ಸಾನಿಯಾ-ಹಿಂಗಿಸ್ ಜೋಡಿ ಹಿಂದೆ ಹಾಕೋರು ಯಾರೂ ಇಲ್ಲ ಬಿಡಿ

ಬೀಜಿಂಗ್, ಅಕ್ಟೋಬರ್. 11: ಭಾರತದ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಮತ್ತು ಸ್ವಿಟ್ಜರ್‌ಲೆಂಡ್‌ನ ಮಾರ್ಟಿನಾ ಹಿಂಗಿಸ್‌ ಮತ್ತೆ ತಮ್ಮ ಶ್ರೇಯಾಂಕವನ್ನು ಸಾಬೀತು ಮಾಡಿದ್ದಾರೆ. ಡಬ್ಲ್ಯುಟಿಎ ಚೀನಾ ಓಪನ್‌ ಟೆನಿಸ್‌ ಟೂರ್ನಿಯ ಮಹಿಳಾ ವಿಭಾಗದ ಡಬಲ್ಸ್‌ನಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮುವ ಮೂಲಕ ತಾವೇಕೆ ಡಬಲ್ಸ್ ನಲ್ಲಿ ಅಗ್ರಶೇಯಾಂಕಿತರು ಎಂಬುದನ್ನು ತೋರಿಸಿ ಕೊಟ್ಟಿದ್ದಾರೆ.

ಶನಿವಾರ ನಡೆದ ಫೈನಲ್‌ನಲ್ಲಿ ಸಾನಿಯಾ-ಹಿಂಗಿಸ್ ಜೋಡಿ 6-7, 6-1, 10-8ರಲ್ಲಿ ಆರನೇ ಶ್ರೇಯಾಂಕದ ಚೀನಾ ತೈಪೆಯ ಹೂ ಚಿಂಗ್ ಚಾನ್‌ ಮತ್ತು ಯುಂಗ್ ಜಾನ್‌ ಚಾನ್ ಎದುರು ಜಯಗಳಿಸಿದರು. ಒಟ್ಟು ಒಂದು ಗಂಟೆ 40 ನಿಮಿಷ ಹೋರಾಟ ಕ್ರೀಡಾ ಪ್ರೇಮಿಗಳನ್ನು ರಂಜಿಸಿತು.[ಮಿರ್ಜಾ-ಹಿಂಗಿಸ್ ಜೋಡಿ, ಯುಎಸ್ ಓಪನ್ ನಲ್ಲೂ ಮೋಡಿ]

ನಾಲ್ಕು ಟೂರ್ನಿಗಳ ಹಿಂದಿನ 17 ಪಂದ್ಯಗಳಿಂದ ಸಾನಿಯಾ ಜೋಡಿ ಒಂದೂ ಸೆಟ್‌ ಸೋತಿರಲಿಲ್ಲ. ಆದರೆ, ಇಲ್ಲಿ ಮೊದಲ ಸೆಟ್‌ ಸೋತರೂ ನಂತರ ಲಯಕ್ಕೆ ಮರಳಿದ ಜೋಡಿ ವಿಜಯಮಾಲೆಯನ್ನು ಧರಿಸಿತು. ಜೋಡಿಗೆ 2015ರಲ್ಲಿ ಇದು ಒಂಬತ್ತನೇ ಪ್ರಮುಖ ಪ್ರಶಸ್ತಿ. ಇಂಡಿಯನ್‌ ವೇಲ್ಸ್‌, ಮಿಯಾಮಿ, ಚಾರ್ಲೆಸ್ಟನ್‌, ವಿಂಬಲ್ಡನ್‌, ಅಮೆರಿಕ ಓಪನ್‌, ಗುವಾಂಗ್ ಜೌ ಮತ್ತು ವುಹಾನ್‌ ಟೂರ್ನಿಗಳಲ್ಲಿ ಪ್ರಶಸ್ತಿ ಗೆದಿದ್ದರು.

ಸಾನಿಯಾ ಮಿರ್ಜಾ ಅವರ ಸಾಧನೆಯನ್ನು ಪರಿಗಣಿಸಿದ ಕ್ರೀಡಾ ಸಚಿವಾಲಯ ಅವರಿಗೆ ರಾಜೀವ್ ಗಾಂಧಿ ಖೇಲ್ ರತ್ನ ಪ್ರಶಸ್ತಿಯನ್ನು ನೀಡಿ ಗೌರವಿಸಿತ್ತು.