ಐಟಿಎಫ್‌ ಮಹಿಳಾ ಓಪನ್‌: ಪ್ರಧಾನ ಸುತ್ತಿಗೆ ಅರ್ಹತೆ ಪಡೆದ ಭಾರತದ ವೈದೇಹಿ

ಬೆಂಗಳೂರಿನ ಕೆಎಸ್‌ಎಲ್‌ಟಿಎ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಕೆಪಿಬಿ ಟ್ರಸ್ಟ್‌ ಐಟಿಎಫ್‌ ಮಹಿಳಾ ಓಪನ್‌ ಟೆನಿಸ್‌ ಟೂರ್ನಿಯಲ್ಲಿ ಭಾರತದ 6 ಆಟಗಾರ್ತಿಯರು ಕಣಕ್ಕಿಳಿಯಲಿದ್ದಾರೆ. ಭಾರತದ ಫೆಡ್‌ ಕಪ್‌ ತಂಡದಲ್ಲಿ ಸ್ಥಾನ ಪಡೆದಿರುವ ವೈದೇಹಿ ಅಂತಿಮ ಅರ್ಹತಾ ಸುತ್ತಿನಲ್ಲಿ ಥಾಯ್ಲೆಂಡ್‌ನ ಪುನ್ನಿನ್‌ ಕೊವಾಪಿಟುಕ್ಟೆಡ್‌ ಅವರನ್ನು 6-1, 6-2 ಸೆಟ್‌ಗಳಿಂದ ಸೋಲಿಸಿದರು. ಮುಖ್ಯ ಡ್ರಾದ ಆರಂಭಿಕ ಸುತ್ತಿನಲ್ಲಿ ವೈದೇಹಿ ಇಂಡೋನೇಷ್ಯಾದ ಮ್ಯಾಡೆಲಿನ್‌ ನುಗ್ರೊಹೊ ಅವರನ್ನು ಎದುರಿಸಲಿದ್ದಾರೆ.

ಈ ಪಂದ್ಯಾವಳಿಯು ಐಟಿಎಫ್‌ ಮಹಿಳಾ ವಿಶ್ವ ಟೆನಿಸ್‌ ಪ್ರವಾಸದ ಭಾಗವಾಗಿದೆ ಮತ್ತು ಇದನ್ನು ಕರ್ನಾಟಕ ರಾಜ್ಯ ಲಾನ್‌ ಟೆನಿಸ್‌ ಅಸೋಸಿಯೇಷನ್‌ (ಕೆಎಸ್‌ಎಲ್‌ಟಿಎ) ಆಯೋಜಿಸುತ್ತಿದೆ.

ಜೆಕ್‌ ಗಣರಾಜ್ಯದ 15ರ ಹರೆಯದ ಬ್ರೆಂಡಾ ಫ್ರುಹ್ವಿರ್ಟೊವಾ ಅಗ್ರ ಶ್ರೇಯಾಂಕಿತ ಆಟಗಾರ್ತಿಯಾಗಿದ್ದು, ತೈಪೆಯ ಲೀ ಯಾ-ಹ್ಸುವಾನ್‌ ಅವರನ್ನು ಎದುರಿಸಲಿದ್ದಾರೆ. ಟೂರ್ನಿಯಲ್ಲಿನಾಲ್ಕನೇ ಶ್ರೇಯಾಂಕ ಪಡೆದಿರುವ ಭಾರತದ ಅಗ್ರ ಶ್ರೇಯಾಂಕಿತ ಆಟಗಾರ್ತಿ ಅಂಕಿತಾ ರೈನಾ, ಸ್ಥಳೀಯ ಆಟಗಾರ್ತಿ ವಂಶಿತಾ ಪಠಾನಿಯಾ ಅವರನ್ನು ಎದುರಿಸಲಿದ್ದಾರೆ.

ಭಾರತದ ಫೆಡ್‌ ಕಪ್‌ ತಂಡದಲ್ಲಿಸ್ಥಾನ ಪಡೆದಿರುವ ಮತ್ತೊಬ್ಬ ಆಟಗಾರ್ತಿ ಸಹಜಾ ಯಮಲಪಲ್ಲಿ ಅವರು ಲಾತ್ವಿಯಾದ ಡಯಾನಾ ಮಾರ್ಸಿಂಕೆವಿಕಾ ವಿರುದ್ಧ ಸೆಣಸಲಿದ್ದಾರೆ. ಕರ್ನಾಟಕದ ಶರ್ಮಾದಾ ಬಾಲು ಮತ್ತು ಜೀಲ್‌ ದೇಸಾಯಿ ಅವರೊಂದಿಗೆ ಸಹಜಾ ಕೂಡ ವೈಲ್ಡ್‌ ಕಾರ್ಡ್‌ ಪ್ರವೇಶ ಪಡೆದಿದ್ದಾರೆ. ಸಿಂಗಲ್ಸ್‌ನಲ್ಲಿರುತುಜಾ ಭೋಸಲೆ ಭಾರತವನ್ನು ಪ್ರತಿನಿಧಿಸಲಿದ್ದಾರೆ.

ಎಲ್ಲಾ ನಾಲ್ಕು ಗ್ರ್ಯಾನ್‌ ಸ್ಲಾಮ್‌ಗಳಲ್ಲಿ ಕಾಣಿಸಿಕೊಂಡಿರುವ ಮಾಜಿ ವಿಶ್ವ ನಂ.38 ಆಟಗಾರ್ತಿ ಸ್ಲೊವೇನಿಯಾದ ದಲಿಲಾ ಜಕುಪೊವಿಕ್‌ ಅವರು ಫ್ರಾನ್ಸ್‌ನ ಅಮಂಡಿನ್‌ ಹೆಸ್ಸೆ ಅವರೊಂದಿಗೆ ಡಬಲ್ಸ್‌ ಸ್ಪರ್ಧೆಯಲ್ಲಿ ಕಣಕ್ಕಿಳಿಯಲಿದ್ದಾರೆ. ಈ ಜೋಡಿ ಭಾರತದ ಜೋಡಿ ವೈದೇಹಿ ಚೌಧರಿ ಮತ್ತು ಬಿ ಶ್ರೀವಲ್ಲಿ ಅವರನ್ನು ಎದುರಿಸಲಿದೆ.