ಭವಿಷ್ಯದಲ್ಲಿ ಭಾರತ ತಂಡವನ್ನು ಮುನ್ನಡೆಸಲು ಈತನೇ ಸೂಕ್ತ ಎಂದ ಪಾಕಿಸ್ತಾನದ ದಿಗ್ಗಜ ಕ್ರಿಕೆಟಿಗ

ಹಾರ್ದಿಕ್ ಭಾರತದ ನಾಯಕನಾದರೆ ನನಗೆ ಅಚ್ಚರಿಯಾಗದು

ಪಾಕಿಸ್ತಾನ ತಂಡದ ಮಾಜಿ ನಾಯಕ ವಾಕರ್ ಯೂನಿಸ್ ಹಾರ್ದಿಕ್ ಪಾಂಡ್ಯ ಬಗ್ಗೆ ವಿಶೇಷ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಹಾರ್ದಿಕ್ ಪಾಂಡ್ಯ ಭವಿಷ್ಯದಲ್ಲಿ ಭಾರತ ತಂಡದ ನಾಯಕನಾದರೆ ನನಗೆ ಅಚ್ಚರಿಯಾಗದು ಎಂದಿದ್ದಾರೆ ವಾಕರ್ ಯೂನಿಸ್. ವಾಕರ್ ಯೂನಿಸ್ ಮಾತಿಗೆ ಮತ್ತೋರ್ವ ಪಾಕಿಸ್ತಾನದ ದಿಗ್ಗಜ ಆಟಗಾರ ವಾಸಿಂ ಅಕ್ರಮ್ ಕೂಡ ದನಿಗೂಡಿಸಿದ್ದು ಐಪಿಎಲ್‌ನಲ್ಲಿಯೂ ಹಾರ್ದಿಕ್ ಪಾಂಡ್ಯ ನಾಯಕನಾಗಿ ಅತ್ಯಂತ ಯಶಸ್ಸು ಸಾಧಿಸಿದ್ದು ಈಗ ಭಾರತ ತಂಡದಲ್ಲಿ ಒಂದು ಶಕ್ತಿಯಾಗಿದ್ದಾರೆ ಎಂದಿದ್ದಾರೆ.

ನಾಯಕನಿಗೆ ಸಲಹೆಗಳನ್ನು ನೀಡುತ್ತಿದ್ದಾರೆ ಎಂದ ಅಕ್ರಮ್

ವಾಕರ್ ಯೂನಿಸ್ ಮಾತಿಗೆ ವಾಸಿಂ ಅಕ್ರಮ್ ಬೆಂಬಲ ಸೂಚಿಸಿದ್ದಾರೆ. "ಮೊದಲಿಗೆ ಆತ ಐಪಿಎಲ್‌ನಲ್ಲಿ ನಾಯಕನಾಗಿ ಅಲ್ಲಿ ಗೆಲುವು ಸಾಧಿಸಿದರು. ಈಗ ಭಾರತ ತಂಡದಲ್ಲಿಯೇ ದೊಡ್ಡ ಶಕ್ತಿಯಾಗಿದ್ದು ನಾಯಕನಿಗೇ ಸಲಹೆಗಳನ್ನು ನೀಡುತ್ತಿದ್ದಾರೆ. ಆತ ಸಾಕಷ್ಟು ತಾಳ್ಮೆಯಿಂದಿದ್ದು ಸಾಕಷ್ಟು ವಿಚಾರಗಳನ್ನು ಕಲಿಯುತ್ತಿದ್ದಾರೆ" ಎಂದು ವಾಸಿಂ ಅಕ್ರಮ್ ಕೂಡ ಹೇಳಿಕೆ ನೀಡಿದ್ದಾರೆ.

ಗೆಲುವಿನ ಜೊತೆಯಾಟ ನೀಡಿದ ಹಾರ್ದಿಕ್

ಭಾನುವಾರ ನಡೆದ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಹಾರ್ದಿಕ್ ಪಾಂಡ್ಯ ನೀಡಿದ ಪ್ರದರ್ಶನ ಕ್ರಿಕೆಟ್ ಅಭಿಮಾನಿಗಳ ಹೃದಯಗೆಲ್ಲುವಲ್ಲಿ ಯಶಸ್ವಿಯಾಯಿತು. ಸುಲಭ ಸೋಲಿಗೆ ಒಳಗಾಗುವ ಆತಂಕದಲ್ಲಿದ್ದಾಗ ವಿರಾಟ್ ಕೊಹ್ಲಿಗೆ ಜೊತೆಯಾದ ಪಾಂಡ್ಯ ಅಮೋಘ ಜೊತೆಯಾಟದಲ್ಲೊಇ ಭಾಗಿಯಾದರು. ಕೊಹ್ಲಿ ಹಾಗೂ ಹಾರ್ದಿಕ್ ಜೋಡಿ ನಿರ್ಣಾಯಕ 113 ರನ್‌ಗಳ ಕೊತೆಯಾಟವನ್ನು ನೀಡಿದರು. ಅಂತಿಮ ಓವರ್‌ವರೆಗೂ ಹೋರಾಡಿದ ಪಾಂಡ್ಯ ಭಾರತ ತಂಡದ ಗೆಲುವಿನಲ್ಲಿ ಮಹತ್ವದ ಪಾತ್ರವಹಿಸಿದ್ದಾರೆ. ಬ್ಯಾಟಿಂಗ್‌ನಲ್ಲಿ ಮಾತ್ರವಲ್ಲದೆ ಬೌಲಿಂಗ್‌ನಲ್ಲಿಯೂ ಮಿಂಚಿದ್ದ ಅವರು ಮೂರು ವಿಕೆಟ್ ಕಿತ್ತು ಪೊಆಕ್ ದಾಂಡಿಗರಿಗೆ ಆಘಾತ ನೀಡಿದ್ದರು.

ಕಳೆದ ಐಪಿಎಲ್ ಬಳಿಕ ಸಂಪೂರ್ಣ ಬದಲಾದ ಪಾಂಡ್ಯ

ಕಳೆದ ವರ್ಷದ ವಿಶ್ವಕಪ್‌ನಲ್ಲಿ ಫಿಟ್ನೆಸ್ ಸಮಸ್ಯೆಗೆ ಒಳಗಾಗಿ ಸಾಕಷ್ಟು ಟೀಕೆಗೆ ಗುರಿಯಾಗಿದ್ದ ಹಾರ್ದಿಕ್ ಪಾಂಡ್ಯ ಬಳಿಕ ತಂಡದಿಂದ ಸುದೀರ್ಘ ಕಾಲ ಹೊರಬಿದ್ದಿದ್ದರು. ಬಳಿಕ ಐಪಿಎಲ್ ಮೂಲಕ ಕಮ್‌ಬ್ಯಾಕ್ ಮಾಡಿದ ಹಾರ್ದಿಕ್ ಐಪಿಎಲ್‌ನ ಹೊಸ ತಂಡವಾದ ಗುಜರಾತ್ ಟೈಟನ್ಸ್ ತಂಡದ ಚುಕ್ಕಾಣಿ ಹಿಡಿದರು. ಈ ಟೂರ್ನಿಯಲ್ಲಿ ನಾಯಕನಾಗಿ ಅದ್ಭುತವಾಗಿ ತಂಡವನ್ನು ಮುನ್ನಡೆಸಿದ ಹಾರ್ದಿಕ್ ಪಾಂಡ್ಯ ಬ್ಯಾಟಿಂಗ್‌ನಲ್ಲಿಯೂ ಜವಾಬ್ಧಾರಿ ತೆಗೆದುಕೊಂಡು ಅಮೋಘ ಪ್ರದರ್ಶನ ನೀಡಿದರು. ಸಮಯಕ್ಕೆ ತಕ್ಕನಾಗಿ ಪ್ರದರ್ಶನ ನೀಡುವ ಮೂಲಕ ತಾನು ಬ್ಯಾಟರ್ ಆಗಿ ಎಷ್ಟು ಪರಿಣಾಮಕಾರಿ ಎಂಬುದನ್ನು ಸಾಬೀತುಪಡಿಸಿದರು. ಈ ಮೂಲಕ ಮತ್ತೆ ಭಾರತ ತಂಡಕ್ಕೆ ಕಮ್‌ಬ್ಯಾಕ್ ಮಾಡಿದ ಹಾರ್ದಿಕ್ ಪಾಂಡ್ಯ ಅಮೋಘ ಫಾರ್ಮ್ ಮುಂದುವರಿಸಿಕೊಂಡು ಬಂದಿದ್ದಾರೆ.