ಫಿಫಾ ವಿಶ್ವಕಪ್ 2022: ಪೆನಾಲ್ಟಿ ಶೂಟೌಟ್‌ನಲ್ಲಿ ಜಪಾನ್ ವಿರುದ್ಧ ಗೆದ್ದು 8ರ ಘಟ್ಟ ತಲುಪಿದ ಕ್ರೊಯೇಷಿಯಾ

ಸೋಮವಾರ, ಡಿಸೆಂಬರ್ 5ರಂದು ನಡೆದ ಫಿಫಾ ವಿಶ್ವಕಪ್ 2022ರ ಪ್ರಿ ಕ್ವಾರ್ಟರ್-ಫೈನಲ್‌ನ ರೋಚಕ ಪಂದ್ಯದಲ್ಲಿ ಜಪಾನ್ ವಿರುದ್ಧ ಕ್ರೊಯೇಷಿಯಾ 3-1 (1-1) ಅಂತರದ ಗೆಲುವು ಸಾಧಿಸಿತು.

1-1 ಅಂತರದಲ್ಲಿ ಸಮಬಲ ಹೊಂದಿದ್ದಾಗ, ಪೆನಾಲ್ಟಿ ಶೂಟೌಟ್ ಅವಕಾಶದಲ್ಲಿ ಕ್ರೊಯೇಷಿಯಾ ತಂಡವು ಜಪಾನ್ ತಂಡವನ್ನು ಮಣಿಸಿತು. ಇನ್ನು ಈ ಪಂದ್ಯದಲ್ಲಿ ಸೋತ ಜಪಾನ್ ಫಿಫಾ ವಿಶ್ವಕಪ್‌ನಿಂದ ಹೊರಬಿತ್ತು.

ಜಪಾನ್ ಮತ್ತು ಕ್ರೊಯೇಷಿಯಾ ತಂಡಗಳು ಎರಡೂ ಗೋಲು ಗಳಿಸಲು ಕೆಲವು ಆರಂಭಿಕ ಅವಕಾಶಗಳನ್ನು ಹಾಳುಮಾಡಿಕೊಂಡವು. ಆದರೆ ಮೊದಲಾರ್ಧ ಮುಗಿಯಲು ಕೆಲವೇ ನಿಮಿಷಗಳ ಮೊದಲು, ಡೈಜೆನ್ ಮೇಡಾ ಅದ್ಭುತವಾಗಿ ಗೋಲು ಗಳಿಸಿದ ಫಲವಾಗಿ ಜಪಾನ್‌ಗೆ ಸ್ಕೋರಿಂಗ್ ಬೋರ್ಡ್ ತೆರೆಯಿತು.

ಇನ್ನು ದ್ವಿತೀಯಾರ್ಧದ ಆರಂಭದಲ್ಲಿ ಇವಾನ್ ಪೆರಿಸಿಕ್ ಸೊಗಸಾದ ಹೆಡರ್ ಮೂಲಕ ಗೋಲು ಗಳಿಸಿ ಕ್ರೊಯೇಷಿಯಾ ತಂಡವನ್ನು 1-1ರಿಂದ ಸಮಬಲಗೊಳಿಸಿದರು. ಆದರೆ ಎರಡು ತಂಡಗಳು ನಂತರದ 90 ನಿಮಿಷಗಳಲ್ಲಿ ಗೋಲು ಗಳಿಸಲು ವಿಫಲರಾದರು. ಈ ಆವೃತ್ತಿಯ ಫಿಫಾ ವಿಶ್ವಕಪ್‌ನಲ್ಲಿ ಮೊದಲ ಬಾರಿಗೆ ಪಂದ್ಯವನ್ನು ಹೆಚ್ಚುವರಿ ಸಮಯಕ್ಕೆ ಕರೆದೊಯ್ಯಲಾಯಿತು.

ಆದರೆ ಹೆಚ್ಚುವರಿ ಸಮಯದಲ್ಲೂ ಉಭಯ ತಂಡಗಳು ಗೋಲು ಗಳಿಸಲು ಸಾಧ್ಯವಾಗಲಿಲ್ಲ. ಕೊನೆಗೆ ಪೆನಾಲ್ಟಿ ಶೂಟೌಟ್‌ನಲ್ಲಿ ಕ್ರೊಯೇಷಿಯಾದ ಗೋಲ್‌ಕೀಪರ್ 3-1 (1-1) ಅಂತರದಲ್ಲಿ ಜಯ ಸಾಧಿಸುವ ಮೂಲಕ ಕ್ವಾರ್ಟರ್ ಫೈನಲ್‌ಗೆ ಹೆಜ್ಜೆ ಹಾಕಿದರು.