Paris Olympics 2024: ಭಾರತದ ಪುರುಷರ ಡಬಲ್ಸ್ ಜೋಡಿಯಾಗಿ ಬೋಪಣ್ಣ, ಬಾಲಾಜಿ ಆಯ್ಕೆ

ಅನುಭವಿ ಟೆನ್ನಿಸ್ ತಾರೆ ರೋಹನ್ ಬೋಪಣ್ಣ ಮತ್ತು ಎನ್ ಶ್ರೀರಾಮ್ ಬಾಲಾಜಿ ಅವರು 2024ರ ಪ್ಯಾರಿಸ್ ಒಲಿಂಪಿಕ್ಸ್‌ಗೆ ಪುರುಷರ ಡಬಲ್ಸ್ ವಿಭಾಗಕ್ಕಾಗಿ ಭಾರತದ ಆದ್ಯತೆಯ ಜೋಡಿಯಾಗಲಿದ್ದಾರೆ ಎಂದು ಅಖಿಲ ಭಾರತ ಟೆನ್ನಿಸ್ ಅಸೋಸಿಯೇಷನ್ (ಎಐಟಿಎ) ಗುರುವಾರ, ​​ಜೂನ್ 13ರಂದು ಪ್ರಕಟಿಸಿದೆ.

ವಿಶ್ವದ 4ನೇ ಶ್ರೇಯಾಂಕದ ರೋಹನ್ ಬೋಪಣ್ಣ ಅವರಿಗೆ ತಮ್ಮ ಜೋಡಿಯನ್ನು ಆಯ್ಕೆ ಮಾಡಲು ಅವಕಾಶ ನೀಡಲಾಯಿತು ಮತ್ತು ಅನುಭವಿ ಗ್ರ್ಯಾಂಡ್ ಸ್ಲಾಮ್ ಚಾಂಪಿಯನ್ ಕನ್ನಡಿಗ ರೋಹನ್ ಬೋಪಣ್ಣ ಅವರು ಶ್ರೀರಾಮ್ ಬಾಲಾಜಿ ಅವರನ್ನು ಆಯ್ಕೆ ಮಾಡಿಕೊಂಡರು. ಬಾಲಾಜಿ ಸದ್ಯ ವಿಶ್ವದ 67ನೇ ಶ್ರೇಯಾಂಕದಲ್ಲಿದ್ದಾರೆ.

ಎಐಟಿಎ ಅಧಿಕೃತ ಪ್ರಕಟಣೆಯ ಮೂಲಕ ಗುರುವಾರ ಈ ನಿರ್ಧಾರವನ್ನು ಪ್ರಕಟಿಸಿತು. ಇವರಿಬ್ಬರ ಜೊತೆ ಕೋಚ್ ಬಾಲಚಂದ್ರನ್ ಮಾಣಿಕ್ಕಾತ್ ಮತ್ತು ಫಿಸಿಯೋ ರೆಬೆಕಾ ವಿ ಒರ್ಶೆಗೆನ್ ಕೂಡ ಇರಲಿದ್ದಾರೆ. ಒಲಿಂಪಿಕ್ಸ್‌ನ ಪುರುಷರ ಡಬಲ್ಸ್ ವಿಭಾಗದಲ್ಲಿ ಟೆನ್ನಿಸ್ ಪದಕ ಗೆಲ್ಲಲು ಭಾರತಕ್ಕೆ ಉತ್ತಮ ಅವಕಾಶವಾಗಿದೆ.

"ರೋಹನ್ ಬೋಪಣ್ಣ ಮತ್ತು ಎನ್ ಶ್ರೀರಾಮ್ ಬಾಲಾಜಿ 2024ರ ಪ್ಯಾರಿಸ್ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದಿದ್ದಾರೆ ಎಂದು ಘೋಷಿಸಲು ನಾವು ಹೆಮ್ಮೆಪಡುತ್ತೇವೆ. ಕೋಚ್ ಬಾಲಚಂದ್ರನ್ ಮಾಣಿಕ್ಕಾತ್ ಮತ್ತು ಫಿಸಿಯೋ ರೆಬೆಕಾ ವಿ ಒರ್ಶೆಗೆನ್ ಅವರೊಂದಿಗೆ ಇರಲಿದ್ದಾರೆ. ನಾವು ವಿಶ್ವ ವೇದಿಕೆಯಲ್ಲಿ ಛಾಪು ಮೂಡಿಸಲು ಸಿದ್ಧರಿದ್ದೇವೆ," ಎಂದು ಎಐಟಿಎ ಎಕ್ಸ್ (ಟ್ವಿಟ್ಟರ್) ಖಾತೆಯಲ್ಲಿ ಬರೆದಿದೆ.

ಫ್ರೆಂಚ್ ಓಪನ್ ಮುಖಾಮುಖಿ

ರೋಹನ್ ಬೋಪಣ್ಣ ಮತ್ತು ಎನ್ ಶ್ರೀರಾಮ್ ಬಾಲಾಜಿ ಇಬ್ಬರೂ ಇತ್ತೀಚೆಗೆ 2024ರ ಫ್ರೆಂಚ್ ಓಪನ್‌ನಲ್ಲಿ ಪರಸ್ಪರ ಮುಖಾಮುಖಿಯಾದರು. ಬೋಪಣ್ಣ ಮತ್ತು ಅವರ ಆಸ್ಟ್ರೇಲಿಯಾದ ಜೊತೆಗಾರ ಮ್ಯಾಥ್ಯೂ ಎಬ್ಡೆನ್ ಅವರೊಂದಿಗೆ ಬಾಲಾಜಿ ಮತ್ತು ಮಿಗುಯೆಲ್ ರೆಯೆಸ್-ವರೆಲಾ ಜೋಡಿಯನ್ನು 3 ಸೆಟ್‌ಗಳ ಮುಖಾಮುಖಿಯಲ್ಲಿ ಸೋಲಿಸಿ ಸ್ಪರ್ಧೆಯ ಕ್ವಾರ್ಟರ್ ಫೈನಲ್‌ಗೆ ತಲುಪಿದರು.

ಇಂಡೋ-ಆಸ್ಟ್ರೇಲಿಯನ್ ಜೋಡಿಯು ಸೋಮವಾರ, ಜೂನ್ 3ರಂದು ಟೆನ್ನಿಸ್ ಕೋರ್ಟ್ 7ರಲ್ಲಿ ಎನ್ ಶ್ರೀರಾಮ್ ಬಾಲಾಜಿ ಮತ್ತು ಮಿಗುಯೆಲ್ ಏಂಜಲ್ ರೆಯೆಸ್-ವರೆಲಾ ಅವರನ್ನು 6-7 (2-7), 6-3, 7-6 (10-8) ಅಂತರದಿಂದ ಸೋಲಿಸಿದರು.

2 ಗಂಟೆ 20 ನಿಮಿಷಗಳ ನಂತರ, ರೋಹನ್ ಬೋಪಣ್ಣ ಮತ್ತು ಮ್ಯಾಥ್ಯೂ ಎಬ್ಡೆನ್ ಜೋಡಿಯು ಭಾರಿ ಸೋಲಿನಿಂದ ಪಾರಾದರು ಮತ್ತು ಕೊನೆಯಲ್ಲಿ ಗೆಲುವಿನ ನಗೆ ಬೀರಿದರು.

ಬೋಪಣ್ಣ ಮತ್ತು ಎಬ್ಡೆನ್ ಜೋಡಿ ಸ್ಪಷ್ಟವಾಗಿ ಪಂದ್ಯ ಗೆಲ್ಲುವ ಫೇವರಿಟ್ ಆಗಿತ್ತು. ಆದರೆ ಶ್ರೀರಾಮ್ ಬಾಲಾಜಿ ಮತ್ತು ಏಂಜಲ್ ರೆಯೆಸ್-ವರೆಲಾ ಪಂದ್ಯದ ಯಾವುದೇ ಹಂತದಲ್ಲೂ ಸುಲಭವಾಗಿ ಶರಣಾಗಲಿಲ್ಲ. ಆದರೆ ಕೊನೆಯಲ್ಲಿ ಬೋಪಣ್ಣ ಮತ್ತು ಎಬ್ಡೆನ್ ಪಂದ್ಯ ಗೆಲ್ಲಲು ತಮ್ಮ ಎಲ್ಲಾ ಅನುಭವವನ್ನು ಬಳಸಿದರು.