Wimbledon 2023: ಚೊಚ್ಚಲ ವಿಂಬಲ್ಡನ್ ಪ್ರಶಸ್ತಿ ಗೆದ್ದ ಕಾರ್ಲೋಸ್ ಅಲ್ಕರಾಝ್ ಶ್ಲಾಘಿಸಿದ ರಾಫೆಲ್ ನಡಾಲ್

ಭಾನುವಾರ, ಜುಲೈ 16ರಂದು ಲಂಡನ್‌ನ ಸೆಂಟರ್ ಕೋರ್ಟ್‌ನಲ್ಲಿ ನಡೆದ 2023ರ ವಿಂಬಲ್ಡನ್ ಫೈನಲ್ ಪಂದ್ಯದಲ್ಲಿ ಗೆದ್ದು ಸ್ಪ್ಯಾನಿಷ್ ಟೆನಿಸ್ ತಾರೆ, 20 ವರ್ಷದ ಕಾರ್ಲೋಸ್ ಅಲ್ಕರಾಝ್ ಅವರು ತಮ್ಮ ಚೊಚ್ಚಲ ವಿಂಬಲ್ಡನ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರು.

ಪ್ರಸ್ತುತ ಪುರುಷರ ಸಿಂಗಲ್ಸ್‌ನಲ್ಲಿ ವಿಶ್ವದ ನಂ.1 ಶ್ರೇಯಾಂಕದ ಕಾರ್ಲೋಸ್ ಅಲ್ಕರಾಝ್ ಅವರು 4 ಗಂಟೆ 47 ನಿಮಿಷಗಳ ಸುದೀರ್ಘ ಹೋರಾಟದಲ್ಲಿ ಮಾಜಿ ಚಾಂಪಿಯನ್ ಸರ್ಬಿಯಾದ ನೊವಾಕ್ ಜೊಕೊವಿಕ್ ಅವರನ್ನು ಸೋಲಿಸಿದರು.

ವಿಂಬಲ್ಡನ್ ಪಂದ್ಯಾವಳಿ ಗೆದ್ದ ಅತ್ಯಂತ ಕಿರಿಯ ಟೆನ್ನಿಸ್ ಆಟಗಾರ ಎಂಬ ಹೆಗ್ಗಳಿಕೆಗೆ ಸ್ಪೇನ್‌ನ ಸೆನ್ಸೆಷನ್ ಹಾಗೂ ವಿಶ್ವದ ನಂ.1 ಶ್ರೇಯಾಂಕಿತ ಆಟಗಾರ ಕಾರ್ಲೋಸ್ ಅಲ್ಕರಾಝ್ ಪಾತ್ರರಾದರು.

7 ಬಾರಿಯ ವಿಂಬಲ್ಡನ್ ಚಾಂಪಿಯನ್ ನೊವಾಕ್ ಜೊಕೊವಿಕ್ ವಿರುದ್ಧದ ಐದು ಸೆಟ್‌ಗಳ ರೋಮಾಂಚನಕಾರಿ ಆಟದ ನಂತರ ಅಲ್ಕರಾಝ್ ಗೆಲುವು ಸಾಧಿಸಿದರು. ಇದಕ್ಕೂ ಮೊದಲು ಪಂದ್ಯದ ಆರಂಭಿಕ ಸೆಟ್‌ನಲ್ಲಿ ಸ್ಪೇನ್‌ ಆಟಗಾರ ಸೋಲನುಭವಿಸಿದರು.

ಸೆಂಟರ್ ಕೋರ್ಟ್‌ನಲ್ಲಿ ಸತತ 45 ಗೆಲುವುಗಳು ಮತ್ತು ವಿಂಬಲ್ಡನ್‌ನಲ್ಲಿ ಸತತ 34 ಗೆಲುವುಗಳ ಸರದಾರ ನೊವಾಕ್ ಜೊಕೊವಿಕ್ ಅವರ ಗೆಲುವಿನ ಓಟಕ್ಕೆ ಸ್ಪೇನ್‌ ಯುವ ಆಟಗಾರ ಅಲ್ಕರಾಝ್ ಬ್ರೇಕ್ ಹಾಕುವಲ್ಲಿ ಯಶಸ್ವಿಯಾದರು.

ಅಂತಿಮವಾಗಿ 1-6, 7-6 (6), 6-1, 3-6, 6-4 ಅಂತರದಲ್ಲಿ 2022ರ ಯುಎಸ್ ಓಪನ್‌ ಗೆದ್ದ ನಂತರ ಕಾರ್ಲೋಸ್ ಅಲ್ಕರಾಝ್ ತಮ್ಮ ಎರಡನೇ ಗ್ರ್ಯಾಂಡ್‌ಸ್ಲಾಮ್ ಸಿಂಗಲ್ಸ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡನು.

2023ರ ವಿಂಬಲ್ಡನ್ ಫೈನಲ್‌ಗೆ ಕಾರ್ಲೋಸ್ ಅಲ್ಕರಾಝ್ ತಮ್ಮ ಪ್ರಯಾಣದಲ್ಲಿ ಇಟಾಲಿಯನ್ ಮ್ಯಾಟಿಯೊ ಬೆರೆಟ್ಟಿನಿ, ಡೇನ್ ಹೊಲ್ಗರ್ ರೂನ್ ಮತ್ತು ರಷ್ಯಾದ ಡೇನಿಯಲ್ ಮೆಡ್ವೆಡೆವ್ ಸೇರಿದಂತೆ ಅಸಾಧಾರಣ ಎದುರಾಳಿಗಳ ವಿರುದ್ಧ ಗೆಲುವು ಸಾಧಿಸಿದ್ದರು.

ಸ್ಪೇನ್‌ನ ಲೆಜೆಂಡರಿ ಟೆನಿಸ್ ಆಟಗಾರ ರಾಫೆಲ್ ನಡಾಲ್ ಅವರು ಟ್ವಿಟ್ಟರ್‌ನಲ್ಲಿ ಕಾರ್ಲೋಸ್ ಅಲ್ಕರಾಝ್ ಗೆಲುವಿನ ನಂತರ ಶ್ಲಾಘಿಸಿ ಅಭಿನಂದಿಸಿದರು.

"ಅಭಿನಂದನೆಗಳು ಕಾರ್ಲೋಸ್ ಅಲ್ಕರಾಝ್. ನೀವು ಇಂದು ನಮಗೆ ಅಪಾರವಾದ ಸಂತೋಷವನ್ನು ನೀಡಿದ್ದೀರಿ. ಸ್ಪ್ಯಾನಿಷ್ ಟೆನಿಸ್‌ನಲ್ಲಿ ನಮ್ಮ ಪ್ರವರ್ತಕ ಮನೋಲೋ ಸಂತಾನಾ ಅವರು ಎಲ್ಲಿದ್ದರೂ ಹುರಿದುಂಬಿಸುತ್ತಿದ್ದಾರೆ ಎಂದು ನನಗೆ ಖಾತ್ರಿಯಿದೆ. ತುಂಬಾ ಬಲವಾದ ಅಪ್ಪುಗೆ ಮತ್ತು ಈ ಕ್ಷಣವನ್ನು ಆನಂದಿಸಿ, ಚಾಂಪಿಯನ್!!!," ಎಂದು ರಾಫೆಲ್ ನಡಾಲ್ ಟ್ವಿಟ್ಟರ್‌ನಲ್ಲಿ ಬರೆದುಕೊಂಡಿದ್ದಾರೆ.

ಕಾರ್ಲೋಸ್ ಅಲ್ಕರಾಝ್ ಅಸಾಧಾರಣ ಚಲನೆ ಮತ್ತು ಆಕ್ರಮಣಕಾರಿ ಹೊಡೆತಗಳನ್ನು ಪ್ರದರ್ಶಿಸಿದರು. ಅದು ಕೆಲವೊಮ್ಮೆ ನೊವಾಕ್ ಜೊಕೊವಿಕ್ ತನ್ನ ಎದುರಾಳಿಗೆ ಚಪ್ಪಾಳೆ ತಟ್ಟುವಂತೆ ಮಾಡಿತು. ನಿರ್ಣಾಯಕ 5ನೇ ಸೆಟ್‌ನಲ್ಲಿ ಸ್ಪೇನ್ ಆಟಗಾರ 18 ಗೆಲುವಿನ ಹೊಡೆತಗಳನ್ನು ಬಾರಿಸಿದನು.

ಈ ಗೆಲುವು ಕಾರ್ಲೋಸ್ ಅಲ್ಕರಾಝ್ ಅವರನ್ನು ವಿಶ್ವ ಶ್ರೇಯಾಂಕದಲ್ಲಿ ಅಗ್ರಸ್ಥಾನವನ್ನು ಇನ್ನಷ್ಟು ಗಟ್ಟಿಗೊಳಿಸುವುದಲ್ಲದೆ, 2001ರಲ್ಲಿ ಪೀಟ್ ಸಾಂಪ್ರಾಸ್ ವಿರುದ್ಧ ರೋಜರ್ ಫೆಡರರ್ ಅವರ ವಿಜಯದಂತೆಯೇ ಟೆನಿಸ್‌ನಲ್ಲಿ ಹೊಸ ಯುಗದ ಆರಂಭದ ಮುನ್ಸೂಚನೆ ನೀಡುತ್ತದೆ.