ಮಲ್ಲೋರ್ಕಾ ಓಪನ್: ರಷ್ಯಾ ಬೆಡಗಿ ಮರಿಯಾ ಶರಪೋವಾ ಶುಭಾರಂಭ

ಮೆಜೋರ್ಕಾ, ಜೂನ್ 19: ಗಾಯದಿಂದ ಚೇಚರಿಸಿಕೊಂಡ ಬಳಿಕ ಟೆನಿಸ್ ಅಂಗಳಕ್ಕೆ ಮರಳಿರುವ ರಷ್ಯಾ ಬೆಡಗಿ, ಟೆನಿಸ್ ಸ್ಟಾರ್ ಮರಿಯಾ ಶರಪೋವಾ ಅವರು ಸ್ಪೇನ್‌ನಲ್ಲಿ ನಡೆಯುತ್ತಿರುವ ಮಲ್ಲೋರ್ಕಾ ಓಪನ್ ಟೆನಿಸ್ ಟೂರ್ನಿಯ ಆರಂಭಿಕ ಸುತ್ತಿನಲ್ಲಿ ಶುಭಾರಂಭ ಕಂಡಿದ್ದಾರೆ.

ಮಂಗಳವಾರ (ಜೂನ್ 18) ನಡೆದ ಮಹಿಳಾ ವಿಭಾಗದ ಸಿಂಗಲ್ಸ್‌ನಲ್ಲಿ ಶರಪೋವಾ ಅವರು ಸ್ಲೋವಾಕಿಯಾ ಆಟಗಾರ್ತಿ ವಿಕ್ಟೋರಿಯಾ ಕುಜ್ಮೋವಾ ಅವರನ್ನು 7-6 (10/8), 6-0ರ ಅಂತರದಿಂದ ಮಣಿಸಿ ದ್ವಿತೀಯ ಸುತ್ತಿಗೆ ಲಗ್ಗೆಯಿಟ್ಟಿದ್ದಾರೆ.

ಐದು ಬಾರಿಯ ಗ್ರ್ಯಾಂಡ್‌ಸ್ಲ್ಯಾಮ್ ಪ್ರಶಸ್ತಿ ವಿಜೇತೆ ಮರಿಯಾ, ಜನವರಿಯಿಂದಲೂ ಪಂದ್ಯವನ್ನಾಡಿರಲಿಲ್ಲ. ಭುಜದ ನೋವಿಗೀಡಾಗಿದ್ದ ಶರಪೋವಾ ಸದ್ಯ ಚೇತರಿಸಿಕೊಂಡಿದ್ದಾರೆ. ದ್ವಿತೀಯ ಸುತ್ತಿನಲ್ಲಿ ಮರಿಯಾ, ಜರ್ಮನ್ ಬಲಿಷ್ಠೆ ಏಂಜೆಲಿಕ್ ಕೆರ್ಬರ್ ಅವರನ್ನು ಎದುರಿಸಲಿದ್ದಾರೆ.