ವಿಟಿಎ ಫೈನಲ್ಸ್: ಕ್ವಿಟೋವಾ ಸೋಲಿಸಿ ಸೆಮಿಫೈನಲ್ ಗೆ ಪ್ರವೇಶಿಸಿದ ಪ್ಲಿಸ್ಕೋವಾ

ಸಿಂಗಾಪುರ್, ಅಕ್ಟೋಬರ್ 25: ಸಿಂಗಾಪುರ್ ನಲ್ಲಿ ನಡೆಯುತ್ತಿರುವ ವಿಮೆನ್ಸ್ ಟೆನಿಸ್ ಅಸೋಸಿಯೇಷನ್ ಫೈನಲ್ಸ್ ಟೆನಿಸ್ ಟೂರ್ನಿಯಲ್ಲಿ ಜೆಕ್ ಆಟಗಾರ್ತಿ ಕರೋಲಿನಾ ಪ್ಲಿಸ್ಕೋವಾ ಅವರು ಪೆಟ್ರಾ ಕ್ವಿಟೋವಾ ಅವರನ್ನು ಸೋಲಿಸುವ ಮೂಲಕ ಸೆಮಿ-ಫೈನಲ್ ಪ್ರವೇಶಿಸಿದ್ದಾರೆ.

ಗುರುವಾರ (ಅಕ್ಟೋಬರ್ 25) ನಡೆದ ಕ್ವಾರ್ಟರ್ ಫೈನಲ್ ಸ್ಪರ್ಧೆಯಲ್ಲಿ ಪ್ಲಿಸ್ಕೋವಾ ಅವರು, ತಮ್ಮದೇ ದೇಶದ ಆಟಗಾರ್ತಿ ಕ್ವಿಟೋವಾ ಅವರನ್ನು 6-3, 6-4ರ ನೇರ ಸೆಟ್ ನಿಂದ ಸೋಲಿಸಿ ಮುಂದಿನ ಹಂತಕ್ಕೆ ಪ್ರವೇಶ ಗಿಟ್ಟಿಸಿಕೊಂಡರು. ಇಬ್ಬರ ನಡುವೆ 83 ನಿಮಿಷಗಳ ಕಾದಾಟ ನಡೆಯಿತು.

ಪ್ಲಿಸ್ಕೋವಾ ಗೆಲುವು ಒಂದರ್ಥದಲ್ಲಿ ಹಾಲಿ ಚಾಂಪಿಯನ್, ಡೆನ್ಮಾರ್ಕ್ ನ ಕ್ಯಾರೋಲಿನ್ ವೊಜ್ನಿಯಾಕಿಗೆ ಒತ್ತಡವನ್ನುಂಟು ಮಾಡಿದೆ. ಟೂರ್ನಿಯಲ್ಲಿ ಉಳಿದುಕೊಳ್ಳಬೇಕಾದರೆ ವೊಜ್ನಿಯಾಕಿ, ಟೂರ್ನಿಯ ಸೋಲಿಲ್ಲದ ಉಕ್ರೇನ್ ಆಟಗಾರ್ತಿ ಎಲೆನಾ ಸ್ವಿಟೊಲಿನಾ ಅವರನ್ನು ಸೋಲಿಸಬೇಕಿದೆ.