ಏಷ್ಯನ್ ಸ್ನೂಕರ್ ಟೂರ್: ಬಂಗಾರ ಗೆದ್ದು ಇತಿಹಾಸ ಬರೆದ ಪಂಕಜ್ ಅಡ್ವಾಣಿ

ಬೆಂಗಳೂರು, ಅಕ್ಟೋಬರ್ 31: ಚೀನಾದ ಜಿನಾನ್ ನಲ್ಲಿ ಬುಧವಾರ (ಅಕ್ಟೋಬರ್ 31) ನಡೆದ ಏಷ್ಯನ್ ಟೂರ್ ಸ್ನೂಕರ್ ಸ್ಪರ್ಧೆಯಲ್ಲಿ ಭಾರತದ ಪಂಕಜ್ ಅಡ್ವಾಣಿ ಬಂಗಾರ ಜಯಿಸಿದ್ದಾರೆ. ಏಷ್ಯನ್ ಸ್ನೂಕರ್ ಟೂರ್ ಸ್ಪರ್ಧೆಯಲ್ಲಿ ಬಂಗಾರ ಗೆದ್ದ ಮೊದಲ ಭಾರತೀಯ ಹಿರಿಮೆಗೂ ಪಂಕಜ್ ಪಾತ್ರರಾಗಿದ್ದಾರೆ.

ಬುಧವಾರ ನಡೆದ ಫುರುಷರ ಫೈನಲ್ ಸ್ಪರ್ಧೆಯಲ್ಲಿ ಪಂಕಜ್ ಅವರು ಚೀನಾದ ಜು ರೆಟಿ ಅವರನ್ನು 6-1 ಅಂತರದಿಂದ ಸೋಲಿಸುವ ಮೂಲಕ ಬಂಗಾರಕ್ಕೆ ಕೊರಳೊಡ್ಡಿದರು. ಈ ಮೂಲಕ 19 ಬಾರಿಯ ವಿಶ್ವ ಚಾಂಪಿಯನ್ ಅಡ್ವಾಣಿ ಮತ್ತೊಂದು ಮೈಲಿಗಲ್ಲು ಸ್ಥಾಪಿಸಿದರು.

ಪಂಕಜ್ ಅಡ್ವಾಣಿ ಮೊದಲ ಅಂತಾರಾಷ್ಟ್ರೀಯ ಪ್ರಶಸ್ತಿ ಗೆದ್ದಿದ್ದು 2003ರಲ್ಲಿ. ಅದೂ ಚೀನಾದಲ್ಲೇ. ಈಗ 2018ರಲ್ಲಿ ಅಂದರೆ 15 ವರ್ಷಗಳ ಬಳಿಕ ಚೀನಾ ನೆಲದಲ್ಲೇ ಅಡ್ವಾಣಿ ಮತ್ತೊಂದು ಇತಿಹಾಸ ನಿರ್ಮಿಸಿದ್ದಾರೆ.