T20 World Cup 2022 Final : ಮಳೆಯಿಂದಾಗಿ ನ.13ರಂದು ಫೈನಲ್ ನಡೆಯಲಿದ್ರೆ, ಸೋಮವಾರ ಎಷ್ಟು ಓವರ್ ಪಂದ್ಯ? ಏನು ಸಮಯ?

ಟಿ20 ವಿಶ್ವಕಪ್ ಫೈನಲ್ ಪಂದ್ಯಕ್ಕೆ ಮಳೆ ಭೀತಿ

ಭಾನುವಾರ ನಡೆಯಲಿರುವ ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯಕ್ಕೆ ಮಳೆ ಭೀತಿ ಎದುರಾಗಿದ್ದು, ಹವಾಮಾನ ಮುನ್ಸೂಚನೆ ನೀಡುವ 'ಆಕ್ಯುವೆದರ್' ಪ್ರಕಾರ ಮೆಲ್ಬರ್ನ್‌ನಲ್ಲಿ ಮಳೆ ಆಗುವ ಸಾಧ್ಯತೆ ಹೆಚ್ಚಿದೆ. ಇಷ್ಟಲ್ಲದೆ ಸ್ಥಳೀಯ ಹವಾಮಾನ ಇಲಾಖೆಯ ಪ್ರಕಾರ ಶೇಕಡಾ 95ರಷ್ಟು ಮಳೆ ಆಗುವ ಮುನ್ಸೂಚನೆ ನೀಡಲಾಗಿದ್ದು, ಹೈವೋಲ್ಟೇಜ್ ಪಂದ್ಯಕ್ಕೆ ವರುಣರಾಯ ಅಡ್ಡಗಾಲಿಡುವ ಸಾಧ್ಯತೆಯ ಪ್ರಮಾಣ ಹೆಚ್ಚಿದೆ.

ಮಳೆ ಬಂದ್ರೆ ನವೆಂಬರ್ 14ಕ್ಕೆ ಫೈನಲ್ ಪಂದ್ಯ

ಈಗಾಗಲೇ ಭಾನುವಾರ ನಿಗದಿಯಾಗಿರುವ ಫೈನಲ್ ಪಂದ್ಯವು ಮಳೆಯಲ್ಲಿ ಕೊಚ್ಚಿ ಹೋದ್ರೆ, ನವೆಂಬರ್ 14ಕ್ಕೆ ಫೈನಲ್ ಪಂದ್ಯವನ್ನು ನಡೆಸಲು ಈಗಾಗಲೇ ಐಸಿಸಿ ಮೀಸಲು ದಿನವನ್ನು ನಿಗದಿಪಡಿಸಿದೆ. ನವೆಂಬರ್ 13ರಂದು ಕನಿಷ್ಠ ಉಭಯ ತಂಡಗಳು ತಲಾ 10 ಓವರ್‌ಗಳಂತೆ 20 ಓವರ್‌ಗಳನ್ನ ಆಡಿದರಷ್ಟೇ ಫಲಿತಾಂಶವನ್ನು ನೀಡಲು ನಿರ್ಧರಿಸಲಿದ್ದು, ಇಲ್ಲದೇ ಹೋದಲ್ಲಿ ಸೋಮವಾರ ಫೈನಲ್ ಕಾದಾಟ ನಡೆಯಲಿದೆ.

ಟಿ20 ವಿಶ್ವಕಪ್: ಪಾಕಿಸ್ತಾನ vs ಇಂಗ್ಲೆಂಡ್ ವಿರುದ್ಧದ ಫೈನಲ್ ಪಂದ್ಯಕ್ಕೆ ಅಂಪೈರ್‌ಗಳನ್ನು ಘೋಷಿಸಿದ ಐಸಿಸಿ

ಸೋಮವಾರಕ್ಕೆ ಹೆಚ್ಚುವರಿ 2 ಗಂಟೆಗಳ ಸಮಯ ನಿಗದಿ

ಸಾಮಾನ್ಯವಾಗಿ ಟಿ20 ಅಂತರಾಷ್ಟ್ರೀಯ ಪಂದ್ಯಕ್ಕೆ ಎಕ್ಟ್ರಾ ಟೈಂ ಆಗಿ 30 ನಿಮಿಷವನ್ನು ನೀಡಲಾಗುತ್ತದೆ. ಸೆಮಿಫೈನಲ್ ಹಾಗೂ ಫೈನಲ್‌ ಪಂದ್ಯಕ್ಕೆ ಹೆಚ್ಚುವರಿ ಸಮಯವನ್ನು 2 ಗಂಟೆಗೆ ಈಗಾಗಲೇ ಐಸಿಸಿ ನಿಗದಿಪಡಿಸಿತ್ತು. ಆದ್ರೆ ಮೆಲ್ಬರ್ನ್‌ನಲ್ಲಿ ಮಳೆ ಭೀತಿ ಎದುರಾಗಿರುವುದರಿಂದ ಸೋಮವಾರಕ್ಕೆ(ನ.14) ಫೈನಲ್ ಮುಂದೂಡಲ್ಪರೆ 2 ಗಂಟೆಗಳ ಎಕ್ಟ್ರಾ ಟೈಂ ಬದಲು, 4 ಗಂಟೆಗಳ ಕಾಲ ವಿಸ್ತರಿಸಲು ಐಸಿಸಿ ನಿರ್ಧರಿಸಿದೆ.

ಈಗಾಗಲೇ ಪೂರ್ವ ನಿರ್ಧಾರದಂತೆ ಫೈನಲ್ ಪಂದ್ಯವು ಭಾನುವಾರ ಸ್ಥಳೀಯ ಕಾಲಮಾನ ಸಂಜೆ 7 ಗಂಟೆಗೆ (ಭಾರತೀಯ ಕಾಲಮಾನ 1.30ಕ್ಕೆ) ಆಯೋಜಿಸಲಾಗಿದ್ದು, ಸೋಮವಾರಕ್ಕೆ ಪಂದ್ಯ ಮುಂದೂಡಲ್ಪಟ್ಟರೆ, ನವೆಂಬರ್ 14ರಂದು ಸ್ಥಳೀಯ ಕಾಲಮಾನ ಮಧ್ಯಾಹ್ನ 3ಗಂಟೆಗೆ (ಭಾರತೀಯ ಕಾಲಮಾನ ಬೆಳಿಗ್ಗೆ 9.30ಕ್ಕೆ) ಪಂದ್ಯ ನಡೆಯಲಿದೆ.

PAK vs ENG: ಹೀಗಾದ್ರೆ ಮಾತ್ರ ಪಾಕಿಸ್ತಾನ ಟಿ20 ವಿಶ್ವಕಪ್ ಗೆಲ್ಲಲು ಸಾಧ್ಯ; ಕೆವಿನ್ ಪೀಟರ್ಸನ್

ಮಳೆಯಿಂದಾಗಿ ಸೋಮವಾರವೂ ಪಂದ್ಯ ಸ್ಥಗಿತಗೊಂಡರೆ ಏನು ಗತಿ?

ಈಗಾಗಲೇ ಮೇಲೆ ತಿಳಿಸಿರುವಂತೆ ಐಸಿಸಿ ಮೀಸಲು ದಿನವನ್ನು ಗೊತ್ತು ಮಾಡಿದೆ. ಹೀಗಾಗಿ ಭಾನುವಾರ ಒಂದು ವೇಳೆ ಮಳೆಯಿಂದಾಗಿ ಪಂದ್ಯದ ಓವರ್‌ಗಳು ಕಡಿತಗೊಂಡು ಪಂದ್ಯ ನಡೆಯಿತಾದ್ರೂ, ಪುನಃ ಪಂದ್ಯ ಸ್ಥಗಿತಗೊಂಡ್ರೆ, ಸೋಮವಾರ ನಿಗದಿತ ಸಮಯದಲ್ಲಿ ಉಳಿದ ಓವರ್‌ಗಳಿಗೆ ಪಂದ್ಯ ಮುಂದುವರಿಯಲಿದೆ.

ಇಲ್ಲಿ ಗಮನಿಸಬೇಕಾದ ವಿಚಾರ ಏನಂದ್ರೆ, ಟಾಸ್ ಆದ ಬಳಿಕ ಪಂದ್ಯವು ಶುರುವಾಗಿದೆ(ಲೈವ್) ಎಂದು ತೀರ್ಮಾನಿಸಲಿದ್ದು, ಎರಡು ದಿನಗಳಲ್ಲಿ ಕನಿಷ್ಠ 20 ಓವರ್‌ಗಳ ಪಂದ್ಯ ನಡೆಯಬೇಕಿದೆ. ಆದ್ರೆ ಒಂದು ವೇಳೆಯಲ್ಲಿ ಮೆಲ್ಬರ್ನ್‌ನಲ್ಲಿ ಎರಡು ದಿನಗಳ ಕಾಲ ಮಳೆ ಅಡ್ಡಿಪಡಿಸಿದ್ರೆ, ಎರಡು ತಂಡವನ್ನು ಚಾಂಪಿಯನ್ ಎಂದು ಘೋಷಿಸಲಾಗುವುದು. ಪ್ರಶಸ್ತಿಯು ಉಭಯ ತಂಡಗಳಿಗೆ ಹಂಚಿಕೆಯಾಗಲಿದೆ.