ್ ಬಾರಿಸಿ ಸೋಲಿನ ಅಂತರವನ್ನು ಕಿರಿದುಗೊಳಿಸಿದರು. ಅಂತೂ ಪಂದ್ಯ ಉತ್ತಮ ಪೈಪೋಟಿಯೊಂದಿಗೆ ಸಾಗಿದ್ದು ಸುಳ್ಳಲ್ಲ.