Wimbledon 2024: ನೊವಾಕ್ ಜೊಕೊವಿಕ್ ಮಣಿಸಿ ಸತತ 2ನೇ ಬಾರಿ ಪ್ರಶಸ್ತಿ ಗೆದ್ದ ಕಾರ್ಲೋಸ್ ಅಲ್ಕರಾಝ್

ಟೆನ್ನಿಸ್‌ನಲ್ಲಿ ಹೊಸ ಯುಗ ಬಂದಿದೆ ಎಂಬ ಘೋಷಣೆಯೊಂದಿಗೆ ಕಾರ್ಲೋಸ್ ಅಲ್ಕರಾಜ್ ಅವರು 7 ಬಾರಿಯ ವಿಂಬಲ್ಡನ್ ಚಾಂಪಿಯನ್ ನೊವಾಕ್ ಜೊಕೊವಿಕ್ ಅವರನ್ನು ಸೋಲಿಸಿ ವಿಂಬಲ್ಡನ್ ಪ್ರಶಸ್ತಿಯನ್ನು ತಮ್ಮಲ್ಲೇ ಉಳಿಸಿಕೊಂಡರು.

ಭಾನುವಾರ, ಜುಲೈ 14ರಂದು ಲಂಡನ್‌ನ ಸೆಂಟರ್ ಕೋರ್ಟ್‌ನಲ್ಲಿ ನಡೆದ 2024ರ ವಿಂಬಲ್ಡನ್ ಪುರುಷರ ರೋಚಕ ಫೈನಲ್‌ನಲ್ಲಿ ಸೆರ್ಬಿಯಾದ ಟೆನ್ನಿಸ್‌ ತಾರೆ ನೊವಾಕ್ ಜೊಕೊವಿಕ್ ಅವರನ್ನು ಸ್ಪೇನ್‌ನ ಕಾರ್ಲೋಸ್ ಅಲ್ಕರಾಝ್ ಮಣಿಸಿದರು.

ವಿಂಬಲ್ಡನ್‌ನಲ್ಲಿ ತಮ್ಮ ಪುರುಷರ ಸಿಂಗಲ್ಸ್ ಕಿರೀಟವನ್ನು ಯಶಸ್ವಿಯಾಗಿ ಉಳಿಸಿಕೊಳ್ಳಲು ಕಾರ್ಲೋಸ್ ಅಲ್ಕರಾಝ್ ಅವರು ಭಾನುವಾರದಂದು ನೊವಾಕ್ ಜೊಕೊವಿಕ್ ಅವರನ್ನು 6-2, 6-2, 7-6 (7-4) ನೇರ ಸೆಟ್‌ಗಳಿಂದ ಸೋಲಿಸಿದರು.

ಕಳೆದ ವರ್ಷದ ಫೈನಲ್‌ನ ಮರುಪಂದ್ಯದಲ್ಲಿ, ಕಿಕ್ಕಿರಿದ ಪ್ರೇಕ್ಷಕರ ಎದುರು ಪಂದ್ಯವನ್ನು ಗೆಲ್ಲಲು ಯುವ ಆಟಗಾರ ಕಾರ್ಲೋಸ್ ಅಲ್ಕರಾಝ್ 2 ಗಂಟೆ 27 ನಿಮಿಷಗಳನ್ನು ತೆಗೆದುಕೊಂಡರು.

ಕಳೆದ ವರ್ಷ ನೊವಾಕ್ ಜೊಕೊವಿಕ್ ಅವರನ್ನು ಸೋಲಿಸಲು ಸುಮಾರು 5 ಗಂಟೆಗಳ ಕಾಲ ಕಾರ್ಲೋಸ್ ಅಲ್ಕಾರಾಝ್ ಹೋರಾಡಬೇಕಾಯಿತು. ಆದರೆ ಈ ಬಾರಿ ಯುವ ಟೆನ್ನಿಸ್ ತಾರೆಯ ಪರವಾಗಿ ಹೆಚ್ಚು ಕಡಿಮೆ ಏಕಮುಖ ಆಟವಾಗಿತ್ತು.

ವಿಶ್ವದ ಅತ್ಯಂತ ಕಿರಿಯ ನಂ.1 ಆಟಗಾರನಾಗಿ ಉಳಿದಿರುವ ಕಾರ್ಲೋಸ್ ಅಲ್ಕಾರಾಝ್, ಮ್ಯಾಟ್ಸ್ ವಿಲಾಂಡರ್, ಜಾರ್ನ್ ಬೋರ್ಗ್ ಮತ್ತು ಬೋರಿಸ್ ಬೆಕರ್ ಬಳಿಕ, 21 ವರ್ಷದೊಳಗಿನವರು 4 ಗ್ರ್ಯಾಂಡ್ ಸ್ಲಾಮ್‌ಗಳನ್ನು ಗೆದ್ದ ನಾಲ್ಕನೇ ಆಟಗಾರರಾದರು.

ಕಾರ್ಲೋಸ್ ಅಲ್ಕಾರಾಝ್ ಗ್ರ್ಯಾಂಡ್ ಸ್ಲಾಮ್ ಫೈನಲ್‌ಗಳಲ್ಲಿ ಅಜೇಯರಾಗಿ ಉಳಿದಿದ್ದು, ಎಲ್ಲಾ 4 ಫೈನಲ್ ಪಂದ್ಯಗಳಲ್ಲಿ ಗೆದ್ದು ಬೀಗಿದ್ದಾರೆ. ಈ ವಿಜಯೋತ್ಸವದೊಂದಿಗೆ ಕಾರ್ಲೋಸ್ ಅಲ್ಕಾರಾಝ್ ಇತಿಹಾಸದಲ್ಲಿ ಸತತ ವಿಂಬಲ್ಡನ್ ಪ್ರಶಸ್ತಿಗಳನ್ನು ಗೆದ್ದ ಮೊದಲ ಸ್ಪ್ಯಾನಿಷ್ ಆಟಗಾರನಾದರು.

ನೊವಾಕ್ ಜೊಕೊವಿಕ್ ಈ ಫೈನಲ್ ಪಂದ್ಯದ ಗೆದ್ದಿದ್ದರೆ, ಗ್ರಾಸ್ ಕೋರ್ಟ್ ಮೇಜರ್‌ ವಿಂಬಲ್ಡನ್‌ನಲ್ಲಿ ರೋಜರ್ ಫೆಡರರ್ ಅವರ ಹೆಚ್ಚಿನ ಪ್ರಶಸ್ತಿಗಳ (8) ದಾಖಲೆಯನ್ನು ಸರಿಗಟ್ಟುತ್ತಿದ್ದರು. ಆದರೆ ಅದು ಸಂಭವಿಸಲಿಲ್ಲ.

ಕಳೆದ ವರ್ಷವೂ ಇದೇ ಜೋಡಿ ವಿಂಬಲ್ಡನ್ ಫೈನಲ್​ನಲ್ಲಿ ಕಾದಾಡಿದ್ದರು. ಆ ಪಂದ್ಯದಲ್ಲಿ ಸರ್ಬಿಯಾದ ದೊರೆ ನೊವಾಕ್ ಜೊಕೊವಿಕ್ ಅವರನ್ನು ಕಾರ್ಲೋಸ್ ಅಲ್ಕರಾಝ್ 1-6, 7-6, 6-1, 3-6, 6-4 ಸೆಟ್‌ಗಳಿಂದ ಮಣಿಸಿ ಚೊಚ್ಚಲ ವಿಂಬಲ್ಡನ್ ಪ್ರಸಸ್ತಿ ಮುಡಿಗೇರಿಸಿಕೊಂಡಿದ್ದರು.

ಆರಂಭಿಕ ಸೆಟ್‌ನ ಮೊದಲ ಗೇಮ್ ರೋಚಕವಾಗಿ ಹೊರಹೊಮ್ಮಿತು. ಪಂದ್ಯವನ್ನು ಗೆಲ್ಲಲು ಮತ್ತು ಸೆಟ್‌ನಲ್ಲಿ ನಿರ್ಣಾಯಕ ಮುನ್ನಡೆ ಸಾಧಿಸಲು ಕಾರ್ಲೋಸ್ ಅಲ್ಕಾರಾಝ್ 14 ನಿಮಿಷಗಳಲ್ಲಿ 5 ಬ್ರೇಕ್ ಪಾಯಿಂಟ್‌ಗಳನ್ನು ತೆಗೆದುಕೊಂಡರು.

ನೊವಾಕ್ ಜೊಕೊವಿಕ್ ಸುಲಭವಾಗಿ ಸೋಲೊಪ್ಪಿಕೊಳ್ಳಲು ಸಿದ್ಧರಿರಲಿಲ್ಲ. ಆದರೆ, ಕಾರ್ಲೋಸ್ ಅಲ್ಕಾರಾಝ್ ಗೆಲುವಿನ ನಗುವನ್ನು ಹೊಂದಿದ್ದರು. ಅಲ್ಲಿಂದ ನಂತರ, ಕಾರ್ಲೋಸ್ ಅಲ್ಕಾರಾಝ್ ಹಿಂತಿರುಗಿ ನೋಡಲಿಲ್ಲ ಮತ್ತು 41 ನಿಮಿಷಗಳಲ್ಲಿ ಮತ್ತೊಂದು ಸರ್ವ್ ಬ್ರೇಕ್‌ನೊಂದಿಗೆ ಸೆಟ್ ಅನ್ನು ಗೆದ್ದರು.

ತನ್ನ ಹಿನ್ನಡೆಯಿಂದ ಹೊರಬರಲು ಸಾಧ್ಯವಾಗದ ನೊವಾಕ್ ಜೊಕೊವಿಕ್ ವಿರುದ್ಧ ಕಾರ್ಲೋಸ್ ಅಲ್ಕಾರಾಝ್ ಒತ್ತಡವನ್ನು ಹೇರುತ್ತಲೇ ಇದ್ದುದರಿಂದ ಎರಡನೇ ಸೆಟ್‌ ಭಿನ್ನವಾಗಿರಲಿಲ್ಲ.

ಮತ್ತೊಂದು ಬಾರಿ, ಕಾರ್ಲೋಸ್ ಅಲ್ಕಾರಾಝ್ ಡಬಲ್ ಬ್ರೇಕ್‌ನೊಂದಿಗೆ ಸೆರ್ಬಿಯಾ ಆಟಗಾರನ ಮೇಲೆ ಒತ್ತಡ ಹೇರಿದರು. ಜೊಕೊವಿಕ್ ಅವರ ಸರ್ವ್ ಅನ್ನು 2 ಸೆಟ್‌ಗಳಲ್ಲಿ 4 ಬಾರಿ ಮುರಿದರು ಮತ್ತು ಇದು ಸಾಮಾನ್ಯ ದೃಶ್ಯವಾಗಿರಲಿಲ್ಲ.