ಸ್ಟಟ್ಗಾರ್ಟ್ ಓಪನ್: ಹೈಸೀ ಸೊ-ವೈಗೆ ಸೋಲುಣಿಸಿದ ನವೋಮಿ ಒಸಾಕಾ

ಬರ್ಲಿನ್, ಏಪ್ರಿಲ್ 25: ಜರ್ಮನಿಯಲ್ಲಿ ನಡೆಯುತ್ತಿರುವ ಸ್ಟಟ್ಗಾರ್ಟ್ ಓಪನ್ ಟೆನಿಸ್ ಟೂರ್ನಿಯ ಮೂಲಕ ಈ ಋತುವಿನ ಮೊದಲ ಕ್ಲೇ ಕೋರ್ಟ್ ಪಂದ್ಯವನ್ನಾಡಿದ ವಿಶ್ವ ನಂ.1 ಶ್ರೇಯಾಂಕಿತೆ ನವೋಮಿ ಒಸಾಕಾ, ಹೈಸೀ ಸೊ-ವೈ ಸೋಲಿಸಿ ಮುನ್ನಡೆ ಸಾಧಿಸಿದ್ದಾರೆ.

ಗುರುವಾರ (ಏಪ್ರಿಲ್ 25) ನಡೆದ ಮಹಿಳಾ ಸಿಂಗಲ್ಸ್ ವಿಭಾಗದ ಆರಂಭಿಕ ಪಂದ್ಯದಲ್ಲಿ ಜಪಾನ್ ಆಟಗಾರ್ತಿ ಒಸಾಕಾ, ತೈವಾನ್ ಆಟಗಾರ್ತಿ ಸೊ-ವೈಯನ್ನು 6-4, 6-3ರ ನೇರ ಸೆಟ್‌ನಿಂದ ಹಿಮ್ಮೆಟ್ಟಿಸಿ ಕ್ವಾರ್ಟರ್ ಫೈನಲ್‌ಗೆ ಅರ್ಹತೆ ಗಿಟ್ಟಿಸಿಕೊಂಡರು.

ಯುಎಸ್ ಓಪನ್ ಮತ್ತು ಆಸ್ಟ್ರೇಲಿಯಾ ಓಪನ್ ಚಾಂಪಿಯನ್ 21ರ ಹರೆಯದ ಒಸಾಕಾ, ಎದುರಾಳಿ ಸೊ-ವೈ ಸೋಲಿಸಲು 84 ನಿಮಿಷಗಳ ಕಾಲಾವಕಾಶ ತೆಗೆದುಕೊಂಡರು. ಮುಂದಿನ ಹಂತದಲ್ಲಿ ಒಸಾಕಾ ಕ್ರೋವೇಷಿಯಾದ ಡೊನ್ನಾ ವೆಕಿಕ್ ಸವಾಲು ಸ್ವೀಕರಿಸಲಿದ್ದಾರೆ.