ಭಾರತ- ಪಾಕ್ ಪಂದ್ಯಕ್ಕೆ ಯುದ್ಧದ ಟಚ್- ಮಾಧ್ಯಮಗಳ ಹೈಪ್ : ಕೊಹ್ಲಿ

ಮುಂಬೈ, ಮೇ 25: ವಿಶ್ವಕಪ್​ಗಿಂತ ಚಾಂಪಿಯನ್ಸ್ ಟ್ರೋಫಿ ಗುಣಮಟ್ಟದಿಂದ ಕೂಡಿರುತ್ತದೆ. ಅಗ್ರ 8 ತಂಡಗಳಷ್ಟೇ ಆಡುವುದರಿಂದ ಟೂರ್ನಿ ವಿಶ್ವಕಪ್​ಗಿಂತಲೂ ಕಠಿಣವಾಗಿರುತ್ತದೆ ಎಂದು ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ತಿಳಿಸಿದ್ದಾರೆ. ಭಾರತ ಹಾಗೂ ಪಾಕಿಸ್ತಾನ ಪಂದ್ಯಗಳನ್ನು ಯುದ್ಧದಂತೆ ಬಿಂಬಿಸುವುದು ಮಾಧ್ಯಮಗಳ ಕೆಲಸ. ನಮಗೆ ಮತ್ತೊಂದು ಏಕದಿನ ಪಂದ್ಯ ಅಷ್ಟೆ ಎಂದು ಕೊಹ್ಲಿ ಹೇಳಿದ್ದಾರೆ.

'ವಿಶ್ವಕಪ್​ನಲ್ಲಿ ಹೆಚ್ಚಿನ ಲೀಗ್ ಪಂದ್ಯಗಳು ಲಭಿಸುತ್ತವೆ. ಆದರೆ, ಚಾಂಪಿಯನ್ಸ್ ಟ್ರೋಫಿ ಅಂಥ ಅವಕಾಶ ಇರುವುದಿಲ್ಲ. ಆರಂಭದಿಂದಲೂ ಉತ್ತಮ ಪ್ರದರ್ಶನ ನೀಡಿದರಷ್ಟೇ ಟೂರ್ನಿಯಲ್ಲಿ ಉಳಿಗಾಲ' ಎಂದು ಪ್ರತಿಷ್ಠಿತ ಟೂರ್ನಿಯಲ್ಲಿ ಆಡಲು ಲಂಡನ್​ಗೆ ತೆರಳುವುದಕ್ಕೂ ಮೊದಲು ನಡೆದ ಸುದ್ದಿಗೋಷ್ಠಿಯಲ್ಲಿ ಕೊಹ್ಲಿ ತಿಳಿಸಿದರು.[ಚಾಂಪಿಯನ್ಸ್ ಟ್ರೋಫಿ : ಸ್ಪರ್ಧಾ ಕಣದಲ್ಲಿರುವ 8 ತಂಡಗಳಿವು]

ಜೂನ್ 4 ರಂದು ಭಾರತ ತಂಡ ಟೂರ್ನಿಯಲ್ಲಿ ತನ್ನ ಮೊದಲ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡವನ್ನು ಎದುರಿಸಲಿದೆ. 'ಹಾಲಿ ಚಾಂಪಿಯನ್ ​ಪಟ್ಟದೊಂದಿಗೆ ಆಡುತ್ತಿರುವುದರಿಂದ ಒತ್ತಡವಿಲ್ಲ. ಯುವ ಆಟಗಾರರಿಂದ ಕೂಡಿರುವ ನಮ್ಮ ತಂಡಕ್ಕೆ ಗೆಲುವೇ ಗುರಿ ' ಎಂದು ಕೊಹ್ಲಿ ತಿಳಿಸಿದರು.[#INDvPAK ಫುಲ್ ವೇಳಾಪಟ್ಟಿ ನೋಟ್ ಮಾಡ್ಕೊಳಿ!]

ಎಲ್ಲ ಮಾದರಿಯ ಕ್ರಿಕೆಟ್​ನಲ್ಲೂ ನಂ.1ಪಟ್ಟಕ್ಕೇರುವುದೇ ತಂಡದ ಗುರಿ. ತಂಡದ ಅನುಭವಿ ಆಟಗಾರರಾದ ಯುವರಾಜ್ ಸಿಂಗ್ ಹಾಗೂ ಎಂಎಸ್ ಧೋನಿ ಕೂಡ ತಂಡದ ಯೋಜನೆ ರೂಪಿಸಲಿದ್ದು, ಕಳೆದ ಬಾರಿಯಂತೆಯೇ ಈ ಬಾರಿಯೂ ಶಿಖರ್ ಧವನ್ ಹಾಗೂ ರೋಹಿತ್ ಶರ್ಮ ಇನಿಂಗ್ಸ್ ಆರಂಭಿಸಲಿದ್ದಾರೆ.[15 ಸದಸ್ಯರ ಟೀಂ ಇಂಡಿಯಾ ಪ್ರಕಟ]

ಐಸಿಸಿ ಚಾಂಪಿಯನ್ಸ್ ಟ್ರೋಫಿ 2017 ಟೂರ್ನಿ ಜೂನ್ 1 ರಿಂದ 18ರ ತನಕ ವಿಶ್ವದ 8 ತಂಡಗಳ ನಡುವೆ ನಡೆಯಲಿದೆ. ಜೂನ್ 1ರಂದು ಟೂರ್ನಿ ಆರಂಭಗೊಂಡರೆ ಜೂನ್ 04ರಂದು ಬಿ ಗುಂಪಿನ ಮಹಾನ್ ಕದನ ನಡೆಯಲಿದೆ.(ಪಿಟಿಐ)