IPL 2024: ಮೊಹಮ್ಮದ್ ಶಮಿಗೆ ಗಾಯ; ಶುಭ್ಮನ್ ಗಿಲ್‌ಗೆ ಬರೆ; ಐಪಿಎಲ್‌ನಿಂದ ಸ್ಟಾರ್ ಬೌಲರ್ ಔಟ್!

2024ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ (ಐಪಿಎಲ್) 17ನೇ ಆವೃತ್ತಿ ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಇದೇ ವೇಳೆ ಬಿಸಿಸಿಐ ಮೊದಲ ಹಂತದ ವೇಳಾಪಟ್ಟಿ ಪ್ರಕಟಿಸಲು ಸಜ್ಜಾಗಿದ್ದರೆ, ಮತ್ತೊಂದು ಕಡೆ ಎಲ್ಲಾ ಹತ್ತು ಫ್ರಾಂಚೈಸಿಗಳು ಟೂರ್ನಿಗಾಗಿ ಸಿದ್ಧತೆ ನಡೆಸುತ್ತಿವೆ.

ಇದೀಗ ಭಾರತ ತಂಡದ ಸ್ಟಾರ್ ಬೌಲರ್ ಮೊಹಮ್ಮದ್ ಶಮಿ 2024ರ ಐಪಿಎಲ್ ಪಂದ್ಯಾವಳಿಯಿಂದ ಹೊರಗುಳಿದಿದ್ದಾರೆ. ಇದು ಅವರ ತಂಡವಾದ ಗುಜರಾತ್ ಟೈಟನ್ಸ್‌ಗೆ ಭಾರೀ ಹಿನ್ನಡೆ ಉಂಟಾಗಲಿದೆ.

ಅನುಭವಿ ವೇಗಿ ಮೊಹಮ್ಮದ್ ಶಮಿ ಎಡ ಪಾದದ ಗಾಯದ ಕಾರಣ, ಮುಂದಿನ ತಿಂಗಳ ಇಂಡಿಯನ್ ಪ್ರೀಮಿಯರ್ ಲೀಗ್‌ನಿಂದ ಹೊರಗುಳಿದಿದ್ದು, ಇದಕ್ಕಾಗಿ ಲಂಡನ್‌ನಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಲಿದ್ದಾರೆ ಎಂದು ಬಿಸಿಸಿಐ ಮೂಲಗಳು ಗುರುವಾರ, ಫೆಬ್ರವರಿ 22ರಂದು ಪಿಟಿಐಗೆ ತಿಳಿಸಿವೆ.

ಸದ್ಯ ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಯಿಂದಲೂ ಹೊರಗುಳಿದಿರುವ 33 ವರ್ಷದ ಮೊಹಮ್ಮದ್ ಶಮಿ ಕಳೆದ ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ವಿಶ್ವಕಪ್ ಫೈನಲ್‌ನಲ್ಲಿ ಕೊನೆಯ ಬಾರಿಗೆ ಭಾರತ ತಂಡಕ್ಕಾಗಿ ಆಡಿದ್ದರು.

"ಮೊಹಮ್ಮದ್ ಶಮಿ ಎಡ ಪಾದದ ಚಿಕಿತ್ಸೆ ಪಡೆಯಲು ಜನವರಿ ಕೊನೆಯ ವಾರದಲ್ಲಿ ಲಂಡನ್‌ಗೆ ತೆರಳಿದ್ದರು ಮತ್ತು ಮೂರು ವಾರಗಳ ನಂತರ ಅವರು ಲಘು ಓಟವನ್ನು ಪ್ರಾರಂಭಿಸಬಹುದು ಎಂದು ಅವರಿಗೆ ತಿಳಿಸಲಾಯಿತು. ಆದರೆ ಇಂಜೆಕ್ಷನ್ ಕೆಲಸ ಮಾಡಲಿಲ್ಲ ಮತ್ತು ಈಗ ಉಳಿದಿರುವ ಏಕೈಕ ಆಯ್ಕೆ ಎಂದರೆ ಶಸ್ತ್ರಚಿಕಿತ್ಸೆ".

"ಶಸ್ತ್ರಚಿಕಿತ್ಸೆಗಾಗಿ ಮೊಹಮ್ಮದ್ ಶಮಿ ಶೀಘ್ರದಲ್ಲೇ ಯುಕೆಗೆ ತೆರಳಲಿದ್ದಾರೆ. ಅವರಿಗೆ ಐಪಿಎಲ್ ಪ್ರಮುಖವಾಗಿರಲ್ಲ ಎಂದು ತೋರುತ್ತದೆ," ಎಂದು ಬಿಸಿಸಿಐ ಅನಾಮಧೇಯ ಮೂಲಗಳು ತಿಳಿಸಿವೆ.

24 ವಿಕೆಟ್‌ಗಳೊಂದಿಗೆ ಭಾರತ ತಂಡದ ಪರ ಅದ್ಭುತ ವಿಶ್ವಕಪ್ ಅಭಿಯಾನದ ಆಟಗಾರರಲ್ಲಿ ಒಬ್ಬರಾಗಿದ್ದ ಮೊಹಮ್ಮದ್ ಶಮಿ, ತಮ್ಮ ಪಾದದ ಲ್ಯಾಂಡಿಂಗ್‌ನಲ್ಲಿ ತೊಂದರೆಗಳನ್ನು ಹೊಂದಿದ್ದರಿಂದ, ನೋವಿನಿಂದ ಆಡಿದರು. ಆದರೆ ಅದು ಅವರ ಪ್ರದರ್ಶನದ ಮೇಲೆ ಪರಿಣಾಮ ಬೀರಲು ಬಿಡಲಿಲ್ಲ.

ಇತ್ತೀಚೆಗಷ್ಟೇ ಅರ್ಜುನ ಪ್ರಶಸ್ತಿಗೆ ಭಾಜನರಾದ ಮೊಹಮ್ಮದ್ ಶಮಿ, ತಮ್ಮ ದಶಕದ ವೃತ್ತಿಜೀವನದಲ್ಲಿ 229 ಟೆಸ್ಟ್, 195 ಏಕದಿನ ಮತ್ತು 24 ಟಿ20 ವಿಕೆಟ್‌ಗಳನ್ನು ಪಡೆದಿದ್ದಾರೆ.

ಈ ಬೆಳವಣಿಗೆಯು ಮೊಹಮ್ಮದ್ ಶಮಿ ಅವರಿಗಾಗಿ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ (ಎನ್‌ಸಿಎ) ಯೋಜಿಸಿರುವ ಗಾಯದ ಪುನರ್ವಸತಿ ನಿರ್ವಹಣಾ ಕಾರ್ಯಕ್ರಮದ ಬಗ್ಗೆ ಪ್ರಶ್ನಾರ್ಥಕ ಚಿಹ್ನೆಯನ್ನು ಹುಟ್ಟುಹಾಕಿದೆ.

ಬಾಂಗ್ಲಾದೇಶ ಮತ್ತು ನ್ಯೂಜಿಲೆಂಡ್ ವಿರುದ್ಧದ (ಅಕ್ಟೋಬರ್-ನವೆಂಬರ್) ತವರಿನಲ್ಲಿ ಭಾರತ ತಂಡದ ಟೆಸ್ಟ್ ಪಂದ್ಯಗಳನ್ನು ಆಡುವ ಮೊದಲು ವೇಗದ ಬೌಲರ್ ಪುನರಾಗಮನ ಮಾಡಲು ಸಾಧ್ಯವಾಗುವ ಸಾಧ್ಯತೆಯಿಲ್ಲ.