ದೀಪಕ್ ಚಹಾರ್ 2ನೇ ಕೊರೊನಾ ಪರೀಕ್ಷೆಯೂ ನೆಗೆಟಿವ್, ತಂಡಕ್ಕೆ ಸೇರ್ಪಡೆ

ದುಬೈ: ಇಂಡಿಯನ್ ಪ್ರೀಮಿಯರ್ ಲೀಗ್‌ನ ಬಲಿಷ್ಠ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವೇಗಿ ದೀಪಕ್ ಚಹಾರ್ ಅವರ ಎರಡನೇ ಕೊರೊನಾವೈರಸ್ ಪರೀಕ್ಷೆಯ ಫಲಿತಾಂಶವೂ ನೆಗೆಟಿವ್ ಬಂದಿದೆ. ಹೀಗಾಗಿ ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ದುಬೈನಲ್ಲಿರುವ ತಂಡದ ಹೋಟೆಲ್‌ಗೆ ದೀಪಕ್ ಸೇರಿಕೊಂಡಿದ್ದಾರೆ.

13ನೇ ಆವೃತ್ತಿಯ ಐಪಿಎಲ್‌ಗಾಗಿ ತೆರಳಿದ್ದ ಸಿಎಸ್‌ಕೆ ತಂಡದಲ್ಲಿ ಒಟ್ಟು 13 ಮಂದಿಯಲ್ಲಿ ಕೊರೊನಾವೈರಸ್ ಕಾಣಿಸಿಕೊಂಡಿತ್ತು. ಇವರಲ್ಲಿ ದೀಪರ್ ಚಹಾರ್ ಮತ್ತು ಋತುರಾಜ್ ಗಾಯಕ್ವಾಡ್ ಕೂಡ ಇದ್ದರು. ಉಳಿದವರೆಲ್ಲರೂ ಸಿಬ್ಬಂದಿಯಾಗಿದ್ದರು. ಸೋಂಕು ತಗುಲಿದ ಎಲ್ಲರೂ ಈಗ ಗುಣಮುಖರಾಗಿದ್ದಾರೆ.

'ದೀಪಕ್ ಚಹಾರ್ ಅವರ ಕೋವಿಡ್-19 ಫಲಿತಾಂಶ ಎರಡು ಬಾರಿಯೂ ನೆಗೆಟಿವ್ ಬಂದಿದೆ. ಅವರೀಗ ಜೈವಿಕ ಸುರಕ್ಷಾ ಬಯೋ ಬಬಲ್‌ನಲ್ಲಿರುವ ಸಿಎಸ್‌ಕೆ ತಂಡವನ್ನು ಸೇರಿಕೊಂಡಿದ್ದಾರೆ,' ಎಂದು ಸಿಎಸ್‌ಕೆ ಸಿಇಒ ಕೆಎಸ್ ವಿಸ್ವನಾಥನ್ ಪಿಟಿಐಗೆ ತಿಳಿಸಿದ್ದಾರೆ.

'ಬೋರ್ಡ್ ಆಫ್ ಕಂಟ್ರೋಲ್ ಫಾರ್ ಕ್ರಿಕೆಟ್ ಇನ್ ಇಂಡಿಯಾದ ಮಾರ್ಗಸೂಚಿಯಂತೆ ಇನ್ನು ಚಹಾರ್ ಹೃದಯರಕ್ತನಾಳದ ಪರೀಕ್ಷೆಗೆ ಒಳಗಾಗಲಿದ್ದಾರೆ. ಅಲ್ಲಿ ಅವರು ಸಂಪೂರ್ಣ ಚೇತರಿಸಿಕೊಂಡಿರುವುದು ತಿಳಿದುಬರಲಿದೆ. ಅದಾಗಿ ಮತ್ತೊಂದು ಕೋವಿಡ್ ಪರೀಕ್ಷೆಗೆ ದೀಪಕ್ ಒಳಗಾಗಲಿದ್ದಾರೆ. ಅಲ್ಲಿ ನೆಗೆಟಿವ್ ಬಂದ ಮೇಲೆ ಅಭ್ಯಾಸಕ್ಕೆ ಸೇರ್ಪಡೆಯಾಗಲಿದ್ದಾರೆ,' ಎಂದು ವಿಸ್ವನಾಥನ್ ಮಾಹಿತಿ ನೀಡಿದ್ದಾರೆ.