ಟೋಕಿಯೋ ಏಷ್ಯನ್ ಗೇಮ್ಸ್ 1958: 3ನೇ ಏಷ್ಯನ್ ಗೇಮ್ಸ್‌ನ ಪ್ರಮುಖ ಮಾಹಿತಿ

ಮೊದಲ ಎರಡನೆಯ ಏಷ್ಯನ್ ಗೇಮ್ಸ್‌ನ ಅದ್ಭುತ ಯಶಸ್ಸಿನ ಬಳಿಕ ಮೂರನೇ ಆವೃತ್ತಿಯ ಏಷ್ಯನ್ ಗೇಮ್ಸ್ ಕ್ರೀಡಾಕೂಟಕ್ಕೆ ಆತಿಥ್ಯವಹಿಸಿದ್ದು ಜಪಾನ್‌ನ ಟೋಕಿಯೋ ನಗರ. 1958ರಲ್ಲಿ ಈ ಕ್ರೀಡಾಕೂಟ ಅದ್ಧೂರಿಯಾಗಿ ಆಯೋಜನೆಯಿತು. 1958ರ ಮೇ 24ರಂದು ಆರಂಭವಾದ ಈ ಕ್ರೀಡಾಕೂಟ ಜೂನ್ 1ರಂದು ಸಮಾರೋಪಗೊಂಡಿತು.

ಈ ಬಾರಿ ಏಷ್ಯನ್ ರಾಷ್ಟ್ರೀಯ ಒಲಿಂಪಿಕ್ ಸಮಿತಿಯ(ಎನ್‌ಒಸಿ) 20 ದೇಶಗಳ ಒಟ್ಟು 1820 ಕ್ರೀಡಾಪಟುಗಳು ಈ ಕ್ರೀಡಾಕೂಟದಲ್ಲಿ ಭಾಗಿಯಾಗಿದ್ದರು. ಒಟ್ಟು ಹದಿಮೂರು ವಿಭಿನ್ನ ಕ್ರೀಡೆಗಳ 97 ಸ್ಪರ್ಧೆಗಳಲ್ಲಿ ಈ ಕ್ರೀಡಾಪಟುಗಳು ಪದಕಕ್ಕಾಗಿ ಸೆಣೆಸಾಟ ನಡೆಸಿದ್ದರು. ಇದರಲ್ಲಿ ನಾಲ್ಕು ಒಲಿಂಪಿಕ್ಸ್‌ನಲ್ಲಿ ಇಲ್ಲದ ಕ್ರೀಡೆಗಳು ಕೂಡ ಸೇರಿದ್ದವು. ಅವೆಂದರೆ ಜೂಡೋ, ಟೇಬಲ್ ಟೆನಿಸ್, ಟೆನಿಸ್ ಹಾಗೂ ವಾಲಿಬಾಲ್.

Photo Credit: twitter

ಟೋಕಿಯೋ 1958 ಕ್ರೀಡಾಕೂಟದ ಉದ್ಘಾಟನಾ ಸಮಾರಂಭವನ್ನು 24 ಮೇ 1958 ರಂದು ರಾಷ್ಟ್ರೀಯ ಒಲಿಂಪಿಕ್ ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿತ್ತು. ಈ ಅದ್ದೂರಿ ಸಮಾರಂಭದಲ್ಲಿ ಗಣ್ಯರು ಮತ್ತು ಅತಿಥಿಗಳು ಜಪಾನ್‌ನ ಚಕ್ರವರ್ತಿ ಹಿರೋಹಿಟೊ, ಕ್ರೌನ್ ಪ್ರಿನ್ಸ್ ಅಕಿಹಿಟೊ ಮತ್ತು ಇರಾನ್‌ನ ಶಾ ಮೊಹಮ್ಮದ್ ರೆಜಾ ಪಹ್ಲವಿ ಈ ಉದ್ಘಾಟನಾ ಸಮಾರಭದಲ್ಲಿ ಭಾಗಿಯಾಗಿದ್ದರು. ಅಲ್ಲದೆ ಈ ಕಾರ್ಯಕ್ರಮಕ್ಕೆ ಸುಮಾರು 70,000 ಜನರು ನೇರವಾಗಿ ಸಾಕ್ಷಿಯಾಗಿದ್ದರು.

ಮೊದಲ ಎರಡು ಕ್ರೀಡಾಕೂಟಗಳಂತೆಯೇ ಜಪಾನ್ ಈ ಕ್ರೀಡಾಕೂಟದಲ್ಲಿಯೂ ಪದಕಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಪಡೆದುಕೊಂಡಿತು. ಬಹುತೇಕ ಏಕಪಕ್ಷೀಯವಾಗಿಯೇ ಈ ಕ್ರೀಡಾಕೂಟದಲ್ಲಿ ಪ್ರಭುತ್ವ ಸಾಧಿಸಿದ ಜಪಾನ್ 67 ಚಿನ್ನದ ಪದಕವನ್ನು ಮುಡಿಗೇರಿಸಿಕೊಂಡರೆ 41 ಬೆಳ್ಳಿ ಹಾಗೂ 30 ಕಂಚಿನ ಪದಕ ಗೆದ್ದುಕೊಂಡಿತ್ತು. ಎರಡನೇ ಸ್ಥಾನದಲ್ಲಿದ್ದ ಫಿಲಿಫೈನ್ಸ್ 8 ಚಿನ್ನದ ಪದಕ 19 ಬೆಳ್ಳಿ ಹಾಗೂ 21 ಕಂಚಿನ ಪದಕ ಗೆದ್ದುಕೊಂಡಿತ್ತು.

ಮೂರನೇ ಸ್ಥಾನದಲ್ಲಿ ದಕ್ಷಿಣ ಕೊರಿಯಾ ಇದ್ದರೆ ಇರಾನ್ ನಾಲ್ಕು ಮತ್ತು ರಿಪಬ್ಲಿಕ್ ಆಫ್ ಚೀನಾ(ತೈವಾನ್) ಐದನೇ ಸ್ಥಾನವನ್ನು ಪಡೆದುಕೊಂಡಿತು. ಇನ್ನು ಭಾರತ ಈ ಬಾರಿ ಮತ್ತಷ್ಟು ಕುಸಿತ ಕಂಡು 7ನೇ ಸ್ಥಾನಕ್ಕೆ ಕುಸಿಯಿತು. ಪಾಕಿಸ್ತಾನ ಈ ಬಾರಿಯೂ ಭಾರತಕ್ಕಿಂತ ಒಂದು ಸ್ಥಾನಗಳ ಮುಂದಿತ್ತು. ಭಾರತ ಐದು ಚಿನ್ನ, ನಾಲ್ಕು ಬೆಳ್ಳಿ ಹಾಗೂ ನಾಲ್ಕು ಕಂಚಿನ ಪದಕವನ್ನು ಗೆದ್ದುಕೊಂಡಿತ್ತು.