ಪ್ರೊ ಕಬಡ್ಡಿ 2021: ಪುಣೇರಿ ಪಲ್ಟರ್ ವಿರುದ್ಧ ತಮಿಳ್ ತಲೈವಾಸ್‌ಗೆ ಗೆಲುವು, ಟೂರ್ನಿಯಲ್ಲಿ ಮೊದಲ ಜಯ

ಶುಕ್ರವಾರ ನಡೆದ ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಪುಣೇರಿ ಪಲ್ಟನ್ ವಿರುದ್ಧ ತಮಿಳ್ ತಲೈವಾಸ್ 36-26 ಅಂತರದ ಗೆಲುವು ಸಾಧಿಸಿದೆ. ಬದಲಿ ಆಟಗಾರನಾಗಿ ಕಣಕ್ಕಿಳಿದಿದ್ದ ಅಜಿಂಕ್ಯ ಪವಾರ್ 11 ರೇಡ್‌ಗಳಲ್ಲಿ 11 ಪಾಯಿಂಟ್ಸ್‌ ಕಲೆಹಾಕುವ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ರು. ಅಜಿಂಕ್ಯಗೆ ಮಂಜಿತ್ ಉತ್ತಮ ಸಾಥ್ ನೀಡಿದ್ದು 8 ಪಾಯಿಂಟ್ಸ್ ತಂಡಕ್ಕೆ ಸೇರಿಸಿದ್ರು.

36 ಪಾಯಿಂಟ್ಸ್ ಕಲೆಹಾಕಿದ ತಮಿಳು ತಲೈವಾಸ್‌ಗೆ ಈ ಸೀಸನ್‌ನ ಮೊದಲ ಗೆಲುವು ಇದಾಗಿದೆ. ಎದುರಾಳಿ ಪುಣೇರಿ ಪಲ್ಟನ್ ಪರ ಪಂಕಜ್ ಮೊಹಿತೆ 8, ಅಭಿಷೇಕ್ ನಾದರಾಜನ್ 4, ಅಸ್ಲಾಂ ಇನಾಮ್‌ದಾರ್ 4, ವಿಶಾಲ್ ಭಾರಧ್ವಜ್ 4 ಪಾಯಿಂಟ್ಸ್‌ ಕಲೆಹಾಕಿದ್ದಾರೆ.

ಮತ್ತೊಂದು ಪಂದ್ಯದಲ್ಲಿ, ಪಾಟ್ನ ಪರ ಮೋನು ಗೋಯತ್ ರೇಡಿಂಗ್‌ನ ಅತ್ಯಂತ ರೋಮಾಂಚನಕಾರಿ ಪ್ರದರ್ಶನ ನೀಡಿದ್ರು, ಒಂದೇ ದಾಳಿಯಲ್ಲಿ ಏಳು ಅಂಕಗಳನ್ನು ಗಳಿಸಿದರು. ಒಟ್ಟು 15 ಪಾಯಿಂಟ್ಸ್ ಕಲೆಹಾಕಿದ ಪಾಟ್ನ ಪೈರೇಟ್ಸ್‌ ಬೆಂಗಾಲ್ ವಾರಿಯರ್ಸ್ ವಿರುದ್ಧ 43-29 ಅಂತರದಲ್ಲಿ ಗೆಲುವು ಸಾಧಿಸಿತು.

ಬೆಂಗಾಲ್ ವಾರಿಯರ್ಸ್ ಪರ ಮಣಿಂದರ್ ಸಿಂಗ್ 12 ಪಾಯಿಂಟ್ಸ್ ಕಲೆಹಾಕಿ ಏಕಾಂಗಿ ಹೋರಾಟ ನಡೆಸಿದ್ರು. ಅಮಿತ್ ಐದು ಟ್ಯಾಕಲ್ ಪಾಯಿಂಟ್ಸ್‌ನೊಂದಿಗೆ ತಂಡದ ಪಾಯಿಂಟ್ಸ್ ಹೆಚ್ಚಿಸಿದ್ರು.

ಈ ಗೆಲುವಿನಿಂದ ಪಾಟ್ನಾ ಪೈರೇಟ್ಸ್ ಪಾಯಿಂಟ್ಸ್ ಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೆ ಏರಿದರೆ, ಬೆಂಗಾಲ್ ವಾರಿಯರ್ಸ್ ಈಗ ಎಂಟನೇ ಸ್ಥಾನದಲ್ಲಿದೆ.