ವಿಂಬಲ್ಡನ್ 2023: 7ನೇ ದಿನ ಗೆದ್ದವರು, ಸೋತವರು ಯಾರು? ಆಂಡ್ರೀವಾ, ಸ್ವೇಟೆಕ್ ದೊಡ್ಡ ಮೈಲಿಗಲ್ಲು

ಪೋಲಿಷ್ ತಾರೆ ಇಗಾ ಸ್ವಿಟೆಕ್ ತನ್ನ ಚೊಚ್ಚಲ ವಿಂಬಲ್ಡನ್ ಮಹಿಳಾ ಸಿಂಗಲ್ಸ್ ಕ್ವಾರ್ಟರ್ ಫೈನಲ್‌ನಲ್ಲಿ ಆಡಲು ಸಜ್ಜಾಗಿದ್ದಾರೆ. ಈವರೆಗೆ ಸ್ವೆಟೆಕ್ ಪಾಲಿಗೆ ಗಗನ ಕುಸುಮವಾಗಿದ್ದ ವಿಂಬಲ್ಡನ್ ಕ್ವಾರ್ಟರ್‌ಫೈನಲ್ಈ ಬಾರಿ ಈಡೇರಿದಂತಾಗಿದೆ. ಸೆಂಟರ್ ಕೋರ್ಟ್‌ನಲ್ಲಿ ಬೆಲಿಂಡಾ ಬೆನ್ಸಿಕ್ ವಿರುದ್ಧ ಪ್ರಿಕ್ವಾರ್ಟರ್‌ಫೈನಲ್‌ನಲ್ಲಿ ಸೆಣೆಸಾಡಿದ ಸ್ವೇಟೆಕ್ 6-7 (4-7), 7-6 (7-2), 6-3 ಅಂತರದಿಂದ ಗೆದ್ದು ಎರಡು ಅಂಕಗಳನ್ನು ಖಾತೆಗೆ ಸೇರಿಸಿಕೊಂಡಿದ್ದಾರೆ.

ಸ್ವೆಟೆಕ್ ಕ್ವಾರ್ಟರ್‌ಫೈನಲ್‌ನಲ್ಲಿ ಯುಕ್ರೇನ್‌ನ ಎಲಿನಾ ಸ್ವಿಟೋಲಿನಾ ಅವರನ್ನು ಎದುರಿಸಲಿದ್ದಾರೆ. ಸ್ವಿಟೋಲಿನಾ ಎರಡು ಬಾರಿಯ ಗ್ರ್ಯಾಂಡ್ ಸ್ಲಾಮ್ ಚಾಂಪಿಯನ್ ವಿಕ್ಟೋರಿಯಾ ಅಜರೆಂಕಾ ಅವರನ್ನು 16 ರ ಸುತ್ತಿನಲ್ಲಿ ಸೋಲಿಸಿದರು. ಅದ್ಭುತ ಕಾದಾಟದಲ್ಲಿ ಉಕ್ರೇನಿಯನ್ ಸ್ಟಾರ್ ಒಂದು ಹಂತದಲ್ಲಿ ಒಂದು ಸೆಟ್ ಮತ್ತು 0-2 ಅಂಕಗಳಿಂದ ಹಿಂದಿದ್ದರು. ಅಲ್ಲಿಂದ ಅದ್ಭುತವಾಗಿ ಕಮ್‌ಬ್ಯಾಕ್ ಮಾಡಿ ಪಂದ್ಯ ಗೆದ್ದುಕೊಂಡಿದ್ದಾರೆ.

ರಷ್ಯಾದ ಹದಿಹರೆಯದ ಸೆನ್ಸೇಶನ್ ಮಿರ್ರಾ ಆಂಡ್ರೀವಾ 2023 ರಲ್ಲಿ ತನ್ನ ಅದ್ಭುತ ಓಟವನ್ನು ಮುಂದುವರೆಸಿದ್ದಾರೆ. ಫ್ರೆಂಚ್ ಓಪನ್ ಮೂರನೇ ಸುತ್ತಿಗೆ ಮುನ್ನಡೆದ ನಂತರ 16 ವರ್ಷ ವಯಸ್ಸಿನ ಈ ಸ್ಟಾರ್ ಮತ್ತೊಂದು ಹೆಜ್ಜೆ ಮುಂದಿಟ್ಟಿದ್ದಾರೆ. ಈಗ ತಮ್ಮ ಚೊಚ್ಚಲ ಗ್ರ್ಯಾಂಡ್ ಸ್ಲಾಮ್ ರೌಂಡ್ ಆಫ್ 16 ಪಂದ್ಯವನ್ನು ಆಡುವ ಅವಕಾಶ ಪಡೆದುಕೊಂಡಿದ್ದಾರೆ. ರಷ್ಯಾದ ಅನಸ್ತಾಸಿಯಾ ಪೊಟಪೋವಾ ಅವರನ್ನು 6-2, 7-5 ಸೆಟ್‌ಗಳಿಂದ ಮಣಿಸಿ ಈ ಸಾಧನೆ ಮಾಡಿದ್ದಾರೆ. ಈ ವರ್ಷ ಅರ್ಹತಾ ಸುತ್ತಿನಲ್ಲಿ ಆಡಿ ಮುಖ್ಯ ಸುತ್ತಿಗೆ ಅರ್ಹತೆ ಪಡೆದ ಮೂವರ ಪೈಕಿ ಆಂಡ್ರೀವಾ ಮಾತ್ರ ನಾಲ್ಕನೇ ಸುತ್ತಿಗೆ ಪ್ರವೇಶ ಪಡೆದುಕೊಂಡಿದ್ದಾರೆ.

ಮತ್ತೊಂದೆಡೆ ಆಂಡ್ರೆ ರುಬ್ಲೆವ್ ಅವರು ಸೆಂಟರ್ ಕೋರ್ಟ್‌ನಲ್ಲಿ ಅಲೆಕ್ಸಾಂಡರ್ ಬುಬ್ಲಿಕ್ ಅವರನ್ನು ಸೋಲಿಸಿದರು. 7-5, 6-3, 6-7 (6-8), 6-7 (5-7), 6-4 ಸೆಟ್‌ಗಳಿಂದ ಆಂಡ್ರೆ ರುಬ್ಲೆವ್ ಈ ಪಂದ್ಯವನ್ನು ಗೆದ್ದಿದ್ದಾರೆ. ವಿಶ್ವ ನಂ.8 ಜಾನಿಕ್ ಸಿನ್ನರ್ ಅವರು ಡೇನಿಯಲ್ ಎಲಾಹಿ ಗಲಾನ್ ಅವರನ್ನು 7-6 (7-4), 6-4, 6-3 ಸೆಟ್‌ಗಳಿಂದ ಸೋಲಿಸಿ ಮಿಂಚಿದ್ದಾರೆ. ರಷ್ಯಾದ ರೋಮನ್ ಸಫಿಯುಲಿನ್ 3-6, 6-3, 6-1, 6-3ರಲ್ಲಿ 26ನೇ ಶ್ರೇಯಾಂಕದ ಡೆನಿಸ್ ಶಪೊವಾಲೊವ್ ಅವರನ್ನು ಮಣಿಸಿದರು.