IND vs SL: ಶನಕ 98 ರನ್ ಗಳಿಸಿದ್ದಾಗ ಮಂಕಡಿಂಗ್ ಔಟ್ ಮಾಡಿದ ಶಮಿ; ಮನವಿ ಹಿಂಪಡೆದ ರೋಹಿತ್

ಮಂಗಳವಾರ, ಜನವರಿ 10ರಂದು ಅಸ್ಸಾಂನ ಗುವಾಹಟಿಯ ಬರ್ಸಾಪರ ಕ್ರೀಡಾಂಗಣದಲ್ಲಿ ನಡೆದ ಶ್ರೀಲಂಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ತಂಡ 67 ರನ್‌ಗಳ ಭರ್ಜರಿ ಜಯ ಗಳಿಸಿ, ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಪಡೆಯಿತು.

ಪಂದ್ಯದ ಅಂತಿಮ ಓವರ್‌ನಲ್ಲಿ ಭಾರತದ ಬೌಲರ್ ಮೊಹಮ್ಮದ್ ಶಮಿ ಅವರು 98 ರನ್ ಗಳಿಸಿ ನಾನ್ ಸ್ಟ್ರೈಕರ್ ಎಂಡ್‌ನಲ್ಲಿದ್ದ ಶ್ರೀಲಂಕಾ ನಾಯಕ ದಸುನ್ ಶನಕರನ್ನು ಮಂಕಡಿಂಗ್ ಮೂಲಕ ರನೌಟ್ ಮಾಡಿದರು. ಆದರೆ, ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಅವರು ದಸುನ್ ಶನಕ ವಿರುದ್ಧದ ರನೌಟ್ ಮನವಿಯನ್ನು ಹಿಂಪಡೆದು ಕ್ರೀಡಾಸ್ಫೂರ್ತಿ ಮೆರೆದರು.

ಕೊನೆಯ ಓವರ್‌ನ 4ನೇ ಎಸೆತದಲ್ಲಿ ಭಾರತೀಯ ವೇಗಿ ಮೊಹಮ್ಮದ್ ಶಮಿ ಅವರು ಅನಗತ್ಯವಾಗಿ ಕ್ರೀಸ್‌ನಿಂದ ದೂರಕ್ಕೆ ಹೋಗಲು ಯತ್ನಿಸಿದ ದಸುನ್ ಶನಕ ಅವರನ್ನು ರನೌಟ್ ಮಾಡಿದರು. ಈ ವೇಳೆ ಅವರ ಶತಕಕ್ಕೆ ಕೇವಲ 2 ರನ್‌ಗಳ ಅವಶ್ಯಕತೆ ಇತ್ತು. ಶನಕ ವಿರುದ್ಧ ಮೊಹಮ್ಮದ್ ಶಮಿ ಖಚಿತ ರನ್ ಔಟ್ ಮಾಡುವ ಮೂಲಕ ಅಂಪೈರ್‌ಗೆ ಮನವಿ ಮಾಡಿದರು.

ಆದರೆ, ಭಾರತದ ನಾಯಕ ರೋಹಿತ್ ಶರ್ಮಾ ಅವರ ಮನವಿಯನ್ನು ಹಿಂತೆಗೆದುಕೊಳ್ಳಲು ನಿರ್ಧರಿಸಿದರು ಮತ್ತು ಶ್ರೀಲಂಕಾ ನಾಯಕ ಶನಕಗೆ ಶತಕ ಗಳಿಸುವ ಅವಕಾಶವನ್ನು ನೀಡಿದರು. ನಂತರ, ದಸುನ್ ಶನಕ ಅವರು ಪಂದ್ಯದ ಅಂತಿಮ 2 ಎಸೆತಗಳಲ್ಲಿ 10 ರನ್ ಗಳಿಸಿದರು ಮತ್ತು 88 ಎಸೆತಗಳಲ್ಲಿ ಅಜೇಯ 108 ರನ್ ಬಾರಿಸಿದರು.

ಪಂದ್ಯದ ನಂತರ ಕೊನೆಯ ಓವರ್‌ನಲ್ಲಿ ನಡೆದ ನಾಟಕೀಯ ಬೆಳವಣಿಗೆಯ ಬಗ್ಗೆ ಕೇಳಲಾದ ಪ್ರಶ್ನೆಗೆ ರೋಹಿತ್ ಶರ್ಮಾ ಉತ್ತರಿಸಿ, ದಸುನ್ ಶನಕ ಅವರನ್ನು ಮಂಕಡಿಂಗ್ ಔಟ್ ಮೂಲಕ ಶತಕ ಬಾರಿಸುವುದನ್ನು ತಪ್ಪಿಸಲು ಬಯಸುವುದಿಲ್ಲ ಎಂದು ಹೇಳಿದರು.

"ಮೊಹಮ್ಮದ್ ಶಮಿ ಔಟ್‌ಗಾಗಿ ಮನವಿ ಮಾಡಿದರು. ಆದರೆ ಶನಕ 98 ರನ್ ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದರು ಮತ್ತು ಅವರು ಬ್ಯಾಟಿಂಗ್ ಮಾಡಿದ ರೀತಿ ಅದ್ಭುತವಾಗಿತ್ತು. ಆದ್ದರಿಂದ ನಾವು ಅವನನ್ನು ಆ ರೀತಿ ಔಟ್ ಮಾಡಲು ಸಾಧ್ಯವಿಲ್ಲ. ನಾವು ಅವನನ್ನು ಔಟ್ ಮಾಡಲು ಬಯಸಿದೆವು. ಆದರೆ ಅದು ಮಂಕಡಿಂಗ್ ಮೂಲಕ ಅಲ್ಲ," ಎಂದು ರೋಹಿತ್ ಶರ್ಮಾ ಪಂದ್ಯದ ನಂತರದ ಹೇಳಿದರು.

ಅಂತಿಮ 10 ಓವರ್‌ಗಳಲ್ಲಿ ಶ್ರೀಲಂಕಾ ನಾಯಕ ದಸುನ್ ಶನಕ ಉತ್ತಮವಾಗಿ ಆಡಿದ್ದನ್ನು ಹೊರತುಪಡಿಸಿ, ಭಾರತ ಅತ್ಯುತ್ತಮ ಪ್ರದರ್ಶನ ನೀಡಿತು ಮತ್ತು ಸಮಗ್ರ ಗೆಲುವು ತಮ್ಮದಾಗಿಸಿಕೊಂಡಿತು.

ಶುಕ್ರವಾರ, ಜನವರಿ 12ರಂದು ಕೋಲ್ಕತ್ತಾದ ಈಡನ್ ಗಾರ್ಡನ್‌ನಲ್ಲಿ ಸರಣಿಯ ಎರಡನೇ ಏಕದಿನ ಪಂದ್ಯದಲ್ಲಿ ಭಾರತ ತಂಡವು ಶ್ರೀಲಂಕಾವನ್ನು ಎದುರಿಸಲಿದೆ.