ನಂಬರ್ 1 ಪಟ್ಟದ ಮೇಲೆ ಮುದ್ರೆ ಒತ್ತಿದ ಸಾನಿಯಾ ಮಿರ್ಜಾ

ನವದೆಹಲಿ, ಏ. 13: ಮಹಿಳೆಯರ ಡಬಲ್ಸ್ ಇತಿಹಾಸದಲ್ಲಿ ಭಾರತದ ಸಾನಿಯಾ ಮಿರ್ಜಾ ಹೊಸ ದಾಖಲೆ ನಿರ್ಮಿಸಿದ್ದಾರೆ. ಮಹಿಳೆಯರ ವಿಭಾಗಲ್ಲಿ ಇದೇ ಮೊದಲ ಬಾರಿಗೆ ಸಾನಿಯಾ ಮೊದಲ ಸ್ಥಾನಕ್ಕೇರಿದ್ದಾರೆ. ಶ್ರೇಯಾಂಕದಲ್ಲಿ ಮೊದಲ ಸ್ಥಾನ ಗಳಿಸಿದ ಭಾರತದ ವನಿತೆ ಎಂಬ ಗೌರವಕ್ಕೂ ಪಾತ್ರರಾಗಿದ್ದಾರೆ.

ಮಾರ್ಟಿನಾ ಹಿಂಗಿಸ್‌ ಅವರೊಂದಿಗೆ ಅಮೆರಿಕದ ಚಾರ್ಲ್ಸ್‌ಟನ್‌ನಲ್ಲಿ ನಡೆದ ಡಬ್ಲ್ಯುಟಿಎ ಫ್ಯಾಮಿಲಿ ಸರ್ಕಲ್‌ ಕಪ್‌ ಟೆನಿಸ್‌ ಪಂದ್ಯಾವಳಿಯ ಡಬಲ್ಸ್‌ ಚಾಂಪಿಯನ್ ಪಟ್ಟಕ್ಕೇರುವ ಮೂಲಕ ಶ್ರೇಯಾಂಕದಲ್ಲಿ ಮೊದಲಿಗರಾಗಿ ಹೊರಹೊಮ್ಮಿದ್ದಾರೆ.[ಬರಲಿದೆ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಆತ್ಮಕಥೆ]

ಅಗ್ರ ಶ್ರೇಯಾಂಕದ ಸಾನಿಯಾ-ಹಿಂಗಿಸ್‌ ಫೈನಲ್‌ನಲ್ಲಿ ಕ್ಯಾಸಿ ಡೆಲ್ಲಾಕ್ವಾ ಮತ್ತು ದಾರಿಜಾ ಜುರಾಕ್‌ ಅವರನ್ನು 6-0, 6-4 ನೇರ ಸೆಟ್‌ಗಳಿಂದ ಸೋಲಿಸಿದರು. ಈ ಗೆಲುವಿನಿಂದ ಸಾನಿಯಾ 470 ಅಂಕ ಪಡೆದು ತನ್ನ ಒಟ್ಟು ಅಂಕ ಗಳಿಕೆಯನ್ನು 7965ಕ್ಕೇ ಏರಿಸಿಕೊಂಡರು. ಸಾರಾ ಇರಾನಿ (7640) ಮತ್ತು ರಾಬೆರ್ಟಾ ವಿನ್ಸಿ (7640) ಅವರನ್ನು ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿದರು.[ವಿವಾದಗಳೇಕೆ ಮಹಿಳೆಯರ ಬೆನ್ನು ಬೀಳುತ್ತವೆ]

ಸಾನಿಯಾ ಅವರಿಗಿಂತ ಮೊದಲು ಭಾರತದ ಪರ ಲಿಯಾಂಡರ್‌ ಪೇಸ್‌ ಮತ್ತು ಮಹೇಶ್‌ ಭೂಪತಿ 90ರ ದಶಕದಲ್ಲಿ ವಿಶ್ವದ ನಂಬರ್‌ ಒನ್ ಪಟ್ಟ ಗಳಿಸಿದ್ದರು. ಏಪ್ರಿಲ್ ಮೊದಲ ವಾರದಲ್ಲಿ ಮಾರ್ಟಿನಾ ಹಿಂಗಿಸ್‌ ಜತೆ ಸೇರಿ ಮಯಾಮಿ ಓಪನ್‌ ಟೆನಿಸ್‌ ಟ್ರೋಫಿಯನ್ನು ಸಾನಿಯಾ ಜಯಿಸಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿ ಸಾನಿಯಾ ಸಾಧನೆಗೆ ಅಭಿನಂದನೆಗಳ ಮಾಹಾಪೂರ ಹರಿದುಬಂದಿದೆ.