ಬ್ಯಾಟಿಂಗ್‌ ಮರೆತು ಸೋತ್ರಾ ಪ್ರೀತಿ ಹುಡುಗರು!

ಮೊದಲ ಪಂದ್ಯದಲ್ಲಿ ಸೋತ ಪ್ರೀತಿ ಹುಡುಗರು

ಬಲಾಡ್ಯ ಬ್ಯಾಟಿಂಗ್‌ ಕ್ರಮಾಂಕ ಹೊಂದಿರುವ ಕಿಂಗ್ಸ್‌ ಇಲವೆನ್‌ ಪಂಜಾಬ್ ಐಪಿಎಲ್ 8ನೇ ಅವೃತ್ತಿಯ ತನ್ನ ಮೊದಲ ಪಂದ್ಯದಲ್ಲಿ 26ರನ್‌ಗಳ ಸೋಲು ಅನುಭವಿಸಿದೆ. ರಾಜಸ್ಥಾನ ರಾಯಲ್ಸ್ ನೀಡಿದ್ದ 163 ರನ್‌ಗಳ ಗುರಿಯನ್ನು ತಲುಪಲು ಪಂಜಾಬ್ ವಿಫಲವಾಯಿತು.

163 ರನ್ ಟಾರ್ಗೆಟ್ ನೀಡಿದ ರಾಜಸ್ಥಾನ

ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗೆ ಇಳಿದ ರಾಜಸ್ಥಾನ ರಾಯಲ್ಸ್, ಆರಂಭಿಕ ವೈಫಲ್ಯದ ಹೊರತಾಗಿಯೂ 20 ಓವರ್‌ನಲ್ಲಿ 7 ವಿಕೆಟ್‌ ನಷ್ಟಕ್ಕೆ 162 ರನ್‌ಗಳಿಸಿ, ಪಂಜಾಬ್‌ಗೆ 163 ರನ್‌ಗಳ ಗುರಿ ನೀಡಿತು.

ನಿರೀಕ್ಷೆ ಹುಸಿ ಮಾಡಿದ ಪ್ರೀತಿ ಹುಡುಗರು

ಬಲಿಷ್ಠ ಬ್ಯಾಟಿಂಗ್ ಕ್ರಮಾಂಕ ಹೊಂದಿರುವ ಪಂಜಾಬ್ ಆಟಗಾರರು ನಿರಾಸೆ ಮೂಡಿಸಿದರು. ವೀರೇಂದ್ರ ಸೆಹ್ವಾಗ್ ಡಕ್‌ ಔಟ್‌ ಆದರು, ಮ್ಯಾಕ್ಸ್‌ವೆಲ್ ಕೇವಲ 7 ರನ್ ಗಳಿಸಿದರು. ಮುರಳಿ ವಿಜಯ್ (37), ವೃದ್ಧಿಮಾನ್ ಸಹಾ (7), ಅಕ್ಷರ್ ಪಟೇಲ್ (24), ಡೇವಿಡ್ ಮಿಲ್ಲರ್ (23), ಜಾರ್ಜ್ ಬೈಲಿ (24) ರನ್‌ ಗಳಿಸಿದರೂ ತಂಡ ಜಯಗಳಿಸಲಿಲ್ಲ.

ಮಿಂಚಿದ ಜೇಮ್ಸ್ ಫಾಲ್ಕನರ್

ರಾಜಸ್ಥಾನ ತಂಡಕ್ಕೆ ಜೇಮ್ಸ್ ಫಾಲ್ಕನರ್ ಆಸರೆಯಾದರು. 75ಕ್ಕೆ 5 ವಿಕೆಟ್ ಕಳೆದುಕೊಂಡಿದ್ದಾಗ ಜೊತೆಯಾದ ಜೇಮ್ಸ್ ಫಾಲ್ಕನರ್ (46) ಹಾಗೂ ದೀಪರ್ ಹೂಡಾ (30) 36 ಎಸೆತಗಳಲ್ಲಿ 51 ರನ್ ಜತೆಯಾಟ ನಡೆಸಿ ತಂಡಕ್ಕೆ ಬಲ ತುಂಬಿದರು. ಬಿರುಸಿನ ಆಟವಾಡಿದ ಫಾಲ್ಕನರ್ 33 ಬಾಲ್‌ಗಳಲ್ಲಿ 2 ಬೌಂಡರಿ ಹಾಗೂ 3 ಸಿಕ್ಸರ್ ಸಿಡಿಸಿದರು.

ಬೌಲಿಂಗ್‌ನಲ್ಲಿ ಪಂಜಾಬ್ ಪರಾಕ್ರಮ

ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡ ಪಂಜಾಬ್ ರಾಜಸ್ಥಾನ್ ಅನ್ನು ಅಲ್ಪಮೊತ್ತಕ್ಕೆ ಕಟ್ಟಿಹಾಕುವ ತಂತ್ರ ರೂಪಿಸಿತ್ತು. ಅದರಂತೆ ಅನುರೀತ್ ಸಿಂಗ್ 3, ಮಿಚೆಲ್ ಜಾನ್ಸನ್ 4 ವಿಕೆಟ್ ಪಡೆದರು.