ಈತ ಸೆಹ್ವಾಗ್ ಹಾಗೂ ಗಿಲ್‌ಕ್ರಿಸ್ಟ್ ರೀತಿ ಎದುರಾಳಿಗಳಲ್ಲಿ ಭಯ ಹುಟ್ಟಿಸಬಲ್ಲ ಎಂದ ದಿನೇಶ್ ಕಾರ್ತಿಕ್

ಸೆಹ್ವಾಗ್ ಟೆಸ್ಟ್ ಪಂದ್ಯಗಳಲ್ಲಿಯೂ ಸ್ಫೋಟಕ ಆಟವನ್ನು ಆಡ್ತಿದ್ರು

ವಿರೇಂದ್ರ ಸೆಹ್ವಾಗ್ ಸ್ಫೋಟಕ ಆಟಗಾರ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯವೇ. ಆದರೆ ಸೆಹ್ವಾಗ್ ಸೀಮಿತ ಓವರ್ ಪಂದ್ಯಗಳಲ್ಲಿ ಮಾತ್ರವಲ್ಲದೆ ಟೆಸ್ಟ್ ಪಂದ್ಯಗಳಲ್ಲಿಯೂ ಸಹ ಅಬ್ಬರದ ಬ್ಯಾಟಿಂಗ್ ನಡೆಸುತ್ತಿದ್ದರು. ಟೆಸ್ಟ್ ಪಂದ್ಯಗಳಲ್ಲಿಯೂ ಭಯಭೀತರಾಗದೆ ಬ್ಯಾಟ್ ಬೀಸುವುದನ್ನು ಕಲಿಸಿಕೊಟ್ಟಿದ್ದೇ ವಿರೇಂದ್ರ ಸೆಹ್ವಾಗ್ ಎಂದು ಇತ್ತೀಚೆಗಷ್ಟೇ ಪಾಕಿಸ್ತಾನದ ಮಾಜಿ ಆಟಗಾರ ಸಕ್ಲೇನ್ ಮುಷ್ತಾಕ್ ಕೂಡ ಹೇಳಿಕೊಂಡಿದ್ದಾರೆ.

ಪಂತ್ ಕೂಡ ಸೆಹ್ವಾಗ್ ರೀತಿಯ ಸ್ಫೋಟಕ ಆಟಗಾರ ಎಂದು ಹಲವಾರು ಬಾರಿ ಕೇಳಿ ಬಂದಿದೆ

ರಿಷಭ್ ಪಂತ್ ಕಳೆದ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಭಯಭೀತರಾಗದೆ ಸ್ಪೋಟಕ ಬ್ಯಾಟಿಂಗ್ ನಡೆಸಿದ್ದರು. ಇದಾದ ಬಳಿಕ ತುಂಬಾ ಜನರು ರಿಷಭ್ ಪಂತ್ ಸೆಹ್ವಾಗ್ ರೀತಿಯ ಆಟಗಾರ, ಸೆಹ್ವಾಗ್ ರೀತಿಯೇ ಟೆಸ್ಟ್ ಪಂದ್ಯಗಳಲ್ಲಿಯೂ ಸಹ ಭಯಭೀತರಾಗದೆ ಬ್ಯಾಟ್ ಮಾಡುವಂತಹ ಸಾಮರ್ಥ್ಯವನ್ನು ರಿಷಭ್ ಪಂತ್ ಹೊಂದಿದ್ದಾರೆ ಎಂದು ಹೊಗಳಿದ್ದರು.

ಸೆಹ್ವಾಗ್ ಕೂಡ ರಿಷಭ್ ಪಂತ್ ಆಟವನ್ನು ಕೊಂಡಾಡಿದ್ದರು

ರಿಷಭ್ ಪಂತ್ ಕಳೆದ ಇಂಗ್ಲೆಂಡ್ ವಿರುದ್ಧದ ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದಾಗ ವಿರೇಂದ್ರ ಸೆಹ್ವಾಗ್ ರಿಷಭ್ ಪಂತ್ ಆಟವನ್ನು ಕೊಂಡಾಡಿದ್ದರು. ರಿಷಭ್ ಪಂತ್ ಆಟ ನೋಡಿದರೆ ನನ್ನ ಆರಂಭದ ದಿನಗಳು ನೆನಪಾಗುತ್ತವೆ, ಪಂತ್ ಇದೇ ರೀತಿಯ ಆಟವನ್ನು ಮುಂದುವರಿಸಿದರೆ ಮುಂದೊಂದು ದಿನ ದೊಡ್ಡ ಸೂಪರ್‌ಸ್ಟಾರ್ ಆಗುತ್ತಾನೆ ಎಂದು ವಿರೇಂದ್ರ ಸೆಹ್ವಾಗ್ ಭವಿಷ್ಯ ನುಡಿದಿದ್ದರು.