T20 World Cup 2024: ಮುಂದಿನ ಟಿ20 ವಿಶ್ವಕಪ್‌ಗೆ ಅರ್ಹತೆ ಪಡೆದ ಪಪುವಾ ನ್ಯೂಗಿನಿಯಾ

ವೆಸ್ಟ್ ಇಂಡೀಸ್ ಮತ್ತು ಯುಎಸ್‌ಎನಲ್ಲಿ ನಡೆಯಲಿರುವ 2024ರ ಐಸಿಸಿ ಪುರುಷರ ಟಿ20 ವಿಶ್ವಕಪ್‌ ಪಂದ್ಯಾವಳಿಗೆ ಪಪುವಾ ನ್ಯೂಗಿನಿಯಾ ಅರ್ಹತೆ ಪಡೆದ ಮತ್ತೊಂದು ಹೊಸ ತಂಡವಾಗಿದೆ.

ಪಪುವಾ ನ್ಯೂಗಿನಿಯಾ 2024ರ ಟಿ20 ವಿಶ್ವಕಪ್‌ ಪಂದ್ಯಾವಳಿಗೆ ಅರ್ಹತೆ ಪಡೆದ 15ನೇ ತಂಡವಾಗಿದೆ ಮತ್ತು ಪೂರ್ವ ಏಷ್ಯಾ-ಪೆಸಿಫಿಕ್ ಕ್ವಾಲಿಫೈಯರ್‌ನ ಏಕೈಕ ತಂಡವಾಗಿದೆ.

ಶುಕ್ರವಾರ, ಜುಲೈ 27ರಂದು ಅಮಿನಿ ಪಾರ್ಕ್‌ನಲ್ಲಿ ಫಿಲಿಪೈನ್ಸ್ ವಿರುದ್ಧ 100 ರನ್‌ಗಳ ಬೃಹತ್ ಗೆಲುವು ಸಾಧಿಸಿದ ನಂತರ, ಪಪುವಾ ನ್ಯೂಗಿನಿಯಾ ಟಿ20 ವಿಶ್ವಕಪ್‌ಗೆ ಅರ್ಹತೆ ಪಡೆಯುವ ತನ್ನ ಕೆಲಸವನ್ನು ಪೂರ್ಣಗೊಳಿಸುವಲ್ಲಿ ಯಶಸ್ವಿಯಾಗಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಪಪುವಾ ನ್ಯೂಗಿನಿಯಾ ತಂಡದ ಪರ ಟೋನಿ ಉರಾ 61 ರನ್, ನಾಯಕ ಅಸ್ಸಾದ್ ವಾಲಾ 59 ರನ್ ಮತ್ತು ಚಾರ್ಲ್ಸ್ ಅಮಿನಿ 53 ರನ್ ಗಳಿಸುವ ಮೂಲಕ ತಂಡದ ಮೊತ್ತವನ್ನು ನಿಗದಿತ 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 229 ರನ್‌ಗಳಿಗೆ ಹಿಗ್ಗಿಸಿದರು.

ಇದಕ್ಕೆ ಪ್ರತ್ಯುತ್ತರವಾಗಿ, ಫಿಲಿಪೈನ್ಸ್ ತಂಡ ಗುರಿ ಬೆನ್ನಟ್ಟಲು ಹೆಣಗಾಡಿತು ಮತ್ತು ಆಲೌಟ್ ಆಗದಿದ್ದರೂ, ದೊಡ್ಡ ಅಂತರದಿಂದ ಸೋತು ಮುಖಭಂಗ ಅನುಭವಿಸಿತು.

ಪಪುವಾ ನ್ಯೂಗಿನಿಯಾ ತಂಡದ ಮಧ್ಯಮ ವೇಗಿ ಕಬುವಾ ಮೋರಿಯಾ ಎರಡು ವಿಕೆಟ್‌ಗಳನ್ನು ಕಬಳಿಸಿದರೆ, ಸೆಸೆ ಬೌ, ಜಾನ್ ಕರಿಕೊ ಮತ್ತು ಹ್ರಿ ಹಿರಿ ಅವರು ಕಡಿಮೆ ರನ್ ಬಿಟ್ಟುಕೊಟ್ಟರು.

ಐದು ಪಂದ್ಯಗಳ ನಂತರ, ಪಪುವಾ ನ್ಯೂಗಿನಿಯಾ ತಂಡ ಎಲ್ಲ ಪಂದ್ಯಗಳನ್ನು ಗೆಲ್ಲುವ ಮೂಲಕ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಇನ್ನು ಶನಿವಾರದಂದು ಜಪಾನ್ ವಿರುದ್ಧ ಪಂದ್ಯವನ್ನು ಆಡಲಿದ್ದು, ಇದು ಅನೌಪಚಾರಿಕವಾಗಿದೆ.

20 ತಂಡಗಳ ಐಸಿಸಿ ಟಿ20 ಪಂದ್ಯಾವಳಿಯನ್ನು ಇನ್ನೂ ಐದು ಸ್ಥಾನಗಳಿವೆ. ಬರ್ಮುಡಾದಲ್ಲಿ ನಡೆಯಲಿರುವ ಅಮೆರಿಕಸ್ ಕ್ವಾಲಿಫೈಯರ್‌ನಿಂದ ಒಂದು ತಂಡವು ಸ್ಥಾನ ಪಡೆದರೆ, ನೇಪಾಳ ಮತ್ತು ನಮೀಬಿಯಾದಲ್ಲಿ ನಡೆಯಲಿರುವ ಏಷ್ಯಾ ಮತ್ತು ಆಫ್ರಿಕಾದ ಕ್ವಾಲಿಫೈಯರ್‌ನಿಂದ ತಲಾ ಎರಡು ಉಳಿದ ನಾಲ್ಕು ಸ್ಥಾನಗಳನ್ನು ತುಂಬಲಿದೆ.