ಕೊರೊನಾ ವೈರಸ್ ಭೀತಿ, ಟೋಕಿಯೋ ಒಲಿಂಪಿಕ್ಸ್‌ 2020 ರದ್ದು ಸಾಧ್ಯತೆ

ಟೋಕಿಯೋ, ಫೆಬ್ರವರಿ 26: ಮಾರಕ ಸೋಂಕು ಕೊರೊನಾ ವೈರಸ್ ಹತೋಟಿಗೆ ಬಾರದೆ ಹೋದರೆ 2020ರ ಟೋಕಿಯೋ ಒಲಿಂಪಿಕ್ಸ್ ರದ್ದಾಗುವ ಸಾಧ್ಯತೆಯಿದೆ ಎಂದು ಇಂಟರ್ ನ್ಯಾಷನಲ್ ಒಲಿಂಪಿಕ್ಸ್ ಕಮಿಟಿಯ (ಐಒಸಿ) ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ. ಕ್ರೀಡಾಕೂಟವನ್ನು ಬೇರೆಡೆಗೆ ಸ್ಥಳಾಂತರಿಸುವ ಅಥವಾ ಮುಂದೂಡುವುದಕ್ಕಿಂತ ರದ್ದುಪಡಿಸುವ ಸಾಧ್ಯತೆಯೇ ಹೆಚ್ಚು ಎಂಬ ಮಾಹಿತಿ ಲಭ್ಯವಾಗಿದೆ.

1978ರಿಂದಲೂ ಐಒಸಿಯಲ್ಲಿರುವ, ಸ್ವಿಮ್ಮಿಂಗ್ ಚಾಂಪಿಯನ್ ಕೂಡ ಆಗಿರುವ ಕೆನಡಾದ ಡಿಕ್ ಪೌಂಡ್ ಈ ಬಗ್ಗೆ ಮಾತನಾಡಿ, ಟೋಕಿಯೋ ಒಲಿಂಪಿಕ್ಸ್ ನಡೆಯುತ್ತೋ ಇಲ್ಲವೋ ಅನ್ನೋದು 3 ತಿಂಗಳಲ್ಲಿ ನಿರ್ಧಾರವಾಗಲಿದೆ. ಅಂದರೆ ಮೇ ತಿಂಗಳವರೆಗೂ ಕಾದು ನೋಡಬೇಕಾಗುತ್ತದೆ ಎಂದಿದ್ದಾರೆ.

'ಕ್ರೀಡಾಕೂಟದ ದಿನಾಂಕ ಹತ್ತಿರವಾಗುತ್ತಿರುವುದರಿಂದ ಅನೇಕ ಕೆಲಸಗಳು ಆರಂಭವಾಗಬೇಕಿದೆ. ಭದ್ರತೆ, ಆಹಾರ, ಒಲಿಂಪಿಕ್ ವಿಲ್ಲೇಜ್, ಹೋಟೆಲ್‌ ವ್ಯವಸ್ಥೆಗಳಿಗೆಲ್ಲ ಸಿದ್ಧತೆ ನಡೆಯಬೇಕಿದೆ. ಆದರೆ ಕ್ರೀಡಾ ಕೂಟ ನಡೆಯುವ ಬಗ್ಗೆ ಅಂತಿಮ ನಿರ್ಧಾರಕ್ಕೆ ಇನ್ನೂ ಕೊಂಚ ಕಾಲ ಕಾಯಬೇಕಿದೆ,' ಎಂದು ಡಿಕ್ ಮಾಹಿತಿ ನೀಡಿದ್ದಾರೆ.

ಚೀನಾದಾದ್ಯಂತ ಹಬ್ಬುತ್ತಿರುವ ಕೊರೊನಾ ವೈರಸ್ ಸೋಂಕಿಗೆ ಈಗಾಗಲೇ ಸುಮಾರು 80,000 ಜನ ಒಳಗಾಗಿದ್ದಾರೆ. ಸುಮಾರು 2,700 ಸಾವಿಗೀಡಾಗಿದ್ದಾರೆ. ಒಲಿಂಪಿಕ್ಸ್ ನಡೆಯಲಿರುವ ಜಪಾನ್‌ನಲ್ಲೂ 4 ಮಂದಿ ಸಾವನ್ನಪ್ಪಿದ್ದಾರೆ. ಟೋಕಿಯೋ ಒಲಿಂಪಿಕ್ಸ್ 2020ರ ಜುಲೈ 24ರಿಂದ ಆಗಸ್ಟ್ 9ರ ವರೆಗೆ ನಡೆಸಲು ನಿರ್ಧಾರವಾಗಿತ್ತು.