ನವದೆಹಲಿ, ಆಗಸ್ಟ್ 21: ಸ್ಪೇನ್ ನ ಹಿರಿಯ ಟೆನಿಸಿಗ ರಾಫೆಲ್ ನಡಾಲ್ ಅವರು, ಸೋಮವಾರ ಬಿಡುಗಡೆಯಾದ ಎಟಿಪಿ ಟೆನಿಸ್ ಶ್ರೇಯಾಂಕ ಪಟ್ಟಿಯಲ್ಲಿ ನಂಬರ್ ಒನ್ ಸ್ಥಾನಕ್ಕೇರಿದ್ದಾರೆ.
ಇತ್ತೀಚೆಗೆ ನಡೆದ ಸಿನ್ಸಿನಾಟಿ ಟೆನಿಸ್ ಚಾಂಪಿಯನ್ ಶಿಪ್ ನ ಪುರುಷರ ವಿಭಾಗದಲ್ಲಿ ಚಾಂಪಿಯನ್ ಆಗಿದ್ದರಿಂದ ನಡಾಲ್ ಅವರಿಗೆ ಈ ಸ್ಥಾನ ಲಭಿಸಿದೆ. ಭಾನುವಾರ (ಆಗಸ್ಟ್ 20) ನಡೆದಿದ್ದ ಸಿನ್ಸಿನಾಟಿ ಟೆನಿಸ್ ಚಾಂಪಿಯನ್ ಶಿಪ್ ನ ಪುರುಷರ ವಿಭಾಗದ ಫೈನಲ್ ಪಂದ್ಯದಲ್ಲಿ ಅವರು, ಫ್ರಾನ್ಸ್ ನ ರಿಚರ್ಡ್ ಗ್ಯಾಸ್ಕೆಟ್ ಅವರನ್ನು 6-3, 6-4 ಸೆಟ್ ಗಳ ಅಂತರದಲ್ಲಿ ಸೋಲಿಸಿ ಫೈನಲ್ ಗೆ ಕಾಲಿಟ್ಟಿದ್ದರು.
ಒಂಭತ್ತು ವರ್ಷಗಳ ಹಿಂದೆ (2008) ನಡಾಲ್ ಅವರು ನಂಬರ್ ಒನ್ ಸ್ಥಾನಕ್ಕೇರುವ ಮೂಲಕ ಈ ಸಾಧನೆ ಮಾಡಿದ ಸ್ಪೇನ್ ನ ಮೊದಲನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು.
ಆನಂತರ 2010ರಲ್ಲಿ ನಡಾಲ್ ಅವರು ಪುನಃ ನಂಬರ್ ಒನ್ ಸ್ಥಾನಕ್ಕೇರಿದ್ದರು. ಆನಂತರ, ಕೆಲ ದಿನಗಳ ನಂತರ, ಮತ್ತೆ ಆ ಸ್ಥಾನದಿಂದ ಕೆಳಗಿಳಿದ ಅವರು, ಮತ್ತೆ ಆ ಜಾಗಕ್ಕೆ ಬಂದಿದ್ದು 2013ರಲ್ಲಿ.
ಇದೀಗ, ಪುನಃ ನಂಬರ್ ಒನ್ ಪಟ್ಟಕ್ಕೇರಿರುವ ಅವರು, ನಾಲ್ಕನೇ ಬಾರಿಗೆ ಆ ಸಾಧನೆ ಮಾಡಿದ್ದಾರೆ.