SL vs IRE: ಕುಸಾಲ್ ಮೆಂಡೀಸ್ ಭರ್ಜರಿ ಬ್ಯಾಟಿಂಗ್; ಶ್ರೀಲಂಕಾಗೆ ಸುಲಭ ತುತ್ತಾದ ಐರ್ಲೆಂಡ್

ಕುಸಾಲ್ ಮೆಂಡೀಸ್ ಅಜೇಯ 68 ರನ್

ಕುಸಾಲ್ ಮೆಂಡೀಸ್, ಧನಂಜಯ ಡಿ ಸಿಲ್ವ ಮತ್ತು ಚರಿತ್ ಅಸಲಂಕಾ ಅವರ ಅಮೋಘ ಬ್ಯಾಟಿಂಗ್ ಪ್ರದರ್ಶನವು ಐರ್ಲೆಂಡ್ ಬೌಲಿಂಗ್ ಪಡೆಯನ್ನು ಧೂಳಿಪಟ ಮಾಡಿತು. 43 ಎಸೆತಗಳಲ್ಲಿ 5 ಬೌಂಡರಿ ಮತ್ತು 3 ಸಿಕ್ಸರ್ ಸಮೇತ 68 ರನ್ ಗಳಿಸಿದ ಕುಸಾಲ್ ಮೆಂಡೀಸ್ ಭರ್ಜರಿ ಅರ್ಧಶತಕ ಗಳಿಸುವ ಮೂಲಕ ಶ್ರೀಲಂಕಾ ಪರ ದೊಡ್ಡ ಸ್ಕೋರರ್ ಎನಿಸಿದರು.

ಇನ್ನು ಧನಂಜಯ ಡಿ ಸಿಲ್ವ (31) ಮತ್ತು ಚರಿತ್ ಅಸಲಂಕಾ (31) ಗಳಿಸುವ ಮೂಲಕ ತಂಡದ ಗೆಲುವಿಗೆ ಕೊಡುಗೆ ನೀಡಿದರು. ಇದೇ ವೇಳೆ ಐರ್ಲೆಂಡ್ ಪರ ಗರೆಥ್ ಡೆಲಾನಿ 4 ಓವರ್‌ಗಳಲ್ಲಿ 28 ರನ್ ನೀಡಿ ಏಕೈಕ ವಿಕೆಟ್ ಪಡೆದರು.

ಶ್ರೀಲಂಕಾ ತಂಡದ ಪ್ರಭಾವಿ ಬೌಲಿಂಗ್ ದಾಳಿ

ಶ್ರೀಲಂಕಾ ವಿರುದ್ಧ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಆಂಡ್ರ್ಯೂ ಬಲ್ಬಿರ್ನಿ ನಾಯಕತ್ವದ ಐರ್ಲೆಂಡ್ ತಂಡವು ದಸುನ್ ಶನಕ ನಾಯಕತ್ವದ ಶ್ರೀಲಂಕಾ ತಂಡದ ಸಮಗ್ರ ಪ್ರದರ್ಶನದಿಂದಾಗಿ ದೊಡ್ಡ ಮೊತ್ತ ಗಳಿಸುವಲ್ಲಿ ವಿಫಲವಾಯಿತು.

ಶ್ರೀಲಂಕಾ ತಂಡದ ಪ್ರಭಾವಿ ಬೌಲಿಂಗ್ ದಾಳಿಗೆ ಐರ್ಲೆಂಡ್ ತಂಡದ ಬ್ಯಾಟರ್‌ಗಳು ಅಕ್ಷರಶಃ ತತ್ತರಿಸಿ ಹೋದರು. ಮಹೀಶ್ ತೀಕ್ಷಣ ಮತ್ತು ವನಿಂದು ಹಸರಂಗಾ ಅವರ ಅತ್ಯುತ್ತಮ ಸ್ಪಿನ್ ಬೆಲೆಗೆ ಬಿದ್ದ ಐರ್ಲೆಂಡ್ ತಂಡ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ ಕೇವಲ 128 ರನ್‌ ಗಳಿಸಿತು.

ಪಾಲ್ ಸ್ಟಿರ್ಲಿಂಗ್ (34), ಹ್ಯಾರಿ ಟೆಕ್ಟರ್ (45)

ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧರಿಸಿದ ನಂತರ ಐರ್ಲೆಂಡ್ ನಿಯಮಿತವಾಗಿ ವಿಕೆಟ್ ಪತನವನ್ನು ಎದುರಿಸಿತು. ಪಾಲ್ ಸ್ಟಿರ್ಲಿಂಗ್ (34), ಹ್ಯಾರಿ ಟೆಕ್ಟರ್ (45) ಮತ್ತು ಜಾರ್ಜ್ ಡಾಕ್ರೆಲ್ (14) ಅವರ ಜೊತೆಯಾಟದೊಂದಿಗೆ ಇನ್ನಿಂಗ್ಸ್ ಅನ್ನು ಸ್ಥಿರಗೊಳಿಸಿದರು. ಆದರೆ ಧನಂಜಯ ಡಿ ಸಿಲ್ವಾ, ತೀಕ್ಷಣ ಮತ್ತು ಬಿನುರಾ ಫೆರ್ನಾಂಡೋ ಈ ಬ್ಯಾಟರ್‌ಗಳನ್ನು ಔಟ್ ಮಾಡಿದರು. ಉಳಿದಂತೆ ವನಿಂದು ಹಸರಂಗ ಮತ್ತು ಮಹೇಶ್ ತೀಕ್ಷಣ ತಲಾ ಎರಡು ವಿಕೆಟ್‌ ಪಡೆದು ಮಿಂಚಿದರು.