ಫೆಡರರ್ ವಿದಾಯದ ವೇಳೆ ನಡಾಲ್ ಕಣ್ಣೀರು: ಕ್ರೀಡೆಯ ಅತ್ಯಂತ ಸುಂದರ ಫೋಟೋ ಎಂದ ವಿರಾಟ್ ಕೊಹ್ಲಿ

ಫೆಡರರ್ ಜೊತೆ ನಡಾಲ್ ಕಣ್ಣೀರು

ರೋಜರ್ ಫೆಡರರ್ ಅವರ ವಿದಾಯದ ಪಂದ್ಯದ ಬಳಿಕ ಸ್ವತಃ ರೋಜರ್ ಫೆಡರರ್ ಹಾಗೂ ರಾಫೆಲ್ ನಡಾಲ್ ಕಣ್ಣೀರು ಹಾಕುತ್ತಿರುವ ಫೋಟೋ ಹಾಗೂ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ವೈರಲ್ ಆಗಿದೆ. ಈ ಭಾವನಾತ್ಮಕ ಫೋಟೋವನ್ನು ಹಂಚಿಕೊಂಡ ವಿರಾಟ್ ಕೊಹ್ಲಿ ತಾವು ಕುಡ ಭಾವನಾತ್ಮಕವಾಗಿ ಬರವೊಂದನ್ನು ಬರೆದುಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಅವರು ದಿಗ್ಗಜ ಆಟಗಾರರ ವೈರಲ್ ಫೋಟೋವನ್ನು ಹಂಚಿಕೊಂಡಿರುವ ಕೊಹ್ಲಿ ತನ್ನ ಪ್ರಕಾರ ಕ್ರೀಡಾ ಲೋಕದ ಅತ್ಯಂತ ಸುಂದರ ಫೋಟೋ ಎಂದಿದ್ದಾರೆ.

ಕೊಹ್ಲಿ ಭಾವುಕ ನುಡಿ

"ಪರಸ್ಪರ ಎದುರಾಳಿಗಳಿಗಳು ಇಷ್ಟು ಭಾವನಾತ್ಮಕವಾಗಿರುತ್ತಾರೆ ಎಂಬುದನ್ನು ಯಾರು ಯೋಚಿಸಲು ಸಾಧ್ಯ. ಕ್ರೀಡೆಯ ಸೌಂದರ್ಯವೇ ಇದು. ನನ್ನ ಪಾಲಿಗೆ ಇದೇ ಕ್ರೀಡೆಯ ಅತ್ಯಂತ ಸುಂದರವಾದ ಫೋಟೋ. ಎದುರಾಳಿ ಕೂಡ ನಿಮಗಾಗಿ ಕಣ್ಣೀರಿಡುತ್ತಾನೆ ಎಂದಾದರೆ ದೇವರು ನೀಡಿದ ಪ್ರತಿಭೆಯಲ್ಲಿ ಏನು ಮಾಡಲು ಸಾಧ್ಯ ಎಂಬುದು ತಿಳಿಯುತ್ತದೆ. ಹೇಳಲು ಬೆರೇನಿಲ್ಲ, ಆದರೆ ಇಬ್ಬರ ಮೇಲೂ ಬಹಳ ಗೌರವವಿದೆ" ಎಂದು ವಿರಾಟ್ ಕೊಹ್ಲಿ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

ವೈಭವದ ಟೆನಿಸ್ ವೃತ್ತಿ ಜೀವನಕ್ಕೆ ತೆರೆ ಎಳೆದ ಫೆಡರರ್

ಶುಕ್ರವಾರ ರಾತ್ರಿ ರೋಜರ್ ಫಡರರ್ ವೃತ್ತಿ ಜೀವನದ ಅಂತಿಮ ಟೆನಿಸ್ ಪಂದ್ಯವನ್ನಾಡಿದ್ದು ಈ ಸಂದರ್ಭದಲ್ಲಿ ಟೆನಿಸ್ ಲೋಕದ ಕೋಟ್ಯಂತರ ಅಭಿಮಾನಿಗಳು ಈ ಪಂದ್ಯವನ್ನು ಕಣ್ತುಂಬಿಕೊಂಡಿದ್ದಾರೆ . ಲೇವರ್ ಕಪ್‌ನಲ್ಲಿ ರಾಫೆಲ್ ನಡಾಲ್ ಜೊತೆಗೂಡಿ ಫೆಡರರ್ ಆಡಿದ್ದರೂ ಈ ಪಂದ್ಯದಲ್ಲಿ ಸೋಲುವ ಮೂಲಕ ಅಂತಿಮ ಪಂದ್ಯದಲ್ಲಿ ನಿರಾಸೆ ಅನುಭವಿಸಿದರು. ಆದರೆ ಕ್ರೀಡಾಂಗಣದಲ್ಲಿ ಕಿಕ್ಕಿರಿದು ತುಂಬಿದ್ದ ಪ್ರೇಕ್ಷಕರು ಫೆಡರರ್‌ಗೆ ವಿಶೇಷ ರೀತಿಯಲ್ಲಿ ವಿದಾಯವನ್ನು ಹೇಳುವ ಮೂಲಕ ಈ ಕ್ಷಣವನ್ನು ವಿಶೇಷವಾಗಿಸಿದರು.