ಶೇನ್ ವ್ಯಾಟ್ಸನ್‌ರ ವಿಶ್ವ ಟಿ20 ಪ್ಲೇಯಿಂಗ್ 11ರಲ್ಲಿ ಬಾಬರ್ ಅಜಂ, ಈ ಭಾರತೀಯನಿಗೆ ಅಗ್ರಸ್ಥಾನ

ಶೇನ್ ವ್ಯಾಟ್ಸನ್ ಅವರ ಮೊದಲ ಆಯ್ಕೆ ಬಾಬರ್ ಅಜಂ

"ನಾನು ಮೊದಲು ಆಯ್ಕೆ ಮಾಡಿದ್ದು ಬಾಬರ್ ಅಜಂ. ಅವರು ವಿಶ್ವದ ನಂ.1 ಟಿ20 ಬ್ಯಾಟ್ಸ್‌ಮನ್ ಆಗಿದ್ದಾರೆ ಮತ್ತು ಅವರು ಎದುರಾಳಿ ಮೇಲೆ ಹೇಗೆ ಪ್ರಾಬಲ್ಯ ಸಾಧಿಸಬೇಕೆಂದು ತಿಳಿದಿದ್ದಾರೆ. ಅವರು ಯಾವುದೇ ಅಪಾಯಗಳನ್ನು ತೆಗೆದುಕೊಳ್ಳುತ್ತಿಲ್ಲ ಮತ್ತು ಅವರು ವಿಶ್ವದ ಅತ್ಯುತ್ತಮ ಬೌಲರ್‌ಗಳ ವಿರುದ್ಧ ನಂಬಲಾಗದಷ್ಟು ವೇಗವಾಗಿ ಸ್ಕೋರ್ ಮಾಡುತ್ತಾರೆ," ಎಂದು ಮಂಗಳವಾರ (ಆಗಸ್ಟ್ 23) ಐಸಿಸಿ ವಿಮರ್ಶೆಯ ಇತ್ತೀಚಿನ ಸಂಚಿಕೆಯಲ್ಲಿ ಶೇನ್ ವ್ಯಾಟ್ಸನ್ ಹೇಳಿದರು.

ಎರಡನೇ ಆಯ್ಕೆ ಭಾರತದ ಸ್ಟಾರ್ ಬ್ಯಾಟ್ಸ್‌ಮನ್ ಸೂರ್ಯಕುಮಾರ್

"ಆಸ್ಟ್ರೇಲಿಯದ ಪರಿಸ್ಥಿತಿಗಳಲ್ಲಿ ಟಿ20 ವಿಶ್ವಕಪ್ ಸಮಯದಲ್ಲಿ ಅವರು ಉತ್ತಮವಾಗಿ ಕಾರ್ಯನಿರ್ವಹಿಸಲಿದ್ದಾರೆ, ಏಕೆಂದರೆ ಅವರ ತಂತ್ರವು ಆಸ್ಟ್ರೇಲಿಯಾದ ಪರಿಸ್ಥಿತಿಗಳಿಗೆ ಹೆಚ್ಚು ಸಹಾಯವಾಗುತ್ತದೆ,'' ಎಂದು ಹೇಳಿದ್ದು, "ಎರಡನೆಯದಾಗಿ ಭಾರತದ ಸ್ಟಾರ್ ಬ್ಯಾಟ್ಸ್‌ಮನ್ ಸೂರ್ಯಕುಮಾರ್ ಯಾದವ್. ಅವರು ನಂಬಲಾಗದಷ್ಟು ಉತ್ತಮವಾಗಿ ಬ್ಯಾಟಿಂಗ್ ಮಾಡುತ್ತಿದ್ದಾರೆ ಮತ್ತು ಅವರು ನನ್ನ ನಂ.2 ಆಯ್ಕೆಯಾಗುತ್ತಾರೆ," ಶೇನ್ ವ್ಯಾಟ್ಸನ್ ಅಭಿಪ್ರಾಯಪಟ್ಟರು.

ವಿಶ್ವದ ಎರಡನೇ ಟಿ20 ಬ್ಯಾಟ್ಸ್‌ಮನ್ ಸೂರ್ಯಕುಮಾರ್ ಯಾದವ್ ಎಂದು ಹೇಳಿದ ಆಸೀಸ್ ಮಾಜಿ ಆಲ್‌ರೌಂಡರ್ ಶೇನ್ ವ್ಯಾಟ್ಸನ್‌, ತನ್ನ ಸಹ ಆಟಗಾರ ಕೆಎಲ್ ರಾಹುಲ್ ಆಸ್ಟ್ರೇಲಿಯಾದಲ್ಲಿ ಟಿ20 ವಿಶ್ವಕಪ್ 2022ರಲ್ಲಿ ಉತ್ತಮ ಪ್ರದರ್ಶನ ನೀಡಿದರೆ ಆಶ್ಚರ್ಯವಾಗುವುದಿಲ್ಲ ಎಂದರು.

"ಆದರೆ, ಆಸ್ಟ್ರೇಲಿಯಾದಲ್ಲಿ ಟಿ20 ವಿಶ್ವಕಪ್‌ ವೇಳೆ ಭಾರತ ತಂಡದ ಸಹ ಆಟಗಾರ, ಉಪನಾಯಕ ಕೆಎಲ್ ರಾಹುಲ್ ಸ್ಫೋಟಿಸಿದರೆ ನನಗೆ ಆಶ್ಚರ್ಯವಾಗುವುದಿಲ್ಲ. ಏಕೆಂದರೆ ಆಸ್ಟ್ರೇಲಿಯಾದಲ್ಲಿ ಈ ಪರಿಸ್ಥಿತಿಗಳಲ್ಲಿ ಪ್ರಾಬಲ್ಯ ಸಾಧಿಸಲು ಅವರಿಗೆ ಆಟ ಸಿಕ್ಕಿದೆ," ಎಂದು ಮಾಜಿ ಆಲ್‌ರೌಂಡರ್ ಶೇನ್ ವ್ಯಾಟ್ಸನ್ ಹೇಳಿದರು.

ಶೇನ್ ವ್ಯಾಟ್ಸನ್ ಮೂರನೇ ಆಯ್ಕೆ ಡೇವಿಡ್ ವಾರ್ನರ್

ಶೇನ್ ವ್ಯಾಟ್ಸನ್ ಅವರ ಮೂರನೇ ಆಯ್ಕೆಯು ಆಸ್ಟ್ರೇಲಿಯಾದ ಆರಂಭಿಕ ಅನುಭವಿ ಆಟಗಾರ ಡೇವಿಡ್ ವಾರ್ನರ್ ಆಗಿದ್ದು, ಅವರು ಟಿ20 ವಿಶ್ವಕಪ್‌ ಪಂದ್ಯಾವಳಿಯ ಹಿಂದಿನ ಆವೃತ್ತಿಯ ಏಳು ಇನ್ನಿಂಗ್ಸ್‌ಗಳಲ್ಲಿ 289 ರನ್‌ಗಳು ಮತ್ತು ಮೂರು ಅರ್ಧಶತಕಗಳೊಂದಿಗೆ "ಪಂದ್ಯಾವಳಿಯ ಮ್ಯಾನ್ ಆಫ್ ದಿ ಟೂರ್ನಮೆಂಟ್' ಆಗಿ ಹೊರಹೊಮ್ಮಿದ್ದರು. ಅವರ ಪ್ರಸ್ತುತ ಐಸಿಸಿ ಟಿ20 ಬ್ಯಾಟಿಂಗ್ ಶ್ರೇಯಾಂಕ 40 ಆಗಿದೆ.

"ನಂ.3 ಆಟಗಾರ ಡೇವಿಡ್ ವಾರ್ನರ್. ಅವರು ಕೊನೆಯ ಪುರುಷರ ಟಿ20 ವಿಶ್ವಕಪ್‌ನಲ್ಲಿ ಆಸೀಸ್ ಗೆಲ್ಲುವುದರೊಂದಿಗೆ ಪ್ಲೇಯರ್ ಆಫ್ ದಿ ಟೂರ್ನಮೆಂಟ್ ಅನ್ನು ಗೆದ್ದರು ಮತ್ತು ಐಪಿಎಲ್‌ನಲ್ಲಿ ದೆಹಲಿ ಕ್ಯಾಪಿಟಲ್ಸ್‌ಗಾಗಿ ಕೆಲವು ಉತ್ತಮ ರನ್‌ಗಳನ್ನು ಗಳಿಸಿದ್ದಾರೆ. ತವರಿನಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್‌ನಲ್ಲಿ ತಮ್ಮ ಛಾಪು ಮೂಡಿಸಲು ಅವರು ಸಾಕಷ್ಟು ನಿರೀಕ್ಷೆ ಮೂಡಿಸಿದ್ದಾರೆ," ಎಂದು ವ್ಯಾಟ್ಸನ್ ಹೇಳಿದರು.

ಶೇನ್ ವ್ಯಾಟ್ಸನ್ ಅವರ ನಾಲ್ಕನೇ ಆಯ್ಕೆ ಜೋಸ್ ಬಟ್ಲರ್

ಶೇನ್ ವ್ಯಾಟ್ಸನ್ ಅವರ ನಾಲ್ಕನೇ ಆಯ್ಕೆ ಇಂಗ್ಲೆಂಡ್‌ನ ಸ್ಫೋಟಕ ಬ್ಯಾಟರ್ ಜೋಸ್ ಬಟ್ಲರ್ ಆಗಿದ್ದಾರೆ. ಅವರು ಈ ವರ್ಷ ಇಂಗ್ಲೆಂಡ್ ಮತ್ತು ಐಪಿಎಲ್ ಫ್ರಾಂಚೈಸಿ ರಾಜಸ್ಥಾನ್ ರಾಯಲ್ಸ್‌ಗಾಗಿ ಸ್ಫೋಟಕ ಫಾರ್ಮ್‌ನಲ್ಲಿದ್ದಾರೆ ಮತ್ತು ಐಸಿಸಿ ಟಿ20 ಬ್ಯಾಟಿಂಗ್ ಶ್ರೇಯಾಂಕದಲ್ಲಿ 17ನೇ ಸ್ಥಾನದಲ್ಲಿದ್ದಾರೆ.

"ನಂ. 4 ಜೋಸ್ ಬಟ್ಲರ್ ಆಗಲಿದ್ದಾರೆ. ಐಪಿಎಲ್ ಸಮಯದಲ್ಲಿ ಸಾಕಷ್ಟು ಬಾರಿ ಯಾರೂ ಅವರನ್ನು ಔಟ್ ಮಾಡಲು ಸಾಧ್ಯವಾಗಲಿಲ್ಲ. ಐಪಿಎಲ್‌ನಲ್ಲಿ ನಾಲ್ಕು ಶತಕಗಳನ್ನು ಒಮ್ಮೆ ಮಾತ್ರ ಮಾಡಲಾಗಿತ್ತು, ಅದನ್ನು ವಿರಾಟ್ ಕೊಹ್ಲಿ ಅದನ್ನು ಮಾಡಿದ್ದರು (2016 ರಲ್ಲಿ). ಅವರು ಫಾರ್ಮ್‌ನಲ್ಲಿರುವಾಗ ಟಿ20 ಕ್ರಿಕೆಟ್‌ನಲ್ಲಿ ಹೊರಬರುವುದು ಅಸಾಧ್ಯ," ಎಂದು ಶೇನ್ ವ್ಯಾಟ್ಸನ್ ತಿಳಿಸಿದರು.

"ಜೋಸ್ ಬಟ್ಲರ್ ವಿಶ್ವದ ಅತ್ಯುತ್ತಮ ಬೌಲರ್‌ಗಳಿಗೆ ಎಲ್ಲಿ ಬೇಕಾದರೂ ಹೊಡೆಯಬಹುದು ಮತ್ತು ಅವರು ಆಸ್ಟ್ರೇಲಿಯನ್ ಪರಿಸ್ಥಿತಿಗಳನ್ನು ಚೆನ್ನಾಗಿ ತಿಳಿದಿದ್ದಾರೆ. ಅವರು ಬಿಗ್ ಬ್ಯಾಷ್ ಆಡಿದ್ದಾರೆ ಮತ್ತು ಕೆಲವು ವರ್ಷಗಳ ಹಿಂದೆ ನಾನು ಅವರೊಂದಿಗೆ ಸಿಡ್ನಿ ಥಂಡರ್‌ನಲ್ಲಿ ಆಡಿದಾಗ ಉತ್ತಮವಾಗಿ ಕಾರ್ಯನಿರ್ವಹಿಸಿದ್ದಾರೆ. ಆದ್ದರಿಂದ ಜೋಸ್ ಬಟ್ಲರ್ ಪ್ರಾಬಲ್ಯ ಸಾಧಿಸಲಿದ್ದಾರೆ," ಎಂದು ವ್ಯಾಟ್ಸನ್ ಅಭಿಪ್ರಾಯಪಟ್ಟರು.

ಶೇನ್ ವ್ಯಾಟ್ಸನ್ ಅವರ ಕೊನೆಯ ಆಯ್ಕೆ ಶಾಹೀನ್ ಅಫ್ರಿದಿ

ಐಸಿಸಿ ಟಿ20 ಬೌಲಿಂಗ್ ಶ್ರೇಯಾಂಕದಲ್ಲಿ 13ನೇ ಸ್ಥಾನದಲ್ಲಿರುವ ಸ್ಟಾರ್ ಪಾಕಿಸ್ತಾನಿ ವೇಗಿ ಶಾಹೀನ್ ಅಫ್ರಿದಿಯು ಶೇನ್ ವ್ಯಾಟ್ಸನ್ ಅವರ ಕೊನೆಯ ಆಯ್ಕೆಯಾಗಿದೆ. "ಶಾಹೀನ್ ಅಫ್ರಿದಿ ಅವರ ವಿಕೆಟ್ ತೆಗೆಯುವ ಸಾಮರ್ಥ್ಯ ವಿಶೇಷವಾಗಿದೆ. ಆ ಹೊಚ್ಚ ಹೊಸ ಚೆಂಡಿನೊಂದಿಗೆ ಅತ್ಯುತ್ತಮ ಬ್ಯಾಟ್ಸ್‌ಮನ್‌ಗಳನ್ನು ಔಟ್ ಮಾಡಲು ಸಾಧ್ಯವಾಗುವ ಅವರ ಸಾಮರ್ಥ್ಯವನ್ನು ನಾವು ಕಳೆದ ಪುರುಷರ ಟಿ20 ವಿಶ್ವಕಪ್‌ನಲ್ಲಿ ನೋಡಿದ್ದೇವೆ. ಆಸ್ಟ್ರೇಲಿಯದ ಪರಿಸ್ಥಿತಿಗಳಲ್ಲಿ ಅವರು ನಿಜವಾಗಿಯೂ ಪ್ರಾಬಲ್ಯ ಸಾಧಿಸದಿದ್ದರೆ ನನಗೆ ತುಂಬಾ ಆಶ್ಚರ್ಯವಾಗುತ್ತದೆ," ಎಂದಿದ್ದಾರೆ.