ಪಾಕಿಸ್ತಾನ ವಿರುದ್ಧ ಭಾರತ ಹಣಾಹಣಿ, ತಂಡಗಳ ಬಲಾ-ಬಲ ಹೇಗಿದೆ?

ಭಾರತವನ್ನು ಕಾಡಲಿರುವ ಆಟಗಾರರು ಯಾರು?

ಇಂದಿನ ಪಂದ್ಯದಲ್ಲಿ ಭಾರತ ತಂಡವನ್ನು ಕಾಡುವ ಸಾಧ್ಯತೆ ಇರುವ ಆಟಗಾರರೆಂದರೆ ಆರಂಭಿಕ ಬ್ಯಾಟ್ಸ್‌ಮನ್‌ ಫಕ್ಹಾರ್ ಜಮಾನ್. ಅವರು ಆಡಿರುವ ಕಳೆದ ಐದು ಏಕದಿನ ಪಂದ್ಯದಲ್ಲಿ ಮೂರು ಶತಕ ಮತ್ತು ಒಂದು ಅರ್ಧ ಶತಕ ಗಳಿಸಿದ್ದಾರೆ. ಭಾರತದ ಬೌಲರ್‌ಗಳಿಗೆ ಅವರು ತಲೆ ನೋವಾಗಲಿದ್ದಾರೆ. ಬೌಲಿಂಗ್‌ನಲ್ಲಿ ವೇಗಿಗಳಾದ ಉಸ್ಮಾನ್ ಖಾನ್, ಫಾಹೆಮ್ ಹಸನ್ ಬಗ್ಗೆ ಎಚ್ಚರಿದಿಂದಿರಬೇಕಾಗಿದೆ.

ಭಾರತ ಭರವಸೆ ಇಟ್ಟಿರುವ ಆಟಗಾರರು

ಭಾರತ ತಂಡವು ಪಾಕಿಸ್ತಾನದ ವಿರುದ್ಧದ ಪಂದ್ಯದಲ್ಲಿ ಅನುಭವಿ ಆಟಗಾರರ ಮೇಲೆ ಹೆಚ್ಚು ಭರವಸೆ ಇಡಬೇಕಾಗಿದೆ. ಪಾಕ್ ವಿರುದ್ಧ ಧೋನಿ ಅವರ ಬ್ಯಾಟಿಂಗ್ ಸರಾಸರಿ ಉತ್ತಮವಾಗಿದೆ ಆದರೆ ಅವರಿನ್ನೂ ತಮ್ಮ ಫಾರ್ಮ್‌ ಕಂಡುಕೊಳ್ಳಬೇಕಾಗಿದೆ. ರೋಹಿತ್ ಶರ್ಮಾ ಸಹ ನಾಯಕತ್ವದ ಆಟ ಆಡಿಲ್ಲ. ಕಳೆದ ಪಂದ್ಯದಲ್ಲಿ ಮಿಂಚಿರುವ ಧವನ್ ರಿಂದ ಮತ್ತೊಂದು ಜವಾಬ್ದಾರಿಯುತ ಇನ್ನಿಂಗ್ಸ್‌ ನಿರೀಕ್ಷಿಸಬಹುದಾಗಿದೆ. ಅಂಬಟಿ ರಾಯ್ಡು ಸಹ ಉತ್ತಮವಾಗಿ ಆಡಿದ್ದಾರೆ. ಇವರು ಮಿಂಚದ ಹೊರತು ಭಾರತ ಗೆಲ್ಲವುದು ಕಷ್ಟಸಾಧ್ಯ.

ಏಷ್ಯಾಕಪ್: ಭಾರತ-ಪಾಕಿಸ್ತಾನ ಮುಖಾಮುಖಿಯ ಕುತೂಹಲಕಾರಿ ಅಂಶಗಳಿವು!

ಬೌಲಿಂಗ್ ಬಲ ಹೇಗಿದೆ?

ಮೇಲ್ನೋಟಕ್ಕೆ ಭಾರತಕ್ಕಿಂತಲೂ ಪಾಕಿಸ್ತಾನದ ಬೌಲಿಂಗ್ ಬಲ ಚೆನ್ನಾಗಿದ್ದಂತೆ ತೋರುತ್ತದೆ. ಆದರೆ ಭಾರತವು ಇಂದಿನ ಪಂದ್ಯಕ್ಕೆ ತಮ್ಮ ಕೀ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರನ್ನು ಆಡಿಸುತ್ತಿದೆ. ಜೊತೆಗೆ ಸ್ಪಿನ್ನರ್‌ಗಳಾದ ಯಜುವೇಂದ್ರ ಚಾಹಲ್, ಕುಲದೀಪ್ ಯಾದವ್ ಉತ್ತಮ ಪ್ರದರ್ಶನ ತೋರುತ್ತಿರುವುದು ಸಮಾಧನಕರ. ಪಾಕಿಸ್ತಾನದ ಪರ ವೇಗಿಗಳಾದ ಉಸ್ಮಾನ್ ಖಾನ್, ಫಾಹೆಮ್ ಹಸನ್ ಉತ್ತಮ ಬೌಲಿಂಗ್ ಮಾಡುತ್ತಿದ್ದಾರೆ. ಆದರೆ ಮೊಹಮ್ಮದ್ ಅಲಿ ಕಳೆದ ಎಂಟು ಪಂದ್ಯದಲ್ಲಿ ಮೂರು ವಿಕೆಟ್ ಮಾತ್ರ ಪಡೆದಿರುವುದು ಪಾಕ್‌ಗೆ ಚಿಂತೆಯ ವಿಷಯವಾಗಿದೆ.

ತಂಡದ ಆಯ್ಕೆ ಗೊಂದಲ

ಭಾರತ ತಂಡಕ್ಕೆ ಆಡುವ 11 ಆಟಗಾರರನ್ನು ಆಯ್ಕೆ ಮಾಡುವುದು ತಲೆನೋವಾಗಿದೆ. ಕೆ.ಎಲ್.ರಾಹುಲ್ ಮತ್ತು ಹಾರ್ದಿಕ್ ಪಾಂಡ್ಯಾ ರಲ್ಲಿ ಒಬ್ಬರು ಆಡುವ ಹನ್ನೊಂದರಲ್ಲಿ ಸ್ಥಾನ ಪಡೆಯಲಿದ್ದಾರೆ. ಜಸ್ಪ್ರೀತ್ ಬುಮ್ರಾ ಸಹ ಇಂದು ಆಡಲಿದ್ದು ಶಾರ್ದೂಲ್ ಠಾಕೂರ್ ಹೊರ ಹೋಗಲಿದ್ದಾರೆ. ನಿನ್ನೆ ಉತ್ತಮವಾಗಿ ಆಡಿರುವ ಅಂಬಟಿ ರಾಯ್ಡು ಸ್ಥಾನ ಉಳಿಸಿಕೊಳ್ಳುವ ಸಾಧ್ಯತೆ ಇದೆ. ದಿನೇಶ್ ಕಾರ್ತಿಕ್ ಅವರು ಪಾಂಡ್ಯಾಗೆ ಸ್ಥಾನ ಬಿಟ್ಟುಕೊಡಲಿದ್ದಾರೆ. ಆದರೆ ಇನ್ನೊಬ್ಬ ಪರಿಪೂರ್ಣ ಬ್ಯಾಟ್ಸ್‌ಮನ್‌ನ ಕೊರತೆ ಕಾಡಲಿದೆ. ಹಾಗಾಗಿ ಕೆ.ಎಲ್.ರಾಹುಲ್‌ ಅವರನ್ನು ಆಡಿಸಿ ಕುಲದೀಪ್ ಯಾದವ್ ಅವರನ್ನು ಹೊರಗಿಡುತ್ತಾರೆಯೇ ನೋಡಬೇಕು.

ಪಿಚ್‌ ಗುಣ ಹೇಗಿರಲಿದೆ?

ಯುಎಇಯದ್ದು ನಿಧಾನಗತಿಯ ಪಿಚ್ ಆಗಿದ್ದು, ವೇಗಿಗಳಿಗಿಂತಲೂ ಸ್ಪಿನ್ನರ್‌ಗಳು ಇದರ ಲಾಭ ತೆಗೆದುಕೊಳ್ಳಲಿದ್ದಾರೆ. ಅತಿ ಹೆಚ್ಚು ಮೊತ್ತದ ಮ್ಯಾಚು ಇದಾಗದಿದ್ದರೂ ಸಹ 280 ರನ್ ಗಳಿಸಿದರೆ ಉತ್ತಮ ಮೊತ್ತವೆನಿಸಿಕೊಳ್ಳಲಿದೆ. ಬಿಸಿಲಿನ ತಾಪಮಾನ ಅತಿಯಾಗಿದ್ದು ಆಟಗಾರರು ಬಳಲಿಕೆಯ ನಡುವೆಯೇ ಆಡಬೇಕಿದೆ. ಬಿಸಿಲಿನ ಸವಾಲನ್ನು ಎರಡೂ ತಂಡಗಳು ಎದುರಿಸಲೇ ಬೇಕಿದೆ.

ಯಾವ ತಂಡದ ಮೇಲುಗೈ ಸಾಧಿಸಲಿದೆ?

ಮೇಲ್ನೋಟಕ್ಕೆ ಎರಡೂ ತಂಡಗಳು ಸಮಬಲದಿಂದ ಕೂಡಿವೆ. ಎರಡೂ ತಂಡಗಳು ಬ್ಯಾಟಿಂಗ್ ಹಾಗೂ ಬೌಲಿಂಗ್ ವಿಭಾಗದಲ್ಲಿ ಸಮಬಲ ಹೊಂದಿವೆ. ಭಾರತ ಹಾಗೂ ಪಾಕಿಸ್ತಾನ ಎರಡಕ್ಕೂ ಮಧ್ಯಮಕ್ರಮಾಂಕದ ತಲೆನೋವಿದೆ. ಪಾಕಿಸ್ತಾನ ವೇಗಿಗಳ ಮೇಲೆ ಅವಲಂಭಿಸಿದ್ದರೆ ಭಾರತವು ಸ್ಪಿನ್ನರ್‌ಗಳನ್ನು ನೆಚ್ಚಿಕೊಂಡಿದೆ. ಭಾರತದ ಪರ ಕೊಹ್ಲಿ ಇಲ್ಲದಿರುವ ಕೊರತೆ ಕಾಣಲಿದೆ. ಒತ್ತಡವನ್ನು ತಾಳಿಕೊಂಡು ಸಂಯಮದ ಆಟ ಆಡಿದ ತಂಡ ಇಂದು ವಿಜಯಿಯಾಗಲಿದೆ.