ದೀಪಿಕಾಳ ಆರ್ಚರಿ ಸ್ಪರ್ಧೆಯ ಪ್ರಸಾರ ಕಡೆಗಣನೆಗೆ ಅಭಿಮಾನಿಗಳ ಅಸಮಾಧಾನ

ಟೋಕಿಯೋ: ವಿಶ್ವ ನಂ.1 ಬಿಲ್ಲುಗಾರ್ತಿ ಭಾರತದ ದೀಪಿಕಾ ಕುಮಾರಿ ಪಾಲ್ಗೊಂಡಿದ್ದ ಮಹಿಳಾ ಆರ್ಚರಿ ಸ್ಪರ್ಧೆಯ ಪ್ರಸಾರ ಕಡೆಗಣನೆಗೆ ಟೋಕಿಯೋ ಒಲಿಂಪಿಕ್ಸ್‌ನ ಅಧಿಕೃತ ಪ್ರಸಾರಕ ಸೋನಿನೆಟ್ವರ್ಕ್ ವಿರುದ್ಧ ಅಭಿಮಾನಿಗಳು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಮಹಿಳಾ ಆರ್ಚರಿಯಲ್ಲಿ ವೈಯಕ್ತಿಕ 9ನೇ ಸ್ಥಾನದೊಂದಿಗೆ ದೀಪಿಕಾ ಕುಮಾರಿ ಟೋಕಿಯೋ ಒಲಿಂಪಿಕ್ಸ್‌ಗೆ ಅರ್ಹತೆ ಗಿಟ್ಟಿಸಿಕೊಂಡಿದ್ದರು. ಒಲಿಂಪಿಕ್ಸ್ ಅಧಿಕೃತ ಉದ್ಘಾಟನೆ ದಿನವಾದ ಜುಲೈ 23ರಂದು ಮುಂಜಾನೆ ದೀಪಿಕಾರಿಗೆ ಸ್ಪರ್ಧೆಯಿತ್ತು. ಮೊದಲ ಸುತ್ತಿನ ಸ್ಪರ್ಧೆಯಲ್ಲಿ ದೀಪಿಕಾ ದ್ವಿತೀಯ ಸುತ್ತಿಗೆ ಲಗ್ಗೆಯಿಟ್ಟಿದ್ದರು.

ಆದರೆ ಮಹಿಳಾ ಆರ್ಚರಿ ಸ್ಪರ್ಧೆಯನ್ನು ಸೋನಿನೆಟ್ವರ್ಕ್ ಪ್ರಸಾರಗೊಳಿಸಿರಲಿಲ್ಲ. ಭಾರತೀಯ ಸ್ಪರ್ಧಿಯಿದ್ದ ಈ ಈವೆಂಟನ್ನು ವೀಕ್ಷಿಸಲು ಕಾದಿದ್ದ ಅಭಿಮಾನಿಗಳಿಗೆ ಇದರಿಂದ ನಿರಾಸೆಯಾಗಿದೆ. ಹೀಗಾಗಿ ಅಧಿಕೃತ ಪ್ರಸಾರಕ ಸೋನಿ ನೆಟ್ವರ್ಕ್ಸ್ ವಿರುದ್ಧ ಕ್ರೀಡಾಭಿಮಾನಿಗಳು ಕಿಡಿಕಾರಿದ್ದಾರೆ. ಟ್ವಿಟರ್ ಮೂಲಕ ಹೆಚ್ಚಿನವರು ಅಸಮಾಧಾನ ಹೊರಹಾಕಿದ್ದಾರೆ.

ವೈಯಕ್ತಿಕ ವಿಭಾಗದ ಮೊದಲ ಸುತ್ತಿನ ಸ್ಪರ್ಧೆಯಲ್ಲಿ ದೀಪಿಕಾ 72 ಶಾಟ್‌ಗಳಲ್ಲಿ 663 ಅಂಕ ಕಲೆಹಾಕಿ ದ್ವಿತೀಯ ಸುತ್ತಿಗೆ ಪ್ರವೇಶಿಸಿದ್ದಾರೆ. ಮುಂದಿನ ಸುತ್ತಿನಲ್ಲಿ ದೀಪಿಕಾ ಭೂತಾನ್‌ನ ಕರ್ಮ ಅವರನ್ನು ಎದುರಿಸಲಿದ್ದಾರೆ. ಅಂದ್ಹಾಗೆ ಜುಲೈ 23ರಂದು ಟೋಕಿಯೋ ಒಲಿಂಪಿಕ್ಸ್‌ಗೆ ಜಪಾನ್‌ನ ಟೆನಿಸ್ ತಾರೆ ನವೋಮಿ ಒಸಾಕಾ ಅಧಿಕೃತ ಚಾಲನೆ ನೀಡಿದ್ದಾರೆ.