IND vs ENG: ಇಂಗ್ಲೆಂಡ್ ವಿರುದ್ಧದ ಗೆಲುವಿನ ನಂತರ ODI ರ್‍ಯಾಂಕಿಂಗ್‌ನಲ್ಲಿ ಪಾಕ್ ಹಿಂದಿಕ್ಕಿದ ಭಾರತ

ಇಂಗ್ಲೆಂಡ್ ತಂಡಕ್ಕೆ ವಿಧ್ವಂಸಕವಾಗಿ ಕಾಡಿದ ಬುಮ್ರಾ

ಜಸ್ಪ್ರೀತ್ ಬುಮ್ರಾ ಅವರು ಆರು ವಿಕೆಟ್‌ಗಳ ಪಡೆಯವುದರೊಂದಿಗೆ ಇಂಗ್ಲೆಂಡ್ ತಂಡಕ್ಕೆ ವಿಧ್ವಂಸಕವಾಗಿ ಕಾಡಿದರು. ಇದು ಏಕದಿನದಲ್ಲಿ ಭಾರತದ ವಿರುದ್ಧ ಇಂಗ್ಲೆಂಡ್ ಅತ್ಯಂತ ಕಡಿಮೆ ಮೊತ್ತಕ್ಕೆ (110) ಕುಸಿಯಿತು. ಉಳಿದ ವೇಗಿಗಳು ಜಸ್ಪ್ರೀತ್ ಬುಮ್ರಾ ಸಾಥ್ ನೀಡಿದರು. ಮೊಹಮ್ಮದ್ ಶಮಿ ಮೂರು ವಿಕೆಟ್‌ಗಳನ್ನು ಪಡೆದರೆ, ಕನ್ನಡಿಗ ಪ್ರಸಿದ್ಧ್ ಕೃಷ್ಣ ಒಂದು ವಿಕೆಟ್ ಪಡೆದರು.

ಇನ್ನು ಇಂಗ್ಲೆಂಡ್‌ನ ಸಾಧಾರಣ ಮೊತ್ತ ಬೆನ್ನತ್ತಿದ ಭಾರತ, ನಾಯಕ ರೋಹಿತ್ ಶರ್ಮಾ (76*) ಮತ್ತು ಶಿಖರ್ ಧವನ್ (31*) ಅಜೇಯ 114 ರನ್‌ಗಳ ಆರಂಭಿಕ ಜೊತೆಯಾಟದಿಂದ ಗೆಲುವಿನತ್ತ ಸಾಗಿತು. ಎರಡನೇ ಶ್ರೇಯಾಂಕದ ಇಂಗ್ಲೆಂಡ್ ತಂಡವನ್ನು 10 ವಿಕೆಟ್‌ಗಳು ಮತ್ತು 31 ಓವರ್‌ಗಳಿಗಿಂತ ಹೆಚ್ಚು ಬಾಕಿ ಇರುವಂತೆಯೇ ಸೋಲಿಸಿತು. ಮೂರು ಪಂದ್ಯಗಳ ಸರಣಿಯಲ್ಲಿ ಇಂಗ್ಲೆಂಡ್ ವಿರುದ್ಧ 1-0 ಮುನ್ನಡೆ ಸಾಧಿಸಿದರು.

108 ರೇಟಿಂಗ್ ಪಾಯಿಂಟ್‌ ಹೊಂದಿರುವ ಭಾರತ ಮೂರನೇ ಸ್ಥಾನ

126 ರೇಟಿಂಗ್ ಅಂಕಗಳೊಂದಿಗೆ ನ್ಯೂಜಿಲೆಂಡ್ ತಂಡ ಅಗ್ರಸ್ಥಾನದಲ್ಲಿದ್ದರೆ, ಇಂಗ್ಲೆಂಡ್ ತಂಡ 122 ರೇಟಿಂಗ್ ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. 108 ರೇಟಿಂಗ್ ಪಾಯಿಂಟ್‌ ಹೊಂದಿರುವ ಭಾರತ ಮೂರನೇ ಸ್ಥಾನ ಮತ್ತು 106 ರೇಟಿಂಗ್ ಪಾಯಿಂಟ್‌ ಹೊಂದಿರುವ ಪಾಕಿಸ್ತಾನ ನಾಲ್ಕನೇ ಸ್ಥಾನದಲ್ಲಿದೆ.

ಪಾಕಿಸ್ತಾನವು ಮುಂದಿನ ಏಕದಿನ ಪಂದ್ಯಗಳನ್ನು ಆಡುವ ಮೊದಲು ಭಾರತ ತನ್ನ ಮುನ್ನಡೆಯನ್ನು ಇನ್ನಷ್ಟು ವಿಸ್ತರಿಸಬಹುದು. ಇಂಗ್ಲೆಂಡ್ ವಿರುದ್ಧ ಉಳಿದಿರುವ ಎರಡುಏಕದಿನ ಪಂದ್ಯಗಳನ್ನು ಗೆದ್ದು ಮತ್ತು ಈ ತಿಂಗಳ ಕೊನೆಯಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಮೂರು ಪಂದ್ಯಗಳ ಸರಣಿ ಗೆದ್ದರೆ ಇನ್ನೂ ಉತ್ತಮ ಅಂಕ ಗಳಿಸಬಹುದು. ವ್ಯತಿರಿಕ್ತವಾಗಿ ಇಂಗ್ಲೆಂಡ್ ವಿರುದ್ಧದ ಸರಣಿಯ ಅಂತಿಮ ಎರಡು ಪಂದ್ಯಗಳಲ್ಲಿ ಸೋತರೆ, ಭಾರತವು ಮತ್ತೆ ಪಾಕಿಸ್ತಾನಕ್ಕಿಂತ ಕಡಿಮೆ ಸ್ಥಾನ ಅಥವಾ ನಾಲ್ಕನೇ ಸ್ಥಾನಕ್ಕೆ ಕುಸಿಯಬಹುದು.

ಐಸಿಸಿ ಏಕದಿನ ರ್‍ಯಾಂಕಿಂಗ್ ಇಲ್ಲಿದೆ

ಪಾಕಿಸ್ತಾನದ ಮುಂದಿನ ಏಕದಿನ ಸರಣಿಯು ಆಗಸ್ಟ್ ತಿಂಗಳು ನೆದರ್‌ಲ್ಯಾಂಡ್‌ನ ವಿರುದ್ಧ ರೋಟರ್‌ಡ್ಯಾಮ್‌ನಲ್ಲಿ ನಡೆಯಲಿದೆ. ಬಾಬರ್ ಅಜಮ್ ನಾಯಕತ್ವದ ತಂಡವು ಐದು ದಿನಗಳ ಅವಧಿಯಲ್ಲಿ ಮೂರು 50-ಓವರ್‌ಗಳ ಪಂದ್ಯಗಳನ್ನು ಆಡಲು ನಿರ್ಧರಿಸಿದೆ.

1. ನ್ಯೂಜಿಲೆಂಡ್ - 126

2. ಇಂಗ್ಲೆಂಡ್ - 122

3. ಭಾರತ - 108

4. ಪಾಕಿಸ್ತಾನ - 106

5. ಆಸ್ಟ್ರೇಲಿಯಾ - 101

6. ದಕ್ಷಿಣ ಆಫ್ರಿಕಾ - 99

7. ಬಾಂಗ್ಲಾದೇಶ - 96

8. ಶ್ರೀಲಂಕಾ - 92

9. ವೆಸ್ಟ್ ಇಂಡೀಸ್ - 71

10. ಅಫ್ಘಾನಿಸ್ತಾನ - 69

ಸ್ಟುವರ್ಟ್ ಬಿನ್ನಿ ಬಾಂಗ್ಲಾದೇಶ ವಿರುದ್ಧ 4 ರನ್‌ಗಳಿಗೆ 6 ವಿಕೆಟ್

ಇಂಗ್ಲೆಂಡ್ ವಿರುದ್ಧ ಜಸ್ಪ್ರೀತ್ ಬುಮ್ರಾ ಅವರ 6/19 ಈಗ ಭಾರತೀಯರ ಮೂರನೇ ಅತ್ಯುತ್ತಮ ಏಕದಿನ ಅಂಕಿಅಂಶವಾಗಿದೆ. ಇದಕ್ಕೂ ಮುನ್ನ ಸ್ಟುವರ್ಟ್ ಬಿನ್ನಿ 2014ರಲ್ಲಿ ಬಾಂಗ್ಲಾದೇಶ ವಿರುದ್ಧ 4 ರನ್‌ಗಳಿಗೆ 6 ವಿಕೆಟ್ ಕಬಳಿಸಿದ್ದರು ಮತ್ತು 1993ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ 12 ರನ್‌ಗಳಿಗೆ 6 ವಿಕೆಟ್ ಪಡೆದು ಅನಿಲ್ ಕುಂಬ್ಳೆ ಸಾಧನೆ ಮಾಡಿದ್ದರು.

ಇದೇ ವೇಳೆ ರೋಹಿತ್ ಶರ್ಮಾ ಮತ್ತು ಶಿಖರ್ ಧವನ್ ತಮ್ಮ ಹೆಸರನ್ನು ದಾಖಲೆ ಪುಸ್ತಕಗಳಲ್ಲಿ ಬರೆದಿದರು. ಏಕೆಂದರೆ ಅವರು ಏಕದಿನ ಇತಿಹಾಸದಲ್ಲಿ 5000 ರನ್‌ಗಳನ್ನು ಒಟ್ಟಿಗೆ ದಾಟಿದ ನಾಲ್ಕನೇ ಆರಂಭಿಕ ಜೋಡಿಯಾದರು.

ಈ ಜೋಡಿ ಸಚಿನ್ ತೆಂಡೂಲ್ಕರ್ ಮತ್ತು ಸೌರವ್ ಗಂಗೂಲಿ ನಂತರ ಏಕದಿನದಲ್ಲಿ 5000 ರನ್‌ಗಳನ್ನು ದಾಟಿದ ಎರಡನೇ ಭಾರತೀಯ ಆರಂಭಿಕ ಜೋಡಿಯಾಗಿದ್ದಾರೆ. 1996-2007ರ ನಡುವೆ ಇನ್ನಿಂಗ್ಸ್ ಆರಂಭಿಸಿದ್ದ ಸಚಿನ್ ಮತ್ತು ಗಂಗೂಲಿ ಜೊತೆಯಾಗಿ 6609 ರನ್ ಗಳಿಸಿದ್ದಾರೆ.