ಎರಡನೇ ಏಷ್ಯನ್ ಗೇಮ್ಸ್‌ಗೆ ಆತಿಥ್ಯವಹಿಸಿದ ಮನಿಲಾ: ಕುತೂಹಲಕಾರಿ ಮಾಹಿತಿ

ಎರಡನೇ ಏಷ್ಯನ್ ಗೇಮ್ಸ್ ಆಯೋಜನೆಯಾಗಿದ್ದು 1954ರಲ್ಲಿ. ಫಿಲಿಫೈನ್ಸ್‌ನ ಮನಿಲಾ ಈ ಕ್ರೀಡಾಕೂಟದ ಆತಿಥ್ಯದ ಜವಾಬ್ಧಾರಿ ವಹಿಸಿಕೊಂಡಿತ್ತು. 1954ರ ಮೇ 1ರಂದು ಆರಂಭವಾದ ಈ ಕ್ರೀಡಾಕೂಟ 9ರಂದು ತೆರೆಕಂಡಿತ್ತು. ಏಷ್ಯನ್ ರಾಷ್ಟ್ರೀಯ ಒಲಿಂಪಿಕ್ ಸಮಿತಿಯ(ಎನ್‌ಒಸಿ) 19 ದೇಶಗಳ ಒಟ್ಟು 970 ಕ್ರೀಡಾಪಟುಗಳು ಈ ಕ್ರೀಡಾಕೂಟದಲ್ಲಿ ಭಾಗಿಯಾಗಿದ್ದರು. ಎಂಟು ಕ್ರೀಡೆಗಳ 76 ಸ್ಪರ್ಧೆಗಳಲ್ಲಿ ಈ ಕ್ರೀಡಾಪಟುಗಳು ಪದಕಕ್ಕಾಗಿ ಸೆಣೆಸಾಟ ನಡೆಸಿದ್ದರು.

ಎರಡನೇ ಏಷ್ಯನ್ ಗೇಮ್ಸನ್ನು ಔಪಚಾರಿಕವಾಗಿ ಫಿಲಿಫೈನ್ಸ್‌ನ ಅಧ್ಯಕ್ಷ ರಮೋನ್ ಮಾಗ್ಸಾಸಾಯ್ ಚಾಲನೆ ನೀಡಿದ್ದರು. ಸುಮಾರು 20,000 ಪ್ರೇಕ್ಷಕರ ಉಪಸ್ಥಿತಿಯಲ್ಲಿ ಅದ್ದೂರಿಯಾಗಿ ಉದ್ಘಾಟನಾ ಸಮಾರಂಭ ನಡೆದಿತ್ತು. ಆದರೆ ಈ ಬಾರಿ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್ ಸಮಿತಿ ಒಲಿಂಪಿಕ್ಸ್ ಕ್ರೀಡಾಕೂಟದ ಸಂಸ್ಕೃತಿಯನ್ನು ಉಳಿಸಿಕೊಳ್ಳಲು ಮನವಿ ಮಾಡಿದ್ದ ಕಾರಣ ಕ್ರೀಡಾಜ್ಯೋತಿಯನ್ನು ಈ ಕ್ರೀಡಾಕೂಟಕ್ಕೆ ಬಳಸಿರಲಿಲ್ಲ. ಆದರೆ 1958ರ ಕ್ರೀಡಾಕೂಟದಲ್ಲಿ ಮತ್ತೆ ಕ್ರೀಡಾಜ್ಯೋತಿಯನ್ನು ಬಳಸಿಕೊಳ್ಳಲಾಯಿತು.

Photo Credit: facebook

ಇನ್ನು ಈ ಕ್ರೀಡಾಕೂಟದಲ್ಲಿಯೂ ಜಪಾನ್ ಅತಿ ಹೆಚ್ಚು ಪದಕಗಳನ್ನು ಗೆದ್ದು ಪದಕಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಪಡೆಯಿತು. ಜಪಾನ್ ಈ ಬಾರಿ ಒಟ್ಟು 38 ಚಿನ್ನದ ಪದಕವನ್ನು ಗೆದ್ದುಕೊಂಡಿದ್ದರೆ 36 ಬೆಳ್ಳಿ ಪದಕ ಹಾಗೂ 24 ಕಂಚಿನ ಪದಕ ಗೆದ್ದುಕೊಂಡಿತ್ತು. ಈ ಮೂಲಕ ಒಟ್ಟು 98 ಪದಕಗಳು ಜಪಾನ್ ಪಾಲಾಗಿತ್ತು. ಆತಿಥೆಯ ಫಿಲಿಫೈನ್ಸ್ ಪದಕ ಪಟ್ಟಿಯಲ್ಲಿ ಎರಡನೇ ಸ್ಥಾನ ಪಡೆದುಕೊಂಡರೆ ದಕ್ಷಿಣ ಕೊರಿಯಾ ಮೂರನೇ ಸ್ಥಾನ ಪಡೆಯಿತು. ಪಾಕಿಸ್ತಾನ ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತ್ತು.

ಇನ್ನು ಭಾರತ ಈ ಬಾರಿ ಐದನೇ ಸ್ಥಾನಕ್ಕೆ ಕುಸಿದಿತ್ತು. ಮೊದಲ ಕ್ರೀಡಾಕೂಟದಲ್ಲಿ 15 ಚಿನ್ನದ ಪದಕ ಪಡೆದಿದ್ದ ಭಾರತ ಈ ಬಾರಿ 5 ಚಿನ್ನದ ಪದಕ ಮಾತ್ರವೇ ಗೆದ್ದುಕೊಂಡಿತ್ತು. ನಾಲ್ಕು ಬೆಳ್ಳಿ ಹಾಗೂ 8 ಕಂಚಿನ ಪದಕವನ್ನು ಗೆದ್ದುಕೊಂಡಿತ್ತು. ಈ ಮೂಲಕ 17 ಪದಕಗಳು ಭಾರತದ ಪಾಲಾಗಿದ್ದವು.