ಮೇರಿ ಕೋಮ್ ಗೆ ಐದನೇ ಬಾರಿಗೆ ಏಷ್ಯನ್ ಚಾಂಪಿಯನ್ ಶಿಪ್ ಕಿರೀಟ

ಬೆಂಗಳೂರು, ನವೆಂಬರ್ 08 : ಐದು ಬಾರಿ ವಿಶ್ವ ಚಾಂಪಿಯನ್ ಭಾರತದ ಸ್ಟಾರ್ ಬಾಕ್ಸಿಂಗ್ ಆಟಗಾರ್ತಿ ಎಂಸಿ ಮೇರಿ ಕೋಮ್ ಅವರು ಏಷ್ಯನ್ ಮಹಿಳಾ ಬಾಕ್ಸಿಂಗ್ ಚಾಂಪಿಯನ್ ಶಿಪ್ ಗೆದ್ದುಕೊಂಡಿದ್ದಾರೆ.

ವಿಯೆಟ್ನಾಂನಲ್ಲಿ ಮಂಗಳವಾರ ನಡೆದ ಏಷ್ಯಾ ಮಹಿಳಾ ಬಾಕ್ಸಿಂಗ್ ಚಾಂಪಿಯನ್ ಶಿಪ್ ಸೆಮಿ ಫೈನಲ್‌ ಪಂದ್ಯದಲ್ಲಿ ಭಾರತದ ಮೇರಿ ಕೋಮ್ ಜಪಾನಿನ ತುಬಸ ಕುಮುರ ಅವರನ್ನು 5-0 ಅಂತರದಿಂದ ಮಣಿಸಿ ಫೈನಲ್ ಪ್ರವೇಶಿಸಿದ್ದರು.

ಅಂತಿಮ ಹಣಾಹಣಿಯಲ್ಲಿ ಎಂಸಿ ಮೇರಿ ಕೋಮ್ ಅವರು 48 ಕೆಜಿ ವಿಭಾಗದಲ್ಲಿ ಕೋರಿಯಾದ ಕಿಮ್ ಹ್ಯಾಂಗ್ ಮಿ ವಿರುದ್ಧ ಬುಧವಾರದಂದು 5-0 ಅಂತರದಲ್ಲಿ ಭರ್ಜರಿ ಜಯ ದಾಖಲಿಸಿದರು.

35 ವರ್ಷದ ರಾಜ್ಯಸಭೆ ಸದಸ್ಯೆಯಾಗಿರುವ ಮೇರಿ ಕೋಮ್, ಒಲಿಂಪಿಕ್ ನಲ್ಲಿ ಕಂಚು ಪದಕ ಜಯಿಸಿದ್ದಾರೆ. ವಿಯೆಟ್ನಾಂನ ಹೋ ಚೋ ಮಿನ್ ಸಿಟಿಯಲ್ಲಿ ಐದನೇ ಬಾರಿಗೆ ಏಷ್ಯನ್ ಚಾಂಪಿಯನ್ ಶಿಪ್ ಬಾಕ್ಸಿಂಗ್ ಕಿರೀಟಕ್ಕೆ ಮುತ್ತಿಟ್ಟಿದ್ದಾರೆ.