ಪೋರ್ಚುಗಲ್‌ನ ಫಾರ್ವಡ್‌ ಪ್ಲೇಯರ್ ಡಿಯಾಗೋ ಜೋಟಾಗೆ ಇಂಜ್ಯುರಿ, ಫಿಫಾ ವಿಶ್ವಕಪ್‌ನಿಂದಲೇ ಔಟ್

ಫಿಫಾ ವಿಶ್ವಕಪ್‌ಗೆ ಕ್ಷಣಗಣನೆ ಶುರುವಾಗಿದೆ. ಕತಾರ್‌ನಲ್ಲಿ ನಡೆಯಲಿರುವ ಫುಟ್ಬಾಲ್ ಮಹಾ ಸಂಗ್ರಾಮವನ್ನ ವೀಕ್ಷಿಸಲು ಪ್ರಪಂಚದಾದ್ಯಂತ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
ನಾಲ್ಕು ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ, ಪ್ರತಿ ದೇಶವೂ ವಿಶ್ವ ಫುಟ್ಬಾಲ್ ಚಾಂಪಿಯನ್‌ಶಿಪ್‌ಗಾಗಿ ಹಾತೊರೆಯುತ್ತಿದೆ.

ಭಾಗವಹಿಸುವ ದೇಶಗಳಷ್ಟೇ ಅಲ್ಲ, ಎಲ್ಲಾ ದೇಶಗಳ ಕ್ರೀಡಾ ಪ್ರೇಮಿಗಳು ವಿಶ್ವ ಕ್ರೀಡೆಗಳ ದೊಡ್ಡ ಹಬ್ಬದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಳ್ಳಲು ಬಯಸುತ್ತಿದ್ದಾರೆ. ಒಂದೆಡೆ ಕ್ರಿಕೆಟ್ ಅಭಿಮಾನಿಗಳು ಟಿ20 ವಿಶ್ವಕಪ್‌ನ ಸವಿಯನ್ನ ಪಡೆದ ಬೆನ್ನಲ್ಲೇ ಫುಟ್ಬಾಲ್ ಅಭಿಮಾನಿಗಳು ನವೆಂಬರ್ -ಡಿಸೆಂಬರ್‌ನಲ್ಲಿ ಫುಟ್ಬಾಲ್ ಹಬ್ಬವನ್ನ ಕಣ್ತುಂಬಿಕೊಳ್ಳಲಿದ್ದಾರೆ.

90 ನಿಮಿಷಗಳ ಆಟಕ್ಕೆ ಇಡೀ ಜಗತ್ತು ಕಾಯುತ್ತಿರುವಾಗ ಭಾಗವಹಿಸುವ ರಾಷ್ಟ್ರಗಳಲ್ಲಿ ಕೊನೆಯ ಕ್ಷಣದ ಸಿದ್ಧತೆಗಳು ನಡೆಯುತ್ತಿವೆ. ಆದರೆ, ವಿಶ್ವಕಪ್‌ಗೂ ಮುನ್ನ ಗಾಯದ ಸಮಸ್ಯೆ ಹಲವು ದೇಶಗಳನ್ನು ಕಾಡುತ್ತಿದೆ. ಏಂಜೆಲ್ ಡಿ ಮಾರಿಯಾ ಮತ್ತು ಪೌಲೊ ಡೈಬಾಲಾ ಇನ್ನೂ ಫಿಟ್ ಆಗದಿರುವುದು ಅರ್ಜೆಂಟೀನಾ ಆತಂಕಕ್ಕೆ ಕಾರಣವಾಗಿದೆ.

ಇನ್ನು ಪೋರ್ಚುಗಲ್ ತಂಡದಲ್ಲಿ ಕ್ರಿಸ್ಟಿಯಾನೊ ರೊನಾಲ್ಡೊ ತಂಡದ ಸ್ಟ್ರೈಕರ್‌ಗಳಲ್ಲಿ ಒಬ್ಬರಾದ ಲಿಯೋನೆಲ್ ಮೆಸ್ಸಿಯ ಪ್ರತಿಸ್ಪರ್ಧಿಗಳಲ್ಲಿ ಒಬ್ಬರಾದ ಡಿಯಾಗೋ ಜೋಟಾ ಅವರು ವಿಶ್ವಕಪ್‌ನಿಂದಲೇ ಹೊರಬಿದ್ದಿರುವ ಭಾರೀ ಹೊಡೆತ ನೀಡಿದೆ. ಕತಾರ್‌ನಲ್ಲಿ ನಡೆಯುವ ವಿಶ್ವಕಪ್‌ಗೆ ಕೇವಲ ಒಂದು ತಿಂಗಳು ಬಾಕಿ ಇದೆ. ಆದರೆ ಅದಕ್ಕೂ ಮುನ್ನ ಪೋರ್ಚುಗಲ್ ಶಿಬಿರದಲ್ಲಿ ಈ ಕೆಟ್ಟ ಸುದ್ದಿ ಕೇಳಿಬಂದಿದೆ.

ಲಿವರ್‌ಪೂಲ್‌ ಪರ ಕ್ಲಬ್ ಫುಟ್‌ಬಾಲ್ ಆಡುವ ಪೋರ್ಚುಗೀಸ್ ಫಾರ್ವರ್ಡ್ ಡಿಯಾಗೋ ಜೋಟಾ ಗಾಯದಿಂದ ವಿಶ್ವಕಪ್‌ನಿಂದಲೇ ಹೊರಬಿದ್ದಿದ್ದಾರೆ. ಲಿವರ್‌ಪೂಲ್ ತರಬೇತುದಾರ ಜುರ್ಗೆನ್ ಕ್ಲೋಪ್ ಅವರು ಜೋಟಾ ಸಂಪೂರ್ಣವಾಗಿ ಫಿಟ್ ಆಗಿ ಮೈದಾನಕ್ಕೆ ಮರಳಲು ಹಲವಾರು ತಿಂಗಳುಗಳ ಅಗತ್ಯವಿದೆ ಎಂದು ಹೇಳಿದರು. ಇದರಿಂದಾಗಿ ಪೋರ್ಚುಗಲ್‌ ಪರ ಈತ ವಿಶ್ವಕಪ್‌ನಲ್ಲಿ ಪ್ರತಿನಿಧಿಸಲು ಸಾಧ್ಯವಾಗುವುದಿಲ್ಲ.

ಜೋಟಾ ಇತ್ತೀಚೆಗೆ ಪ್ರೀಮಿಯರ್ ಲೀಗ್‌ನಲ್ಲಿ ಮ್ಯಾಂಚೆಸ್ಟರ್ ಸಿಟಿ ವಿರುದ್ಧದ ಪಂದ್ಯದ ಕೊನೆಯ ನಿಮಿಷದಲ್ಲಿ ಗಾಯಗೊಂಡರು. ಗಾಯವು ಎಷ್ಟು ಗಂಭೀರವಾಗಿದೆ ಎಂದರೆ ಅವರು ಸ್ಟ್ರೆಚರ್‌ನಲ್ಲಿ ಮೈದಾನವನ್ನು ಬಿಡಬೇಕಾಯಿತು. ಕತಾರ್ ವಿಶ್ವಕಪ್ ನವೆಂಬರ್ 20 ರಂದು ಆರಂಭವಾಗಲಿದೆ. ಪೋರ್ಚುಗಲ್ 'ಎಚ್' ಗುಂಪಿನಲ್ಲಿದೆ. ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ದೇಶದೊಂದಿಗೆ ಘಾನಾ, ದಕ್ಷಿಣ ಕೊರಿಯಾ ಮತ್ತು ಉರುಗ್ವೆ ಈ ಗುಂಪಿನಲ್ಲಿವೆ.

ಜೋಟಾ ಅವರ ಅನುಪಸ್ಥಿತಿಯು ಪೋರ್ಚುಗೀಸರ ಬಲವನ್ನು ಬಹಳವಾಗಿ ದುರ್ಬಲಗೊಳಿಸಿತು. ಈ ವಿಶ್ವಕಪ್ ತನ್ನ ವೃತ್ತಿಜೀವನದ ಕೊನೆಯ ವಿಶ್ವಕಪ್ ಆಗಲಿದೆ ಎಂದು ಲಿಯೋನೆಲ್ ಮೆಸ್ಸಿ ಈಗಾಗಲೇ ಹೇಳಿದ್ದಾರೆ. ರೊನಾಲ್ಡೊ ಮುಂದಿನ ವಿಶ್ವಕಪ್‌ನಲ್ಲಿ ಆಡಬಹುದು ಎಂಬುದಕ್ಕೆ ಯಾವುದೇ ಗ್ಯಾರಂಟಿ ಇಲ್ಲ. ಆದ್ದರಿಂದ ಈ ವಿಶ್ವಕಪ್‌ನಲ್ಲಿ ಸಾರ್ವಕಾಲಿಕ ಇಬ್ಬರು ಶ್ರೇಷ್ಠ ಫುಟ್‌ಬಾಲ್ ತಾರೆಗಳು ಪೂರ್ಣ ಸಾಮರ್ಥ್ಯದ ತಂಡದೊಂದಿಗೆ ಆಡುವುದನ್ನು ಅಭಿಮಾನಿಗಳು ನೋಡಲು ಬಯಸುತ್ತಾರೆ.